1 Timothy 3

Supuling alo nunga den

Den imi mu den nunguning: Awiriya pastor ko bagurukko kueso, mu nu ura yawara ko kueso.
1 Tim 3:1-5 Supuling alo nunga den: Acts 20:28; Titus 1:6-9.
Bare noko bagara mu am diram nunguningkiri mu asele nu ura mu giokko. Nu ko nuwus suwanta, nu kota ko aolak bagara ko sinar taso, ikia ningo la karo tuso, ale kilek diram la beteso. Nu kariimet iwareng taisan mu nunga giso ale ko kawam te nunga sinar taso. Nu kariimet Kaem ko den nunga kausokko terong mam. Nu yu nana ngualara ko kari mena. Betela nu gomang tairate magara ko kari mena, se den tagi gurugumura ko kari mena tala. Bare nu munan ekes ekes te kariimet nongorak beteso. Agotala manga biya taukko gomang me aniso. Nu ko nuwus kuriang yawarakala nunga sinar taso, se ko kuriang ko den ikisan ale kuring bowa ningi bagasan. E kari kota ko nuwus kuriang nunga sinar taukko me terong, mu nu awuk ta Kris alo suen la nunga sinar taukko? Mena.

Se kari iru la giris palagam ale Kris kari ko aratam, mu nu pastor ko aratukko mu me terong. Mu awuk, nu ura mu te numi patawuruk se Satan memek tam turantala memek tauk bore ko se. Aking kari pastor ko aratukko mu nu kariimet Kris mena mu nongoma te nup ningo la bagoso mu asele pastor ko aratukko. Umutang mu nu kumik dolara mena se Satan ko dagarok ningi me dagulokko.

Kariimet nunga saonga kari alo nunga den

Uwutatala, Kris nunga saonga kari mu nuna bagara aolak diram te la bagomonko. Nuna nungamili sorang ilagala mena. Nuna yu nana ngualara ko kari mena tala. Ale nuna manga mel gimonko ikia tawun biya me nunga morukko. Nuna [memek bo mena, ikia diram mu te la baga se / mu la karo tui se / nongomang karur mena ...] den nunguning (yumura te aniram wore) Kaem (wetang te) ana Kris alo nanga kausam mu nongomang ningi nunguning te ninguru ilukuawumonko. 10 Buta se giral ale nunga bagara aolak ninguru tuteral ale ikialko. Nuna terong mamon agi mu asele nuna saonga ura am gimonko.

11 Se betela nunga imet ari mu nunga bagara aolak diram nunguningkiri.
1 Tim 3:11 Bala bo mu iwita: Uwutatala, ura saonga imet alo mu nunga bagara diram nunguningkiri mu asele ura gimonko. Phoebe: Rom 16:1.
Nuna saki alo me nunga balu maguwumonko. Mena. Nuna ikia ningo se kilek ningo mu la betemonko. Ale kawel bo mena, ura suen biya mu diram la betemonko.

12 Kari saonga kari ko bagurukko mu nu nuwus suwanta. Se nu ko nuwus kuriang yawarakala nunga sinar tauk, se nuna nu bowa ningi la bagomonko. 13 Se saonga kari alo nunga ura yawarakala betemon agi mu, kariimet nunga kuemon, ale nunup patawomon, se nuna Jesus Kristus ko den gilalong yawara balmonko mu sokel ago la balmonko.

Kris alo den nunguning ilukuawumon te bagomonko, ko Paul Timothy maonam

14 Ani tom katirta tairik karkikko mu ko angamang aniso. Bare ani tairate me tairik agi, umutang ko ani Kris alo munan aguwaya te bagomonko mu ko den ikiko ani den imi bataguru kisisam. Ana Kris alo mu ana Kaem marak bagoso wore ko kariimet. Nu ana den nunguning nangaram, se ana ilukuawusan ale saki alo te nunga manorsan. Ana ninguru ikisan, den nunguning yumura te aniram bare aitak Kaem nanga kausam mu ko ikia maiya biya nunguningkiri!

  • Nu Kaem bare nu kari ko aratam se aringiman.
Se Korang Bur anananga kausam nu kari diram nunguningkiri.
  • Engel alo nu aringiman.
Se kariimet noko den sor suen biya te balman.
  • Ali imi te kariimet nu ko nongomang ningi nunguning aram.
Se aking nu nikitang nup biya ago duruk wonong te nama tarigiram.
1 Tim 3:16 Kari Biya Jesus Kristus: John 1:1,14; Rom 1:4; 1 John 5:6-7; Eph 3:10; 1 Peter 1:12; Mark 16:19. Phil 2:5-11 ago arikko.

16 

Copyright information for `WSK