1 Corinthians 2

Paul Kristus kueram mu ko dugu duap la diram balukaso

Aga singsang, ani ulengkala nengerak baga se, Kaem ko den mu ani ikia kari biya bo iwita me ninga manarukasam, aimi patawu se den me balukasam. Mu awuk, ani agata iwita balem, tom ani ninga ningi baga se mu, ani mel suen biya ko angamili sapuruk se ani Jesus Kristus ko dugu duap la balikko, nu tam kangono te kueram mu ko den la balikko ko balem.
1 Cor 2:2-3 Tam kangono ko den: Gal 6:14. Paul Corinth ningi: Acts 18:9-11.
Tom ani nenenga ningi tairem mu aninga asokel mena, se nguangerem, ale angimik ningi barawara makaso. Se den ani balukasam, mu ani ikia kari bo iwita nina nengemang kulukuekko me ninga manarukasam. Mena. Ani Korang Bur ko sokel ninga kasurukasam. Mu awuk, aninga angamang mu nina ikia kari nunga den welang yawara umu te me nengemang ningi nunguning arukko, mu nina Kaem ko sokel te nengemang ningi nunguning aruk se te aora biya bagaralko.

Kaem ko Korang Bur ikia nunguning nangarso

Bare kariimet maingkala Kaem ko den te sokel taman, mu ani den ikia bibiya karogo mu nunga kasursam. Bare ikia mu ali imi ko ikia mena. Se ali imi ko kari bibiya, nunga nosokel menarukko, mu nunga ikia iwita mena tala. Ani Kaem ko ikia maingkala yumura te anikaso mu wetang te balsam. Kaem ali me bitakaso la, ko ikia bitiruk se ana ko nikitang te nainip karogo baganakko imi mu ko giram ale ikiwakaso. Bare ali imi ko kari supuling bibiya bo ta Kaem ko ikia imi ko ninguru me ikiman. E nuna mu ko ikiman ale mu, nuna Kari Biya nikitang se nup biya ago mu tam kangono te me tagiman ale wore.

Bare Kaem ko batoga te iwita aniso:

“Nomotam te me aringiman, nodogowa te me ikiman,
ale nunga ikia te nuna bo ta Kaem kariimet alo noko kuesan mu munan yawara yawara nungarukko me ikiman.”
1 Cor 2:9 Isaiah 64:4.

10 Bare Kaem ko Korang Bur te wetang te nanga kausam se ko ikiman! Korang Bur mel suen biya ko iki saposo, ale Kaem ko ikia yumura te mu ago la ko ikiso ale anananga manarso.

11 Se kari awuk bore kari bo ko ikia gomang ningi la aniso mu ko ikiso? Mena. Mu kari mu kota ko ikia gomang ningi aniso mu ko ikiso. Se butatala, kari bo ta Kaem ko ikia aguwaya mu me ko ikiso. Mu Kaem ko Korang Bur kota ko ikiso. 12 Uwutatala, ana ali imi ko bur bo me taman, ana Korang Bur Kaem kote tairam mu ana taman, ale nu te ana Kaem ko munan suen biya nangaram mu ko ikisan.
1 Cor 2:12-16 Korang Bur ko ura beteso: John 8:47; 14:17; 16:13-14; 1 John 2:20. Verse 16: Isaiah 40:13.


13 Buta se ana mel umutang ko balsan. Bare ana ali imi ko kariimet nunga ikia te me balsan, Korang Bur ikia nangarso se te den balsan. Ana den nunguning Korang Bur nangarso mu tasan ale kariimet Bur nongote aniso mu nunga manorsan. 14 Bare awiriya Kaem ko Korang Bur nukote mena, mu nu Korang Bur ko munan ago meso. Ale munan mu nunga duap ikiokko me terong, mu awuk, Korang Bur nu ilak mena se. Nu munan mu ikiso ikia ngualara se munan kawel ko ma balso. 15 Kariimet Korang Bur nongote aniso, mu nuna mel suen biya tutemonko terong mam. Bare nuna nongota mu kari bo ta nononga bagara aolak tuterukko me terong.

Kaem ko batoga te iwita aniso:

“Awiri Kari Biya ko ikia ikiwoso? Mena.
Ale aking awiri ikia nu kausokko terong mam? Mu mena tala.”
Bare ana mu Kristus ko ikia mu nangate aniso.

16 

Copyright information for `WSK