2 Corinthians 13

Corinth alo nongomang ningi nunguning ko sinar tamonko den

Aitak aninga tom ilagala suwan ko nengete taisam. Munan den te baluwoso iwitata, “Kari ilagala agi, ilagala suwan agi, bo den te atumumon umutang te asele ana ikinak den mu nunguningta manakko.”
2 Cor 13:1 Deuteronomy 19:15.
Se ani aga tom 2 mu te nengerak baga se den ninga manem, mu aking aitak awar baga se ninga manorsam: Ani nengete tairik, mu ani kariimet ulengkala memek bitakasan se nunga saki agotala, mu ani yam amatam la nungarkiwirik se memek me betemonko, mu ani ining nungarikko. Mu nina ningamin tuguwasan, Kristus ani agiring te munakawoso agi mena wore ikialko karogo kaesan. Se tom mu te ko ikialko. Kristus mu ninga ningi sokel ago me ura iluwoso iwita mena, nu sokel ago la ninga ningi bagoso. Nu kari sokel mena wore turan tam kangono te tagiman,
2 Cor 13:4 Jesus kari sokel mena wore turan aratam: Phil 2:7-8.
bare nu aitak Kaem ko sokel te marak bagoso. Se ana nu turantala nasokel mena, bare ana Kaem ko sokel te nu ilak baga se ninga sangornakko.

Nengeta ninimi ko ikialko, nina nunguningta nengemang ningi nunguning te bagasan agi mena agi mu ko ikialko. Agi nina Jesus Kristus ninga nengemang ningi bagoso mu me ikisan e? Bare nu nengemang ningi mena agi, mu asele nina Kris nunguning mena. Bare aninga angamang nina ana Kristus ko ura kari nunguning bagasan mu ko ninguru nanga ikialko.

Ana pempem Kaem aru ngatangorsan, nu ninga sanguk se memek me beteralko ngatangorsan. Bare ana kariimet ninga bagara aolak aringimon ale nanga balmon ura kari ningo ma nanga balmonko uwutata me betesan. Mu anananga nangamang nina munan diram la beteralko se ko Kaem ngatangorsan. Bare ana mu ura kari ningo agi memek agi ko nanga balmon agi, mu mel yam. Mu awuk, ana den nunguning maguwunakko mel bo me betenakko. Mena. Ana den nunguning ko ura la betenakko. Ana nasokel mena baganak agi, bare nina mu nesokel ago bagaral, mu ana ko amilmilanakko. Ana tom suen biya nina Kristus ko munan te sokel ago la lagaralko Kaem ngatangorsan. 10 Umutang ko, ani awar baga se den imi bataguru ningarsam, mu te tom ani nengete namirik, mu ani Kari Biya sokel aisam mu te den aora alis ago me ningarikko. Nu sokel aisam mu ani te ninga nengemang ningi nunguning sokel tuekko aisam, mu te ninga maguwurikko me aisam, mena.

Den nukum

11 Aga singsang, ani den nukum kalem ale amilmil ningarsam, ninga bo bagaralko. Nina diram la bagaralko sail tagiralko. Aninga den ningarem mu karo tual ale ikia suwanta te se lila te bagaralko. Se Kaem, gomang nangarso ale lila nangarso, mu nengerak bagurukko.

12 Ninimi nigiting iluwal ale amilmil den ninimi tualko. 13 Kris kariimet suen la imi te mu amilmil den ningarsan.

14 Se nanga Biya Jesus Kristus ko saonga yawara ningaruk, se Kaem ko gomang lila ningaruk, se Korang Bur nina suen la nengerak biguwura suwanta bagurukko. Nunguning.

Copyright information for `WSK