1 Peter 5

Kris kariimet yawarakala nunumi karogo bagomonko

Nina supuling alo, ani ninga den sang balikko. Ani supuling bo tala. Ani agata amatam te Kristus ikup yaman giam mu arigem. Se tom nu ko nikim nup ago mu karogo peleruk tairuk mu, nina se ani agotala te baganakko. Se supuling alo, ani iwita ninga manorsam: Nina Kaem ko kariimet sipsip iwita nunga bitaruwasan, mu ninguru nunga sinar talko. Bare Kaem ko gomang mu nina amilmil ago la ura beteralko, nengemang ikuwa se me beteralko. Aking manga ko mena, bare nenenga nengemang Kaem ko ura iluwalko ninguru aniso umutang ko ura iluwalko. Nina kari bibiya iwita baga se Kaem ko kariimet nina nigiting te nunga awuram mu me nunga bitaru maguwuralko. Mena. Nina yawarakala nama sagaral se nuna mu sipsip iwita negowom karomonko. Se Sipsip Bitua Kari Gira nunguningkiri mu tairuk, mu nina koma yawara, ko nikitang me menarukko, mu gialko.
1 Peter 5:2-4 Kariimet nunga bitua ko munan: John 10; John 21:15-17; Acts 20:28; 2 Cor 1:24.


Se betelatala nina kari kulak alo, mu ninga kari garuk nobowa ningi bagaralko.

Se nina suen la mu nengeta ninimi ira kutuwural ale ninimi saongalko. Mu awuk:

“Kariimet nunumi patowara mu Kaem nunga biriruwuso,
bare kariimet nunumi ira kutuwusan mu nu gomang nungarso ale nunga sangarso.”
1 Peter 5:5 Proverbs 3:34.

Buta se, nina ninimi ira kutuwural ale Kaem ko kuting sokel ago mu bowa ningi bagaralko. Se noko tom te ikiwoso mu te ninga patawu kualala ninga bitirukko. Se nenenga nengemang ikup, se nengemang bataga, mu suen la nukote la bita saparalko, mu awuk, nu ninguru ninga kueso ale ninga sinar taso.
1 Peter 5:7 Nanga Saonga Kari bagoso: Mat 6:25; 11:28-30; Phil 4:6-7; Heb 13:5.


Nina nengeta ninimi bitaru se sinar ago bagaralko. Nenenga kager kari Satan nu lion iwita kari bo moruk naukko niaso ale geragoso. Se nina nengemang ningi nunguning aora biya baga se, nu kaoralko.
1 Peter 5:9-10 Ana Satan karonakko: James 4:7.
Mu awuk, nina ikisan sor suen biya te ninga Kris launuria saki mu nina ikup gisan mu uwutatala nuna gisan.

10 Kaem mu gomang lila se saonga yawara ko duap. Nu Kristus te ninga auram ale ninga giam, nina tom suen biya noko nikitang te ilak bagaralko mam. Se nina tom tukunangta ko ikup gial asele, nu kota ninga giok ninga nungok ale sokel ningaruk se te gek am bagaralko. 11 Sokel suen biya nukote aniso, pempem la. Nunguning.

Den nukum

12 Ani den tukunang imi bataguru Silas tuem se giok ale ago nengete namurukko. Ani ikisam mu nu aninga ura saonga kari yawara. Aninga angamang mu Kaem ko gomang lila ningurutala nangaram ale aguwaya nanga sangarso mu ko ninga manik ale te nengemang sokel tuekko, se den imi batagem. Se nina ko gomang lila umutang te sokel ago sanamaralko.

13 Kris alo Babylon anisan
1 Peter 5:13 Babylon maso mu Rome ko balso agila. Tom mu te Rome sor suen biya nunga bitaruwakaso, ale tom sang Kris alo ninguru nunga bita maguwukaso.
, Kaem agotala nunga balam noko kariimet mam, mu nunga amilmil den ningarsan. Se aninga kuriang Mark
1 Peter 5:13 Mark mu Peter ko kuriang nunguning mena, bare ura ningi noko kuriang iwita aratam.
agotala ko amilmil den ningarso.
14 Ninimi ko kua se ninimi nigiting iluwalko.

Nina suen la Kristus te bagasan, mu lila yawara nengerak bagurukko.

Copyright information for `WSK