1 John 5

Nanga nangamang ningi nunguning Jesus ko aniso mu te sokel ago baganakko

Awiriya Jesus mu Kristus maso, ale ko gomang ningi nunguning aso, mu nu Kaem ko kuriang bagoso. Se awiriya Ba Kaem ko kueso, mu nu Kaem ko kuriang alo ago nunga kueso. Munan ana te ikinak ana nunguningta Kaem ko kuriang alo nunga kuesan mu iwita: ana Kaem ko kuesan ale ko kuring karo tusan. Nunguningta ana Kaem ko kuesan, mu ana ko munan den karo tunakko. Se noko munan den mu karo tunakko mu ikup mena. Mu awuk, kariimet Kaem ko kuriang ko arataman bagasan, mu nuna ali ko munan memek biriruwumon ale sokel ago bagomonko terong. Mu anananga nangamang ningi nunguning mu te ana ali imi ko munan kiasan ale sokel ago bagasan. Se awiri ali imi ko munan biriruwurok ale sokel ago bagurukko? Mu awiriya gomang ningi nunguning te balso Jesus mu Kaem ko Namar maso borta.
1 John 5:3-5 Ana Jesus kuring karo tunak ale nu te la sokel ago baganakko: John 14:23-24; 16:33; Rom 8:37.


Ana Jesus Kristus mu nu Kaem ko Namar mu ana ko ikiman mu iwita: tom nu yu te anuwa towaram se Kaem balam, “Sumu aninga Kuriang,” mam, aking tom momon se ko gue kapurukko tom pingi aram mu te akingtala balam mu te ana ko ikiman. Se Korang Bur, Den Nunguning Bala ko Kari, mu betela uwutatala nanga kasurso se ikisan. Se kuring ilagala suwan imi den suwanta wore la balsan: bo mu Korang Bur ko kausa nangamang ningi, se bo mu anuwa tom te kuring mu tairam, se bo mu kuerukko tom pingi aram mu te den tairam. Se den mu suen la nanga kasurso Jesus Kristus mu nu Kaem ko Namar.
1 John 5:6-9 Jesus mu Kaem ko Namar: John 1:29-34; 15:26; 17:5; Rom 8:16. Verse imitang agotala arikko: John 5:32-37; 8:18.


Ana den kariimet balsan mu ko nangamang ningi nunguning aso. Bare den Kaem balso mu nunguningta, se ana ninguru ko nangamang ningi nunguning arukko. Se nu Kristus balso noko Namar maso. 10 Awiriya Kaem ko Namar ko gomang ningi nunguning, mu nu ikiso Kaem Jesus ko den balam mu nunguningta. Bare awiriya Kaem ko den mu ko gomang ningi me nunguning aso, mu nu Kaem kawel kari ko balso iwita. Mu awuk, nu den Kaem kota ko Namar ko balam mu ko gomang ningi me nunguning aso ewerete se.

11 Se Kaem den nunguning balam mu iwita: Nu ana marak nunguning tom suen biya te baganakko mu ko Namar te nangaram. 12 Se awiriya Kaem ko Namar ilak wete bagoso, mu marak nunguning mu nukote aniso. Bare awiriya Kaem ko Namar ilak me bagoso, mu marak nunguning mu nukote mena.
1 John 5:12 Jesus kota marak nunguning ko duap: John 3:36; 14:6; 1 John 5:20.


John den ningo saki den nukum te balam

13 Nina kariimet Kaem ko Namar ko nengemang ningi nunguning aram, mu ani den imi bataguru ningarsam, mu nina te ninguru ko ikialko, nina marak nunguning tom suen biya te bagara ko mu Kaem ningaram.
1 John 5:13 John 20:31 ago arikko.


14 Ana ninguru nunguningkiri ko ikiman, ana Kaem ko ikia karo tui se mel bo ko nu manornakko agi mu, nu ko dogowa tagiwoso. Buta se ana Kaem ko me nguangasan. Mena. Ana kote pingi namasan ale isarsan. 15 Ana ikiman, nu anananga ngatangara betesan mu nu suen la ikiso. Buta se ana karogo ikiman, ana anapeya ko aru isarnak, mu nu nangarukkowo.
1 John 5:14-15 Ana nguangara mena Kaem kote pingi namasan: John 14:13-14; 16:23; Heb 4:16; 1 John 3:21-22.


16 Ni ka bo memek bitiruk se arik, se memek nu beteram mu nu me te maga namurukko, mu ni Kaem manaru, asele Kaem marak nunguning ka bo umutang tuokko. Ani kariimet memek owore betesan wore ko la balsam. Memek bo kariimet betemon ale te maga namomonko mu karogo, mu awuk, Kaem memek mu siwura me ikiso. Ani ni imi ko Kaem manaruko me balsam. 17 Munan memek duap duap betesan mu suen la Kaem koma te mu ikup se memek. Bare memek sang kariimet me te maga namasan mu ago.
1 John 5:17 Kariimet giris palagasan, mu Kaem memek mu siwura ikiso. Munan memek saki ko den: Mat 12:31-32; Heb 6:4-6; 1 John 3:14; 5:12.


18 Ana ikisan, awiriya Kaem ko kuriang ko aratam bagoso, mu nu munan memek beteso ale me karogo nama lagoso. Mena. Kaem ko Namar nu ilukuawuso ale ko sinar taso, se Satan nu iluwokko me terong.

19 Ana ikisan, ana Kaem ko kuriang bagasan. Se kariimet Kaem ko kuriang ko iwita me bagasan, mu nunga supuling mu kari memek Satan.

20 Ana agotala ikisan, Kaem ko Namar tairam ale ikia nangaram, ana te Kaem Nunguning ko ninguru ikinakko. Ana Kaem Nunguning ilak bagasan, mu awuk, ana ko Namar Jesus Kristus ilak bagasan. Umutang Kaem Nunguning, umutang marak nunguning tom suen biya te bagara ko mu nangarso.
1 John 5:20 Marak nunguning: John 17:3.


O aga kariimet, nina kaem kawel nibiring tualko.

21 

Copyright information for `WSK