1 Corinthians 6

Ana Kris kariimet ikup ago agi mu nanga Kris kari saki nomokete la ikup mu nungurnakko

Bare nina munan diram me betesan. Kari bo ko bo ilak den tagiso, mu nu awuk se ko Kris saki nomokete den mu me nungurso, am giso ago nama kari Kris kari mena mu arungak balso? Ana Kaem ko kariimet mu udagi ali lilim ko kariimet nunga tutenakko mu nina me ikisan e? Mu nina ali lilim ko kariimet nunga tuteralkowo! Se awuk? Nina den gotektek nenenga ningi aratoso mu tuteralko me terong e? Aking ana udagi engel alo nunga tutenakko mu betelatala nina me ko ikisan e? Ana engel alo nunga tutenakkowo! Buta se ana ali imi ko den mu ana tutenakko terong mam!

Butata se ikup uwuta aratoso, mu awuk se nina gisan ago kari Kris alo nunga ningi nunup mena mu nongote ago namasan? Ani nina te dolaralko den imi balsam! Awuk a? Se nenenga ningi kari ikia biya bo launuria ilagala nunumi karogo den tagiwomon mu den mu arigokko mena e? Bare Kris kari bo barasoso ale kari Kris mena alo nomokete ko bo den te atumuso! Mu me terong!

Nina ninga Kris singsang den ningi nunga awusan mu te nina ninimi wetang te betesan mu nina am supusan nunguningkiri! Se ani iwita ninga manorsam, ninga bita maguwusan agi, ninga mel tere gisan agi, bare am ngual butata betemonko, den ningi me nunga awuralko!
1 Cor 6:7 Ka bo nika bita maguwurok agi mu, ko memek am siwu tuiko: Mat 5:38-41.
Bare nina ninimi den ningi awusan mu ko duap iwita: nina nengeta ninga saki nunga bita maguwusan, ale nunga mel tere gisan! Nina nengeta ninga Kris launuria alo nungumik te kilek sumu agotala betesan!

Kariimet munan memek bitawara, mu nuna Kaem ko kingdom me tamonko, mu ko nina me ikisan e? Nengeta ninimi me kulalko! Kari ngual ngual imet ago anira barasa agi, kari kaem kawel nup patowara agi, kari nuwus-kuari ko munan kiawara agi, kari imet ko numi guruga ko karogo kaeyawara agi, kari kari la nunumi imet ko betera agi, 10 se tere kari, se kari mel suen biya ko nomotam nongomang barasuwara, se kari yu na ale ngualawara, saki nunga nunup balu maguwuwara, se tere daong kari, mu kari ari umutang Kaem ko kingdom ningi ilak me bagomonkowo.
1 Cor 6:9-11 Kariimet saki Kaem ko kingdom ningi ilak me bagomonko: Gal 5:19-21; Eph 5:5-7; Rev 22:15.
11 Se nina saki ulengkala uwutatala bagakasan. Bare nina Kari Biya Jesus Kristus ko nengemang ningi nunguning aram mu te, Kaem ko Bur te ninga giam, ninga memek siwu saparam, ale ninga balam noko kariimet ningo diram ma ninga balam.

Anananga nangimik guang mu Kari Biya ko kawam laili, saman katagot ko mena

12 Nina saki balsan, “Ana munan suen la, ko kaola bo mena, am betenakko pa!” ma balsan. Bare ani iwita ninga manorsam, “Munan mel saki aninga bagara aolak me sangukko umutang ani me bitirikko! Ani munan memek bo me aga bituokko!” 13 Aking nina saki balsan, “Na mu natagu biya ko, se natagu biya mu na ko,” ma balsan. Se mu nunguningta. Bare Kaem wete nunga menawurokko! Nangimik guang mu kilek memek ko mena. Mu Kari Biya ko. Se Kari Biya mu nangimik guang ko. 14 Kaem Kari Biya Jesus kueram bare patowaram se aking barasam. Turantala aking ko sokel umutang te nanga patawuruk se nangimik guang iru ago barasanakko.

15 Nenenga ningimik guang mu Kristus ko kumik dun sang mu ko nina me ikisan e? Se ani Kristus ko kumik guang sang taik ale lage luan imet ko kumik guang karogo biguwurek i? Mena. 16 Nina ikisan, kari lage luan imet ilak numi karogo biguwuso mu nama nungumik suwanta aso. Kaem ko batoga te mel mu ko iwita balam se aniso, “Nuna ilagala mu nama nungumik guang suwanta aso iwitata.” 17 Bare awiriya Kari Biya ilak biguwuso, mu nu Korang Bur te nu ilak suwanta.

18 Se umutang ko ani balsam, munan memek imet arungu anira barasa mu nibiring tualko! Memek saki kariimet betesan mu nungumik guang me maguwuso. Bare awiriya kilek memek umutang beteso, mu kota ko kumik guang maguwuso. 19 Ninga ningimik guang mu Korang Bur ko kawam kako mu ko nina me ikisan e? Kaem Korang Bur ningaram se nengemang ningi aniso. Se nenenga ningimik guang mu nengeta ninga mena, mu Kaem ko la. Nu koma kalel biya te ninga diaram.
1 Cor 6:20 Kaem Kristus ko gue te nanga dia tam: 1 Peter 1:18-19.
Se umutang ko ninga ningimik guang Kaem ko nup te la patowaralko.

20 

Copyright information for `WSK