1 Timothy 6

Ura dungan kariimet nunga munan den

Ura dungan kariimet suen la mu nunga kari bibiya nunga nguangomon, ale nobowa ningi la bagomonko. Umutang te kariimet sang Kaem ko nup se ko den ana ninga kasursan mu me balu maguwumonko. Se ura dungan kariimet nunga kari biya Kris kari agi mu, nuna balmon, “A, ana Jesus Kristus te launuria, se ana noko kuring am batagornakko,” uwuta ma me balmonko. Mena. Nuna iwita balmon, “Nu anananga launuria yawara, se ana ninguru noko kuesan,” ma balmon, ale ko ura am diram la ilu tumonko. Se ni munan ewerta ko nunga manaru se karo tumonko.
1 Tim 6:1-2 Ura dungan kariimet: Eph 6:5; Titus 2:9-10; Philemon 1:16.


QQQ Manga tawun biya ko kuera ko munan

Nanga Biya Jesus Kristus ko den nunguning mu bagara aolak Kaem ko kueso mu ko nanga manarso. Se awiriya den mu buring tuso, ale den kawel kariimet nunga manarso, mu nu supuling lagara kari, ale mel bo ta ninguru me ko ikiso. Nu den tagirok gurugumurok, ale den ko nunguning aguwaya mu nu la balukko ko kueso. Se ikia nu beteso mu ko nunguning iwita kariimet nunga ningi aratoso: nunumi nongomang maguwura, nunumi paoga kirker awura, den memek nunumi maona, nunumi ko iki paguwura, se tom suen biya nunumi karogo den tagi gurugumu lagara. Kariimet uwuta betesan mu nunga ikia nguala muruwuram, se den nunguning bo nongote mena.

Nononga ikia mu nuna Kaem ko den saki alo nunga kasurmon ale te manga gimon ale kariimet nungumik mel ago ko bagomonko, iwita ikisan.

/ Traim: Nononga ikia (te) mu, Kaem ko munan karo tua mu lage nuna te manga gimon ale kariimet nungumik mel ago bagomonko, iwita ikisan.

Bare kariimet nongota nunga mel ago bagasan mu ko ikisan “terong mam” ma se Kaem ko munan karo tusan, umutang mu asele nuna kariimet nungumik mel ago nunguning. Mu awuk, tom ana bilangasan, mu ana mel bo gisan karogo ali imi te me aratasan. Se aking tom ana kuesan ale ali imi betesan, mu ana mel bo gisan karogo me namasan. Buta se ana guang mel, se na yu ago bagasan agi mu, ana “terong maman” manak, ale karogo amilmilanakko.

Bare kariimet mel suen biya gimonko nunga nongomang aniso, mu nuna ira ariga suen biya te dagulasan, madar mel mutim ningi daguloso iwita dagulasan. Mu awuk, nuna mel suen biya ko nongomang nomotam barasoso, se umutang ko nuna kilek memek duap duap betesan, ale eng te nama memek arigisan. 10 Manga ko kuera ko munan mu ikia kilek memek singir la ko duap. Kariimet saki manga ko tawun biya ko kuakasan, se kilek umu nunga tagiram se den nunguning nubiring tuman ale ikup yaman tawun biya giman.
1 Tim 6:6-8 Mel ago agi mena agi wore am amilmil te terong la: Pro 30:8; Phil 4:11-12; Heb 13:5.


Timothy diram la bagurukko Paul den maonam

11 Bare ni Kaem ko kari, se kilek memek umutang suen la biring tui ale kilek diram imitang gemang tuiko: bagara aolak diram, Kaem ko kua se ilak lagara, se gemang ningi nunguning, se nainimi ko kuera, se gemang sail ago la baga se ikup gia, se munan lila te saki alo arungak bagara ko, munan suen la imitang gemang tuiko. 12 Kager kari sokel ago sanamoso iwitata, ni gemang ningi nunguningkiri te sokel ago sanamir ale marak yawara pempem la te bagerko mu ilukuawurko. Maingkala la Kaem ni marak yawara toko ka auram, se ni ka gemang ningi nunguning mu kariimet suen biya nomokete balem.

13 Buta se Kaem mel suen biya marak nungarso mu ko koma te, se aking Jesus Kristus den nunguning wetang te Pontius Pilate maonam
1 Tim 6:13 Jesus den nunguning wetang te balam: John 18:36-37; 19:11.
wore ko koma te, ani den imi sokel ago ka manorsam:
14 Den nunguning ikiem mu nikate memek bo mena, am diram la karo tui eng nama tom nanga Biya Jesus Kristus te tai aratukko. 15 Kaem nu tom ko ikiwoso mu te asele bitiruk se wetang te tairukko.

Kaem nu amilmil ko duap, lila te yawarakala bagoso, ale nu kota mel suen biya bitarso. Nu king suen la nunga King Biya, ale kari bibiya suen la nunga Kari Biya.
1 Tim 6:15 King suen la nunga King Biya: Rev 19:16.
16 Nu kota suwanta me kuerukko. Nu nikinang biya nunguningkiri te bagoso, se ana bo kumik duap te namara ko me terong. Kari bo ta nu me arigam, ale betela kari bo nu arigokko me terong. Se nup biya, se sokel nukote pempem la anirukko! Nunguning.

Kariimet nungumik mel ago nunga den

17 Kariimet ali imi te nungumik mel ago, mu iwita nunga manaruko, nuna mel mu te nusupuling me lagurukko. Ale mel ko magara tairate ko mu nongomang me tumonko. Mena. Nuna Kaem ko la nongomang ningi nunguning arukko. Mu nu kota ana mel kasik biya te amilmilanakko nangarso.
1 Tim 6:17-19 Mel ko magara tairate ko mu nangamang me tunakko: Mat 6:19-21; Luke 12:20.
18 Iwita nunga manaruko, nuna kilek ningo ninguru tala betemon, ale nongota nunga manga te ura yawarakala betemon, ale amilmil ago la nunga melmasak pakakomon ale saki alo te nunga sangarmonko. 19 Mu te nuna melmasak tom suen biya karogo bagomonko wore duap beteman bolala awusan. Ale nuna marak yawara pempem la te bagomonko mu tamonko. Se marak yawara umutang mu am mel nunguning.

Den nukum / Timothy ura ninguru bitirukko Paul maonam

20 Timothy, ni ura Kaem kisam wore ko ninguru sinar toko.
1 Tim 6:20 Timothy: 1 Tim 4:7; 2 Tim 1:14.
Kariimet ikia kawel duap duap balsan, ale ko balsan ikia biya masan, ale den tagi gurugumusan, bare biring nungaruko. Mu ikia nunguning mena.
Kariimet saki ikia umutang taman ale nongomang ningi nunguning mu sapa gilingiman.

Kaem ko gomang lila nina suen la nengete anirukko.

21 

Copyright information for `WSK