1 Corinthians 9

Paul ura koma kariimet nuguting te me tokaso mu ko amilmilakaso

Awuk a? Ani kari saki nobowa ningi bagasam e? Mu mena. Ani kari saki nobowa ningi me bagasam. Ani apostle bagasam. Nanga Biya Jesus ani arigem. Se nina mu aninga ura Kari Biya agiting te beteram se iluwem wore ko nunguning. Kariimet saki ani apostle ko me aga balsan agi, bare nina aninga ikisan mu ani apostle. Mu awuk, Kari Biya apostle ura ani aisam mu ko nunguning te ariga ko mu, nina Kris kariimet ko bagasan.

Se kariimet ani ago ko den balsan,
1 Cor 9:3 Paul Barnabas ilak mu nuna ilagala nunga ura ilu se, Kris alo nongote mel gimonko me ko kuakasan: v12. Mu nuna nongota nunga nuguting te nunumi sangarmonko ura bitakasan: Acts 18:3; 1 Cor 4:12. Umutang ko kariimet saki balukasan nuna apostle nunguning mena ma nunga balukasan.
mu aninga den koma mu iwita:
Ani Barnabas ilak ana apostle, se nanga nangamang buta aniruk, mu ana Kris alo nunga ningi ura tasan mu ura koma na yu am nangarmon se nanakko. Se aking apostle saki, se Kari Biya ko uria mitak, se Peter, mu nunga nunuwus Kris imet bare nunga gisan ale arungu sor sor geragasan. Se ana mu uwutata betenakko mu terong la, mu ko munan aniso.

Agi nina ikisan Kris alo apostle saki nunga sangarmon se ani Barnabas ilak nangata nainimi te sangornakko manga ura ilunakko e? Mena. Ana ilagala agotala nanga sangarmonko mu terong la. Kager kari bo kagera se ko na inang kota diaso e? Mena. Aking kari bo sume galuk asurso ale ko nunguning me gi naso e? Mu gi naso. Aking kari bo bulmakau nunga bitarso mu nu nunga amin sang me ituso ale naso e? Mena, nu naso.

Agi ani kari nunga ikia wore la balsam e? Se Law Den uwuta me balso e? Mena. Law Den te iwita batogam, “Tom bulmakau wheat nunguning gurugu patawu se geragawuruk, mu kuring me kaloko.” Se Kaem bulmakau la nunga ikia moso e? 10 Mena. Nu ana noko ura kari nago ko iki se balso. Se ana nago ko den umutang aniso. Kari ningam iru kauso ale te sume galuk asurso, se kari na garukoso mu giso, mu nuna nongota ago ningam mu te na inang saki gimon namonko mu ko iki se am ura ilumonko. 11 Mu turantala, ana Kaem ko den nenenga nedera marak tuokko ninga ningi sume iwita asurman. Se ana nengete nangimik guang ko mel ginakko mu terong. 12 Saki alo nenengate mel gisan. Se ana mu nengete ginakko mu terong nunguningkiri.

Bare ana me ko balukasan, ale aitak betelatala Kris alo nongote mel ginakko me ko kuesan tala.
1 Cor 9:12 Paul kota ko kuting te manga ura ilukaso: Acts 20:34-35; 2 Cor 11:9-11.
Mena nunguningkiri! Ana uwuta betenak se kariimet saki iki maguwumon ale Kristus ko den gilalong yawara me ko nongomang ningi nunguning aruk bore ko, ana ikup duap duap am nangata gisan.

13 Nina ikisan agila, priest alo Kaem ko kawam kako ningi altar awete tama betesan, mu nuna na inang kariimet saki gisan karogo taisan mu sang gi nasan. Se kari suen la kawam mu ningi ura tasan mu betelatala. 14 Se uwutatala, Kari Biya munan imi balu nangaram, kari ari den gilalong yawara apusan, mu kariimet den umutang tasan mu nongote mel am gimonko.
1 Cor 9:14 Ura kari nunga ura koma am tamonko: Mat 10:10; Luke 10:7.


15 Bare ani me ko balukasam. Ale aitak betelatala, ani nina aninga saongalko den imi me bataguru ningarsam. Mena. Ani ura ilusam imi ko koma me tasam mu ko ninguru amilmilasam. Buta se nina aninga saongalko mu ani mesam nunguningkiri! 16 Ani den gilalong yawara apusam mu ko ani agata angimik ko amilmilirikko me terong. Mu awuk, Kari Biya ani ura mu bitirikko aga maonam se betesam. Ani ura mu me bitirik, mu ani agata angimik ko mu memek biya nunguningkiri! 17 E ani agata girem Kaem aru manem ale noko den gilalong yawara apurekko balem ale mu asele, ani ko koma ko kimi betesam ale wore. Bare ani agata angamang te ura me taem. Mena. Kaem kota ura imi ani aisam se iluwasam.

18 Butata se ani koma yawara anape tasam? Mu iwita: ani den gilalong yawara apusam, ale ko koma kariimet nuguting te mel bo me tasam mu ko ninguru amilmilasam. Ani den apura ko kari. Buta se nuguting munan aisimonko mu ko munan ago aniso. Bare ani kariimet nuguting munan me tasam umutang aninga ura ko koma yawara iwita tasam.

Paul kariimet suen la nunga ura kari iwita bagakaso

19 Ani kari bo ko ura dungan kari mena. Bare ani kariimet suen biya te nunga giekko, imikiri suen la nunga ura dungan kari ko aimi betesam.
1 Cor 9:19 Jesus butatala bitakaso: Mat 20:28.
20 Juda nunga ningi, ani Juda nunga giekko Juda kari iwita bagasam. Ani mu Law Den bowa ningi me bagasam. Bare ani kariimet den mu bowa ningi bagasan mu nunga giekko mu tom ani nunga ningi mu ani Law Den bowa ningi iwitata bagasam. 21 Bare sor saki ko kariimet Law Den bowa ningi mena, mu tom ani nunga ningi mu ani nunga giekko Law Den bowa ningi me bagara iwita bagasam. Bare mu ani Kaem ko munan den abiring tusam iwita mena, mu ani Kristus ko munan bowa ningi bagasam. 22 Se kariimet munan saki ko nungamin yena se anisan, mu nunga giekko mu ani munan ikia nuna ikimonko terong mu la betesam. Ani kariimet te nunga giekko ikia lage suen biya betesam, ale kariimet suen la nunga bagara iki karo se arungak bagasam. 23 Kariimet ningi den gilalong yawara mu sokel ago la namurukko ani munan imi suen biya betesam, mu te ani kariimet saki arungu munan yawara yawara den umutang ko baluwoso umutang tanakko.

Ana sokel ago la nagunak ale ko koma yawara tanakko

24 Nina ikisan, kolara tom te kari suen la nagumonko sanamasan ale nagusan, bare suwanta ningi giriso umutang la ko koma yawara taso. Uwutatala nina koma ningo talko sokel ago naguralko.
1 Cor 9:24-27 Ana sail taginak ale munan koma ningo tanakko: Rom 8:13; 13:14; Phil 3:14; 2 Tim 2:4-5; Heb 12:1-3; James 1:12. Paul koma ningo tam: 2 Tim 4:7-8.
25 Kari kolara bibiya te aratomonko, mu nuna nunga bagara ko ninguru sinar tasan, ale nongota pempem nunumi tuaturum betesan. Nuna munan koma yawara tom maiya biya me anirukko mu tamonko uwutata betesan. Bare ana mu munan koma yawara tom suen biya anirukko mu tanakko butata sail tagisan. 26 Buta se ani agata nagusam, mu kuwim ana suen la te nama sanamanakko mu te diram namasam. Ani kagersam agiting sapasam, mu agiting ngual ngual me namoso. 27 Mena. Ani agata angimik guang mosam se aninga ikia la karo tuso. Ani kariimet sang den gilalong yawara nunga manaru lagirik, bare agata mu koma ningo me taik bore ko.

Copyright information for `WSK