1 Peter 1

Den gira

Ani Peter, Jesus Kristus ko apostle, bare tam gawa imi bataguru nina Kaem ko kariimet Pontus, Galatia, Cappadocia, Asia, se Bithynia ali sor ningi bagasan mu ningarsam. Nina sor awar ko kariimet iwita taiman ale sor mu te bagasan.
1 Peter 1:1 1 Peter 2:10-12 ago arikko.
Kaem girakala biya ikiam, mu nina noko kariimet bagaralko mu ko ikiam, ale ninga giam, ale Korang Bur te kako ninga awuram, nina Jesus Kristus kuring karo tual se ko gue te ninga memek siwurokko.

Se Kaem ko gomang yawara, ko lila yawara ninguru tala ningaruk se te bagaralko.

Bagara yawara Kaem nangarukko balam umu te loaga se baganakko

Ana nanga Kari Biya Jesus Kristus ko Nuet, se ko Kaem tala, wore ko nup patowanakko! Nu gomang biyala nangaram, ale Jesus Kristus kueram bare patowaram mu te ana kariimet iru ko nanga awuram. Se marak sokel nangaram umu te baga se nu nanga giokko mu ko kimi bitawasan. Nu mel ningo ningo nina nego ko duruk wonong te balu beteram se aniso. Se mel umutang mu me karur paguk, me maguruk, ale me mena namurukko. Nina nengemang ningi nunguning aram, se Kaem ko sokel karem iwita ninga sinar towuruk, nama tom nukum te nu wetang te ninga giok se yawarakala bagaralko.

Umutang ko ninguru amilmilaralko! Tom katirta ko nina ikup yaman duap duap gisan ale ko nengemang batagoso agi, bare am amilmilaralko. Mu awuk, Kaem nina ikup gisan mu te ninga nengemang ningi nunguning nungurso burangoso. Nina gold te ikialko. Gold mu am menarukko. Bare kariimet gold ko karur te menawumon se nikim pagukko tama te kaisan kamasan. Bare nenenga nengemang ningi nunguning mu gold kiaram, ale tom suen biya anirukko. Se uwutatala, nina ikup gisan mu te Kaem ninga nengemang ningi nunguning te sokel ago nunguningkiri anirukko nungurso burangoso. Umutang te, tom Jesus Kristus numi wetang te bitiruk mu te, nina nup biya, nikim karogo, se amilmil karogo mu talko.
1 Peter 1:5-7 Ana ikup ningi agi bare Kari Biya nanga sangarso: John 10:28; Pro 17:3; Rom 2:7; James 1:2; 1 Peter 5:10.


Nina nu me aringiman, bare am ko kuesan. Ale aitak me arigisan tala, bare nina ko nengemang ningi nunguning aram. Se mu ko nina ninguru ta nunguningkiri amilmilasan.
1 Peter 1:8 John 20:29 ago arikko.
Mu awuk, nina nu ninga sangaru taukko mu ko nengemang ningi nunguning aram, se nu ninga sangaruwoso.

10 Girakala prophet alo Kaem ko munan aitak nengete aratuwoso imi ko giriman balman. Ale nuna Kaem kariimet nunga sangaru tauk se yawarakala bagomonko mu ko duap ninguru kupukasan.
1 Peter 1:10-12 Kristus ikup giokko den aniram: Psa 22; Isa 53. Prophet alo mel aguwaya aratukko mu ko ikimonko kuakasan, se engel betelatala: Mat 13:17; Eph 3:10.
11 Kristus ko Bur nunga ningi bagakaso, ale girikaso Kristus ikup suen biya giok ale udagi te nup biya nikitang ago taukko mu ko balukaso. Se nuna tom amaruya te, se aguwaya aratukko, mu ko duap ninguru ikimonko karogo kaeyakasan. 12 Se Kaem nunga maonam, den nuna balukasan mu ko nunguning nononga tom te aratukko mu mena, mu nina aitakta bagasan mu ninga den balukasan. Se den mu aitak den gilalong bala ko kari mu Korang Bur duruk wonong te tairam mu ko sokel te ninga manorman se ikiman. Se engel betelatala, nuna mel suen la imi ninguru ko ikimonko kua lagasan.

Kaem mu laili, se ana laili se diram baganakko

13 Umutang ko, nina ninga ikia nungal ale sinar ago bagaralko. Ale Kristus numi wetang te bitiruk ale ikia munan yawara ningimik te bitirukko mu ko ninga ikia nengemang suwan awural, ale mel umutang ko la bagaralko. 14 Nina Kaem ko kuriang baga se kuring karo tualko. Tom nina ikia mena baga se ikia memek te bagakasan umu aitak me karo tualko. Mena. 15 Kaem ninga auram mu nu laili. Se nina betela mel suen biya betesan mu te laili se kako la bagaralko. 16 Kaem ko batoga te balam se aniso iwitatala, “Ani laili nunguningkiri. Se nina betelatala laili nunguningkiri tala bagaralko.”
1 Peter 1:16 Lev 11:44.


17 Kaem nina arusan ale balsan ninga Nenet masan, mu nu kariimet suwan suwan nunga betera kaora diram te la nunga tuterukko. Se umutang ko, tom nina kariimet iwareng iwita ali imi te baga se, mu noko nguanga se aolak bagara diram te la bagaralko. 18 Mu awuk, nina ikisan, nina ninga nenengetak ari nunga munan me ninga sangukko wore te bagakasan, se Kaem munan mu ningi ninga dia tam. Bare nu ali imi ko mel, mena namurukko, gold silver iwita, mu te me ninga diaram. Mena. 19 Nu Kristus ko gue, ko koma kalel biya nunguning, mu te ninga diaram. Kristus mu sipsip gotek bo turan, kumik te karur memek bo mena. 20 Kaem ali me betera la nu giram balu beteram. Bare nu nina nego ko tom nukum imi te asele wetang te beteram. 21 Nu te nina Kaem ko nengemang ningi nunguning aram. Nu kueram, bare Kaem patowaram ale nup biya tuam. Buta se ninga nemetam, ninga ikia, ninga nengemang ningi nunguning, mu am Kaem kote la aniso.

Ana nainimi ko ninguru kuenakko

22 Nina den nunguning karo tuman mu te nina ninga ikia nengemang nungurman, ale nina ninga singsang nunguningta la nunga kuesan. Buta se ninimi ko ninguru kueral ale, ninimi nengemang tua nunguning tala ninimi tualko. 23 Mu awuk, nina aitak Nenet suwanta ko kuriang. Nina kuriang bilangasan iwitata nina kariimet iru ko arataman. Bare nina kuriang nunga nunam nonet nungumik te aratasan iwita me iru arataman. Kuriang umutang baga kuemonko. Bare nina Kaem ko den marak sokel ago tom suen biya anirukko mu te ko kuriang arataman.
1 Peter 1:23-25 Isaiah 40:6-8. Nuna kariimet iru ko arataman: John 1:13.
24 Kaem ko batoga te iwita aniso:

“Kariimet suen la mu sirsir iwita,
sirsir tom katirta baga aking marakoso iwitata.
Se nunga nosokel, nunga nunup bibiya, mu diri wakala iwita,
tom katirta yawarakala baga piriso daguloso iwitata.
Bare Kari Biya ko den tom suen biya ko aniso.”
Se den gilalong bala ko kari den borta ninga manorman.

25 

Copyright information for `WSK