1 Corinthians 8

Buruk inang kaem kawel te tama tuata wore ko den

Nina buruk inang kari saki kaem kawel te tama bita tuman bare ko isa beteman, se ani nina ninguru ikialko den imi balsam.
1 Cor 8:1 Corinth ningi kaem kawel nunga temple suen biya, se temple saki ningi mu biguwura ale na te na ko kuwim karogotala. Se na inang kaem kawel te tama bita tuman mu temple ningi nokasan; agi market temple duap te mu te diakasan ale karogo nama kawam te nokasan.
Ana ikisan, ana suen la ikia ago. Bare ana nainimi balnak “ikia ago” manak ale ikia umutang te eng nainimi patowanak bore ko se sinar tanakko. Bare ana saki alo nunga kuenak umutang mu nunga sangukko.
Mu awuk, awiriya numi balso nu ikia biya ago ma balso, bare kari mu ko ikia me terong maso. Bare kari Kaem ko kueso, umutang Kaem nu ko ikiso noko kari ma balso.
1 Cor 8:3 Munan Kaem koma te munan biya: Rom 14:17-19; Gal 5:13-14.


Buta se, buruk inang kari saki kaem kawel te tama bita tuman mu ana Kris alo nanak agi mena agi mu ko ani iwita ko balsam: ana ikisan, kaem kawel mu nunguning mena, mu dora diwang. Mu kaem suen biya mena, Kaem suwanta. Mel suen biya nunga balsan “kaem” masan, “kari biya” masan. Bare kaem suen biya duruk te anisan agi, ali te anisan agi, bare ana mu nanga Kaem suwanta, nanga Nainet. Nu mel suen biya ko duap, se ana noko la bagasan. Se nanga Kari Biya suwanta tala, Jesus Kristus. Nu te mel suen biya aratam, se nu te la ana bagasan, umutang ana ko ikisan.
1 Cor 8:6 Kaem suwanta se kaem kawel: Gal 4:8; Eph 4:5-6.


Bare Kris kariimet saki mu ko me ikisan. Nuna ikisan kaem kawel alo mu nunguningta masan. Mu awuk, nuna ulengkala kaem kawel mu ninguru nunup patawukasan. Buta se, aitak tom nuna buruk inang kari saki kaem kawel bo te tama tuman mu nasan, mu nuna nungamin yena yena nasan, mu awuk, mu mel kaem kawel te tama tuman bore, se ko ikia nunga moso. Bare ana na inang saki nasan agi mena agi, bare mu nanga sanguk se Kaem ilak yawarakala baganakko iwita mena. Na mu kako me nanga awurokko, aking nangamang karur me tugumokko.
1 Cor 8:8 Ana inang suen la ko kaola bo mena, am nanakko: Mark 7:18-19; Rom 14:14; 1 Tim 4:3-4.


Bare sinar talko. Munan nina ikisan terong wore bitawaral se kariimet saki nongomang ningi nunguning sokel mena wore te dagulomon bore ko, sinar talko.
1 Cor 8:9-13 Nanga bo ko ikiwa se na nanakko: Rom 14:13-15, 19-21. Kari gomang nama tai se na umu naso umutang memek beteso: Rom 14:23.


10 Ko kausa bo mu iwita: Ni kari ka ikia katir sinar, mu ni kaem kawel nunga kawam ningi na nower se kari bo ko gomang namara taira karogo, ko ikia sinar mena, mu ni karkuk, mu umutang te nu gomang barasuk ale buruk inang kaem kawel te tama tuman mu karogo naukko agila. 11 Se mu te nika bo, Kristus karogo ko kueram, wore ni ka ikia biya te nimi patowasam mu te negesam se gomang motam daguloso.

12 Nina iwita ikialko. Ninga sikisaki ikia sinar mena, nongomang ningi nunguning sokel mena. Se nina uwutata ngual nungaral, se munan nuna ko ikisan me terong wore am betemon agi mu, nina memek nungumik te betesan, ale nina Kristus kumik te betelatala memek beteman.

Buta se mel ani naik se aga bo te dagulokko mu ani me naikkowo! Aninga munan te aga bo dagulok bore ko!

13 

Copyright information for `WSK