1 Corinthians 7

Nuwus-kuari ko munan

Se aitak ani den sang nina tam gawa te bataguru aisiman mu ko balikko.

Kari imet me taso mu terong tala.
Bare kilek memek ninguru aniso, se umutang ko kari kota ko nuwus ago, se imet kota ko kuari ago mu asele yawarakala. Kari ko kumik mu ko nuwus ko, se kari mu me guramukko. Se nuwus ko kumik mu ko kuari ko, se nuwus mu me guramukko. Imet ko kumik mu nu kota ko la mena, mu noko kuari ko. Iwitatala, kari ko kumik mu nu kota ko la mena, mu noko nuwus ko. Nina nuwus-kuari, ninimi nibiring tual ale ninimi me guramalko. Bare tom saki laili beteral ale Kaem ngatongalko, mu giral ninimi nengemang suwan awural ale ko tom beteral, asele Kaem aru ngatongal nama ko tom balman mu te asele aking tai wete biguwuralko. Nengeta ninimi bitualko tom ninga kiaruk se Satan ninga ira arigok bore ko butata beteralko. Ani ikia ningarsam, munan aora biya me ninga manorsam. Aninga angamang mu kari suen la ani imet mena bagasam iwitatala bagomonko. Bare Kaem kari koma koma munan kirker nungarso, bo munan duap bo tuso, ale aking bo munan duap bo tala tuso.
1 Cor 7:7-11 Kari imet me gisan: Mat 19:12. Imet kulak nugari kueman: 1 Tim 5:14. Nuwus-kuari numi mera: Mat 5:32; 19:19.


Se aking nina kariimet gerewa, se imet kari mena, se kari imet mena, mu iwita ninga manorsam: nina ani imet mena bagasam turan bagaralko mu yawarakala. Bare nina nengeta ninimi kaolalko me terong agi mu, am imet talko, ale am kari talko tala. Uwuta me beteral ale ikia tawun biya ninga moa laguruk bore ko.

10 Se nina imet kari ninimi giman mu ko ani iwita balsam, bare imi mu aninga den mena, mu Kari Biya ko den: Imet noko kuari me bitirukko. 11 Bare nu uwuta bitiruk agi mu, nu kari bo me taukko. Ito peleruk ko kuari kote namuruk ale ilak bagurukko. Se betela kari ko nuwus me merukko.

12 Se saki nunga mu Kari Biya me balso, bare ani agata iwita balsam: Kris kari bo imet karogo, bare ko nuwus mu Kris imet mena, bare noko gomang ko kuari mu ilak bagurukko, uwuta mu ko kuari me meruk ale karukko. 13 Aking Kris imet bo kari karogo, bare ko kuari mu Kris kari mena, bare noko gomang ko imet ilak bagurukko, uwuta mu ko nuwus barasuk ale ko kuari me meruk ale karukko. 14 Mu awuk, kari gomang ningi nunguning mena, bare ko nuwus Kris imet se te Kaem kari mu me ari maguwurokko. Se betelatala, imet gomang ningi nunguning mena, bare ko kuari Kris kari se te Kaem imet mu me ari maguwurokko. Uwuta mena ale mu, nononga kuriang Kaem koma te me terong ale. Bare nononga kuriang mu Kaem koma te terong se am yawarakala tala.
1 Cor 7:12-14 Corinth Kris kariimet saki iwita ikikasan, Kris kari se ko nuwus Kris mena mu te kari umutang Kaem koma te me terong, iwita ikikasan. Bare Paul balam mu uwuta mena.


15 Bare ni Kris, se ka kari agi imet agi Kris mena, bare ka merukko ago kaeruk, mu ni me kaloko, nu am bitar se namurukko. Munan uwuta nikate aratuk agi mu, ningi ko kaola bo mena. Mu awuk, Kaem ana nangamang suwanta se lila te baganakko nanga auram.
1 Cor 7:15-16 Nangamang suwanta baganakko: Rom 12:18; 14:19. Nuwus-kuari nunga den: 1 Peter 3:1-2.
16 Se Kris imet, ni me ikisam, ka kari Kris mena bare am sangaru se Kris kari ko am aratukko, wore ni me ko ikisam. Se Kris kari, ni betela me ikisam, ni ka niwus Kris mena bare am sangaru se Kris imet ko am aratukko, wore ni me ko ikisam.

Ana aguwaya bagaman se Kaem nanga auram mu eng uwutata baganakko

17 Nina aguwaya bagaman se Kaem ninga auram, mu umutang te la bagaralko. Aking Kari Biya munan aguwaya ningaram umutang te la bagaralko. Ani Kris alo suen la nunga ningi munan uwutata balsam.

18 Ko kausa bo mu iwita: Kari maingkala kumik guang batagorman se Kaem nu auram, mu nu kumik guang me batoga iwita numi gurugokko me ago kaerukko. Aking kari kumik guang me batoga se Kaem nu auram, mu kumik guang me batagarmonko. 19 Kumik guang batoga mu mel yam, se kumik guang me batoga mu mel yam tala. Bare Kaem ko munan den karo tua umutang mel nunguning.
1 Cor 7:19 Nangimik guang batoga mu mel biya nunguningkiri mena: Gal 5:6; 6:15.


20 Nina suwan suwan aguwaya bagaman se Kaem ninga auram, mu eng uwutata bagaralko. 21 Ni ura dungan kari ko bagerem agi se Kaem ka auram, mu am uwutata bagerko, mu ko ikia biyala me ka morukko. Bare lage bo ni te ura dungan mu bitar ale tagi toko aniruk agi mu, butata bitarko. 22 Mu awuk, awiriya ura dungan kari ko bagaram se Kari Biya nu auram, mu Kari Biya nu dia tam se nu aitak Kari Biya motam te ura dungan kari ko me bagoso. Butatala, awiriya ura dungan kari ko me bagaram, yam bagaram, se Kari Biya nu auram, mu nu aitak Kristus ko ura dungan kari bagoso. 23 Bare Kaem koma kalel biya te ninga diaram. Se nina kari nunga ura dungan kariimet ko me aratalko. 24 Aga singsang, nina suwan suwan aguwaya bagaman se Kaem ninga auram, mu umutang te la Kaem ilak bagaralko.

Kariimet nunumi me gisan wore nunga den

25 Bare kariimet me nunumi gisan, mu ani Kari Biya ko munan bo aningate mena, bare ani agata aga ikia ninga manorsam. Se den ani balsam mu nina am ko nengemang ningi nunguning arukko, mu awuk, Kari Biya gomang aisam ale ikia aisuwoso. 26 Aitak tom imi te ana Kris alo ikup duap duap gisan. Se ani ikisam, ni aguwaya bagasam mu eng uwutatala bagerko. 27 Ni niwus ago agi mu, niwus karoko me negerko. Aking ni imet mena agi mu, ni imet toko me ko loagerko. 28 Bare ni imet tasam agi, bare mu ni memek me betesam. Se imet itiwik kari taso agi, bare mu betela memek bo me beteso. Bare arikaya nunumi gisan, mu nuna ali imi te ikup suen biya aringimonko. Se ani ikup mu nina ningimik te aratukko angamang me aniso.

29 Aga singsang, ani den imi balsam mu ko duap iwita: tom nukum pipingi aram. Se ninga ikia nengemang Kari Biya ko la anirukko. Nina imet karogo, mu imet mena iwita bagaralko. 30 Se nina nia mowasan, mu me mo niawara iwita bagaralko. Se nina amilmilawasan, mu me amilmilawara iwita bagaralko. Se nina saki alo nongote melmasak diawasan, mu melmasak me diawara iwita bagaralko. 31 Se nina ali imi ko mel te ura bitawasan, mu nina mel mu me tawun biya iluwasan iwita bagaralko. Mu awuk, ali imi aitak aniso iwita me anirukko, mu mena namurukkowo.
1 Cor 7:31 Kris alo nunga bagara ali imi te: John 17:14-19; 1 John 2:15-17.


32 Ani nina mel suen biya ko ikia me ninga morukko angamang aniso. Kari imet mena, mu nu Kari Biya ko ura ko la sail tagiso. Noko gomang nu munan Kari Biya ko amilmilurukko mu la bitirukko. 33 Bare kari nuwus ago, mu noko gomang nu munan ko nuwus ko amilmilurukko mu la bitirukko, se ali imi ko mel ko ikia suen biya nu moso. 34 Nukote ikia ilagala, bo Kari Biya ko ura ko, bo ali imi ko bagara ko. Koma suwanta tala, imet kari me taso, imet itiwik agi, mu nu Kari Biya ko ura ko la sail tagiso. Noko gomang mu noko ikia, ko kumik, ko dora mu Kari Biya ko la bagurukko. Bare imet kuari ago, mu noko gomang mu nu munan ko kuari ko amilmilurukko mu la bitirukko, se nu ali imi ko mel ko sail tagiso.

35 Bare ani nina ninga kalik se ninimi me gialko den imi me balsam. Mu ani nina te ninga sangikko balsam. Aninga angamang nina yawarakala baga se, tom suen biya ikia suwanta te Kari Biya ko ura ilu se bagaralko.

36 Bare kari bo imet itiwik noko nuwus ko luan ilu beteman se bagoso, bare dolara ko kilek sang kumik te bitiruk bore ko, se betelatala imet umu kari taukko tom kiarukko iwita agi mu, kari mu imet umutang am taukko. Mu nu memek me beteso, am nunumi gimonko. 37 Bare kari numi ikiso nu imet me tauk bare nu am yawarakala bagurukko, ale ikia ngual ngual nu me morukko iwita numi ikiso ale imet me taso, mu nu betela yawarakala beteso. 38 Buta se, kari ko imet taso mu nu yawarakala beteso. Bare kari imet me taso mu nu yawarakala nunguningkiri beteso.

39 Imet ko kuari am bagoso, mu nu kari umutang la ilak bagurukko. Bare ko kuari kueso, mu nu kari bo taukko mu am taukko. Bare kari mu Kris kari mu asele.
1 Cor 7:39 Kris kariimet mu kariimet Kris mena mu arungu me kapetomonko: 2 Cor 6:14.
Bare aninga ikia te mu nu am bagurukko mu nu amilmil te bagurukko. Se ani ikisam, Kaem ko Korang Bur aningate ago aniso.

40 

Copyright information for `WSK