1 John 4

Ana kari Kristus ilak kagersan mu nunga den me ikinakko

O aga singsang, kariimet saki balmon, “Ani Korang Bur ilak bagasam,” mamon, bare nina tairatela me nunga nengemang ningi nunguning arukko! Ninguru nunga ikialko, bur nuna te ura bitawasan mu Kaem kote tairam agi mena agi wore ko nunga ninguru ikial ale asele. Mu awuk, prophet kawel singir biya ali suen la te geragawasan. Se nuna Kaem ko Korang Bur te ura ilusan agi mena agi mu nina te nunga ikialko mu iwita: awiriya balso, “Jesus Kristus kari nunguning ko aratam,” maso, mu nu Korang Bur Kaem kote tairam mu nukote aniso. Bare awiriya Jesus ko uwuta me balso, mu nu Kaem ko Korang Bur nukote mena. Kari maingte tairuk Kristus ilak kagerurukko ko den nina ikiman, mu borta ko bur memek giram ale ali imi te tairam, ale kari iwitata mu nongote aniso.
1 John 4:1-3 Sinar den: 1 Thes 5:21; 1 Cor 12:3. Kari Kristus ilak kagerurukko: 1 John 2:18; 2 John 7.


Bare aga kariimet, nina mu Kaem ko kariimet, ale nina prophet kawel nunga kiaman. Mu awuk, Korang Bur ninga ningi bagoso mu bur memek ali imi ko kariimet ningi bagoso mu kiaram. Prophet kawel alo mu nuna ali ewere ko. Se nuna ali ko mel ko la balsan. Se ali imi ko kariimet mu nononga den ikimonko kuesan. Bare ana mu Kaem ko kariimet. Se kari awiriya Kaem ko ikiso, mu nu anananga den ikiso. Bare kari awiriya Kaem ko mena, mu nu anananga den me ikiso. Umu te ana Den Nunguning ko Kari, Korang Bur, ko ikinak, ale bur kawel den balsan mu nunga ikinakko.
1 John 4:4-6 Kris alo prophet kawel nunga kiaman: 1 John 5:4-5.


Kaem nanga kueso turantala nainimi ko kuenakko

O aga singsang, ana nainimi ko kuenakko. Mu awuk, nainimi ko kuera ko munan mu Kaem kote tairam. Awiriya ko sikisaki nunga kueso, mu nu Kaem ko kuriang bagoso, ale nu Kaem ko ikiso. Bare awiriya ko sikisaki me nunga kueso, mu nu Kaem ko me ikiso. Mu awuk, Kaem mu gomang nangara ko duap.

Kaem ana ninguru nanga kueso mu munan imi te nanga kausam: nu ko Kuriang suwanta nunguningkiri, bare ana te marak nunguning tanakko beteram se ali imi te tai kaparam. 10 Ana nanga nangamang Kaem ko kuera mu katirta. Bare Kaem mu ninguru nunguningkiri nanga kueso, ale ko Namar beteram se anananga memek siwurokko ali imi te tai kaparam ale kueram. Se munan umutang mu nainimi ko kuera ko munan nunguningkiri.
1 John 4:9-10 Kaem ninguru nanga kueso: John 3:16; Rom 5:8-10.


11 O aga kariimet, munan imi te Kaem ninguru nanga kueram. Buta se ana betela nainimi ko kuenakko. 12 Ana bo ta Kaem me aringiman. Bare ana nainimi ko kuesan agi mu, Kaem ana nangarak bagoso, se ana nu nanga kueso mu ninguru ko ikisan ale te saki alo nunga kuesan.

13 Nu ko Korang Bur ana nangaram, se ana te ikisan, ana nu ilak bagasan, se nu ana nangarak bagoso.
1 John 4:13 Kaem ko Korang Bur ana nangaram: 2 Cor 1:21-22.
14 Ana aringiman ale saki nunga manorsan: Kaem noko Namar beteram se ali imi te ko kariimet nunga sangaru taukko tairam. 15 Se awiriya balso Jesus mu Kaem ko Namar maso, mu kari mu Kaem ilak bagoso, se Kaem nu ilak bagoso.

16 Buta se Kaem nago ko kueso mu ana ikisan, ale mel mu ko nangamang ningi nunguning aso. Kaem mu ana kariimet ninguru nanga kueso. Se awiriya ko saki nunga kueso, mu nu Kaem ilak bagoso, se Kaem nu ilak bagoso. 17 Se nainimi ko kuera ko munan mu anananga ningi lagaram namawoso mu te ana Tutera ko Kam Biya mu ko me nguanganakko. Mu awuk, ana ali imi te nanga aolak bagara Kristus ko iwitatala.

18 Nainimi ko kuera ko munan ningi nguangara bo me aniso. Mu awuk, nainimi ko kuera ko munan aratoso mu nguangara menawuso. Nguangara ko duap mu iwita: ana nanga memek koma tanak wore ko nangamin yeneso se nguangasan. Se awiriya nguangoso, mu ana ikisan, nu saki alo kua nungara ko munan kote biyala me aniso.

19 Ana nainimi ko kuera ko duap mu Kaem giram ana kua nangaram. 20 E awiriya balso, “Ani Kaem ko kuesam,” maso, bare nu ko bo ko me kueso, mu nu kawel kari. Mu awuk, kari ko launuria bo ili bagoso mu ko me kua tuok, mu awuk ta nu Kaem yumura te bagoso mu ko kuerukko? Mena. Munan den ana Kristus kote taman mu iwita, awiriya Kaem ko kueso, mu nu ko saki alo ago nunga kuerukko.
1 John 4:21 Munan den Kristus nangaram: Mat 5:43-48.


21 

Copyright information for `WSK