2 Corinthians 10

Apostle nunguning alo Kaem ko sokel te ura bitakasan

Kari saki ani angimik ko den iwita balsan: “Tom nu ana nangarak, mu nu numi ira kutuwuso ale baga, tom nu nama awar mu tam gawa te den aora biya nangarso.” Bare Kristus bitakaso iwitata, ani Paul aimi ira kutuwusam ale lila te iwita ninga manorsam: Nina yawarakala bagaral, se ani nengete tairik mu den aora bo me ninga manikko. Bare kariimet saki anananga balsan ana ali imi ko munan te geragasan masan mu asele ani tairik ale den sokel ago la nunga manikko.
2 Cor 10:2 Paul mu nu kariimet nunga bagara aolak te iki se ura mel bitakaso: 1 Cor 4:21.


Mu awuk, ana ali imi te bagasan, bare ana ali imi ko munan te me kagersan.
2 Cor 10:3 Kris alo nunga kager ko mel: Eph 6:10-18.
Se kager ko mel ana ilusan ale te kagersan mu ali imi ko mena tala. Mu Kaem ko, se sokel karogo. Se ana te kuwim gek am Satan te bagoso mu kulukurnak ale ningi kasu kapanakko mu terong maman. Kariimet Kaem ko ikimon bore ko, ikia munan kawel, nunumi patowara ko munan, se den te nunumi ko por kalo gilingisan. Bare ana Kaem ko sokel te por mu parasuwusan. Ale nononga ikia, nunga nongomang gurugu Kristus ko ikia la karo tumonko betesan. Se nina Kristus ko ikia ko gomang karo tuiwaral se aringinak, umutang te awiriya ninga ningi Kristus kuring me karo tuok se aringinak mu te giris palagukko memek tunakko.
2 Cor 10:6 Hebrews 12:5-6 ago arikko.


Nina mel wetang te mu la ari se tutesan, ale mel ko duap nunguning ari se te me tutesan!
2 Cor 10:7 Ana mel diram la tutenakko: John 7:24.
Ikialko! Awiriya numi ikiso nu Kristus ko kari bagoso, mu aking ikiok, ana mu nu turantala Kristus ko kari bagasan tala.
Kari Biya ana ura imi ko supuling ko nanga beteram ale sokel nangaram. Bare mu ana te sokel ningarnakko, mu me te ninga maguwunakko. Se ani ura umutang ko amilmilasam ale ko balu lagasam agi, bare ani umu ko me dolirikko.

Bare nina ikial ale ani tam gawa te nguangara ningarikko ago kaesam iwita me aga ikialko. 10 Kariimet saki ani iwita ko aga balsan: “Paul ko tam gawa mu den sokel ago ikup la. Bare nu kota nangate taiso se arigisan mu nu kari yam iwita arigisan. Se ko den mu betela mel yam tala.” 11 Bare kariimet umutang am iwita ikimonko: anapeya den, tom ana awar baga se tam gawa te ninga manorsan, mu tom ana nengete tainak nengerak baganak mu te betenak se arigalko.
2 Cor 10:11 2 Corinthians 13:2, 10 ago arikko.


12 E kari nongota nunup patawuwasan mu nuna kualala biya se ana mu awuk ta nangata nainimi kualala patowanak ale arungak wete ko? Mena! Bare nuna mu nongote ikia sinar mena! Mu awuk, nuna nongota nunga ikia te nunga bagara aolak tutesan. Ale nongota nongota nunga ningi la nunga bagara aolak tutia gilingisan.

13 Bare ana mu Kaem ura saki me nangaram wore yam te me nangata nainimi patowanakko. Ana Kaem ura nangaram wore te la nangata nainimi tutenak ale ko balnakko. Se nu kota balam se ana ninga ningi ura iluwasan.
2 Cor 10:13 Romans 12:3 ago arikko.
14 Ale ana buta betesan mu munan diram. Mu awuk, ana ta giriman ale Kristus ko den gilalong yawara ago nengete namaman. E ana nengete me taiman ale, mu ana diram me betesan ale.

15 Ana mu kari saki ura iluman se ko nunguning kaparam mu te me nainimi patowasan. Mena. Ana Kaem ura nangaram ale betenakko balam mu te diram betesan. Anananga nangamang mu nenenga nengemang ningi nunguning sokel ago aratuk se ana ninga ningi ura ninguru betenak se nama laga kapurukko. 16 Asele ana sor saki nina nibiring ko, kari sang me ningi ura iluwara, wore ningi namanak ale den gilalong yawara apura ko ura betenakko. Mu awuk, ana sor bo te kari bo maingkala te ura betera se aniso mu te namanak ale te nainimi patowanakko nangamang me aniso.
2 Cor 10:15-16 Paul ko gomang: Rom 15:20.
17 Bare “awiriya amilmilurukko kaeso, mu nu Kari Biya ko la amilmilurukko.” Mu awuk, kari kota numi patawoso mu, kari mu Kaem koma te nup ago iwita mena. Bare Kari Biya kota kari bo ko nup patawoso, mu kari umutang mu nup ago.
2 Cor 10:17-18 Nangata nainimi me patowanakko: Pro 27:2; 1 Cor 1:31; 3:7; 4:4-5.


18 

Copyright information for `WSK