1 Thessalonians 2

Paul Thessalonica wonong ningi ura beteram ko dugu duap

Aga singsang, nina ikisan, ana nengete namaman ura beteman mu ko nunguning mena iwita mena, mu ko nunguning ago. Nina ikisan, ana Philippi wonong te ninguru nanga bita maguwuman, se nangamang yaman iki se nina nengete Thessalonica namaman. Ale nengete sumu te kari sang nanga bita maguwumonko mu agotala.
1 Thes 2:2 Nuna Paul ko sikisaki arungu nunga bita maguwuman: Acts 16:19 - 17:10.
Bare anananga Kaem sokel nangaram se ana noko den gilalong yawara ninga manarukasan.

E ana Kaem den balu lagasan imi mu kawel sang karogo agi, nangata nainip ko agi, kariimet nunga kulurnakko agi, den me balsan. Mena. Kaem maingkala nanga ikiam, ana den gilalong yawara balnakko terong maman mu ikiam, ale ura imi nangaram. Se ana den balsan imi mu kariimet nago ko kuemonko me karogo kaesan. Mu ana Kaem nanga ura ko amilmilurukko bore ko karogo kaesan. Nu anananga ikia nangamang mu ari ikiwoso.

Nina ikisan, ana nina nengemang kulukua ko den bo me balukasan. Mena. Se Kaem kota agotala ko ikiso, ana nengete manga mel ginakko kawelakasan ale ura me ilukasan. Ana nina agi, saki alo agi, nainip patawomonko mu ko ura me bitakasan.
1 Thes 2:3-12 Ura nunguning iluwa ko munan: Gal 1:10; John 5:41,44; 10:11; Acts 20:33-35.


Ana ninga ningi Kristus ko apostle bagakasan. Ale umutang ko ana nengete na inang mel mu am ginak ale ikup ningarnakko. Bare buta mena. Tom ana nina nengerak baga se mu, ana munan lila te ninguru ninga sinar tokasan, imet ko kuriang gotektek nunga sinar taso iwitatala. Buta se, ana Kaem ko den gilalong yawara ningarukasan mu ko ninguru amilmilakasan. Bare mu la mena. Ana nina nego ko am kuenakko mu ko bagakasan. Mu awuk, ana nina ninguru ninga kuakasan.

Aga singsang, nina anananga ura kowar nina ningi baga se ilukasan mu nina ko ikisan. Ana nenenga na inang se manga mel mu taginak ale ikup ningarnakko me kuakasan. Mena. Umutang ko, ana Kaem ko den gilalong yawara ninga manaru se mu, turom woremkalal nangata nangimik ko ura sokel ago la bitakasan.

10 Nina nengeta ikisan, se Kaem agotala ko ikiso, ana nina Kris alo ninga ningi baga se mu, munan memek bo me bitakasan, ana munan kako diram mu la bitakasan. 11 Mu nina ikisan, kuriang nunga nonet alo munan nunga kuriang te nunga sinar tasan mu turan tala, ana nina suwan suwan ningimik te bitakasan. 12 Ana nengemang ira se sokel tui se ninga manarukasan, nina bagara aolak Kaem ko kueso mu la te bagaralko makasan. Mu awuk, Kaem nina ninga auram, nina noko kuwim nikinang ago mu te ilak bagaralko.

13 Ninga munan bo tala ana tom suen biya ko Kaem amilmil tusan, mu iwita: ulengkala, tom nina ana nagiring te Kaem ko den ikiman, mu nina balman, “Imi kari nunga den mena, imi Kaem ko den nunguning,” ma balman, ale nengemang ningi beteman. Kaem ko den mu sokel ago la nina Kris alo ninga nengemang ningi ura iluwoso.

14 Aga singsang, munan koma suwanta Kaem ko kariimet Judea ningi bagasan bare nongote giram aratam, mu nengete aratam. Nuna Jesus Kristus ko nongomang ningi nunguning aram mu ko nunga gue suwan Juda alo nuguting te memek tokasan. Se koma suwanta tala nina ninga ali sor suwan nuguting te memek tokasan.

15 Juda alo Kari Biya Jesus se prophet alo nunga moman se kueman, ale ana karogo nanga karo gilingiman. Nunga munan betesan mu Kaem me ko amilmiloso. Nuna kariimet suen la nongorak kager betesan. 16 Ale ana den gilalong yawara sor saki ko kariimet nunga manorsan, nuna te Kaem nunga giokko, bare nuna ana namake kalomonko ago kaesan. Se munan mu te nuna memek betesan se laga ago kaeyawoso. Bare Kaem ko gomang magara aitak nongote beteram se aratam.

Paul Thessalonica alo aking nungarkukko gomang anikaso

17 Aga singsang, ana tom tukunangta ko nenenga bita taman ale bagakasan. Bare ana nina nego ko nangamili me sapakaso. Ana nina nego ko ninguru nangamang batagakaso. Se tainak ningarkanakko ago kaeyakasan. 18 Ani Paul tom suen biya nengete tairikko ago kaeyakasam. Bare Satan anananga lage kalokaso. Ana nangamang biyala nengete tainakko. 19 Mu awuk, tom udagi nanga Biya Jesus Kristus peleruk se koma te sanamanak, mu ana anape ko amilmilanakko? Mu nenengeta anananga ura ko nunguning, se ana nenenga te ira sanamanak ale ninguru amilmilanakko. Nina anananga ura ko nunguning bagasan, se ana nego ko ninguru amilmilasan.

20 

Copyright information for `WSK