1 John 2

O aga kariimet, ani den imi bataguru ningarsam, nina ikial ale udagi memek bo me beteralko. Bare kari bo memek bitiruk, mu anananga Saonga Kari karogo, Kaem ilak bagoso, mu Jesus Kristus, nu kari diram borta anananga memek siwurokko numi tama bita Kaem tuam. Mu ana nago ko la mena, mu ali lilim la ko kariimet nunga memek ko nu kota kumik te munan ningo mu beteram.

Ana Kaem kuring karo tunak mu te asele ana ikinak nunguningta ana noko ikisan. Se kariimet bo agi numi baluk, “Ani Kaem ko ikisam,” ma baluk, bare nu kuring me karo tuso, kari uwuta mu nu kawel kari, se den nunguning nukote mena. Bare awiriya Kaem ko den karo tuso mu nu Kaem ko ninguru kueso. Se munan ana te ikinak ana Kaem ilak bagasan agi mena mu iwita: awiriya baluk, “Ani Kaem ilak bagasam,” mauk, mu noko bagara aolak Kristus ko bagara aolak iwitatala mu asele.

Ana nainimi ko kuenakko

Aga singsang yawara, munan ani bataguru ningarsam imi mu munan iru bo mena. Mu munan ulengkala biya duap te nina ikiman wore ningarsam. Bare mu munan iru iwitatala ani aking bataguru ningarsam, mu iwita: ana nainimi ko kuenakko.
1 John 2:7-8 Jesus munan imi nangaram: John 13:34-35; 2 John 5-6. Munan imi Old Testament tom te ago aniram: Mat 22:37-40.
Se munan mu diram se nunguning mu ana Kristus ko bagara aolak te ikisan, ale anananga bagara aolak te ikisan. Mu awuk, tiromorom mu menaram namoso. Se nikim nunguning mu utu naguram ale nikim kapawoso.

E awiriya balso, “Ani nikim te bagasam,” maso, bare nu ko bo ko me kueso, mu nu am tiromorom ningi bagoso. 10 Awiriya ko bo ko kueso, mu nu nikim te bagoso, se mel bo nu te dagulokko mena. 11 Bare awiriya ko bo ko me kueso, mu nu tiromorom ningi bagoso. Ale nu tiromorom ningi aolak iluso, mu nu aguwaya namoso mu me ko ikiso. Mu awuk, tiromorom biya nu iram se posawoso.

Ana ali imi ko munan mel ko me kuenakko

12 O aga kariimet, Kaem Kristus te nenenga memek siwu saparam.
Buta se ani den imi bataguru ningarsam.
13 Se nina garuk alo, nina Kari duap te nu bagaram aitak bagoso mu ko ikisan.
Buta se ani den imi bataguru ningarsam.
Se nina kulak alo, nina kari memek, Satan, ira kutuwuman.
Buta se ani den imi bataguru ningarsam.
14 O aga kariimet, nina Ba Biya ko ikisan.
Buta se ani den imi bataguru ningarsam.
Se nina garuk alo, nina Kari duap te nu bagaram aitak bagoso mu ko ikisan.
Buta se ani den imi bataguru ningarsam.
Se nina kulak alo, nina Kaem ko den nengemang ningi aniso, se nina sokel ago bagasan; ale nina kari memek, Satan, ira kutuwuman.
Buta se ani den imi bataguru ningarsam.
15 Aga singsang, nina ali imi ko munan ko me kueralko, ale mel suen biya ali imi te mu me ko kueralko. Awiriya ali imi ko kueso, mu nu anananga Nainet Biya ko me kueso.
1 John 2:15-17 Ali imi ko munan se ko mel ko me kuenakko: Mat 6:24; 1 Cor 7:31; James 4:4; 1 John 5:21.
16 Mu awuk, munan suen biya ali imi te ko, o nangamang barasa, namatam tere na, se nainimi patowara ko munan, mu Ba Kaem kote me tairam. Mena. Munan suen la umu ali ewere ko munan. 17 Se ali imi, se ko ikia munan memek memek, mu menaram namawoso. Bare kariimet Kaem kuring karo tusan mu nuna tom suen biya bagomonko.

Ana kariimet Kristus ilak kagersan mu nunga den me ikinakko

18 O aninga kariimet alo, tom nukum aram. Kari aratuk ale Kristus ilak kagerurukko mu nina ko den ikiman.
1 John 2:18-19 Kari Kristus ilak kagerurukko: Mat 24:5,24; 2 Thes 2:3-7; 1 John 4:3; 2 John 7. Kawel kari alo: Acts 20:30.
Se kari mu ko saki Kristus ilak kagersan mu suen biya maingkala aratu gilingiman, se mu te ana ikisan tom nukum aram.
19 Se kariimet saki maingkala nanga beteman. Nuna anananga ningi bagaman, bare nuna anananga saki alo mena. E nuna anananga sikisaki ale mu, nangarak am bagasan ale. Bare nuna nanga beteman mu te ana ikiman, nuna bo ta anananga mena.

20 Bare nina mu Kristus Korang Bur maingkala ningaram, se nina suen la den nunguning ko ikisan. 21 Nina den nunguning me ko ikiman se ani den imi bataguru ningarsam iwita mena. Mu nina den nunguning maingkala ko ikiman, se borta ko ani den imi ninga manorsam. Se nina betela ikisan, den nunguning ningi kawel bo me aratoso.

22 Se kari awuk bore kawel kari? Mu kari balso Jesus mu Kristus
1 John 2:22-23 Jesus mu Kristus se Kari Biya: Rom 10:9-10.
mena ma balso, mu kari borta kawel kari. Se kari umutang mu nu Kristus ilak kagerso. Nu Namar buring tuso ale Nuet ago la buring tuso.
23 Mu awuk, awiriya Namar buring tuso, mu nu Nuet ago la buring tuso. Se awiriya Namar ko gomang ningi nunguning aso, mu nu Nuet ko ago la gomang ningi nunguning aso ale ilak bagoso.

24 Buta se den nina duap te ikiman mu nengemang te ninguru ilukuawuralko. Nina den mu ilukuawural mu asele nina Kaem ko Namar ilak nongorak tom suen biya bagaralko. 25 Ale mel Kristus nangarukko balam mu iwita: nu marak yawara tom suen biya te bagara ko umutang nangarukko mam.
1 John 2:25 Jesus marak yawara tom suen biya te bagara ko mu nangarukko mam: John 3:15; 6:40.


26 Ani den imi bataguru ningarsam mu ani kariimet nina ninga kulurmonko kaeyawasan wore nunga wetang te balsam. 27 Bare nina mu Kristus Korang Bur maingkala ningaram, se nu nengerak bagoso. Se nina ikia ko me tukunang asan. Mena. Mu Korang Bur mel singir biya ko nina ninga kasurso. Se noko den mu kawel mena, mu nunguningta. Buta se Korang Bur ninga kausam wore te Kristus ilukuawuralko.
1 John 2:27 Korang Bur mel suen biya nanga kasurso: John 14:26.


28 Se aga kariimet, Kristus ilukuawural ale ilak bagaralko. Umutang te nu tairukko tom te nina ta, ana ta, nu koma te me dolanakko, sokel ago la sanamanakko. Nina ikisan, Kristus mu diram nunguningkiri. Buta se nina agotala ikisan, kariimet munan ningo diram betesan, mu nuna Kaem ko kuriang ko arataman bagasan.

29 

Copyright information for `WSK