2 Corinthians 3

Paul se ko saki ago mu munan den iru Kaem Kristus te nangarak kaolam wore ko den bala ko kari

Ana butata balsan mu ko nina ikisan ana nangata nainip patowanakko aking duap beteman iwita ikisan e?
2 Cor 3:1 Nuna nongota nunup me patawukasan: 2 Cor 5:12; 12:11.
Bare mu uwuta mena. Mu ura kari saki ninga ningi den apumonko namasan mu, tam gawa nuna nunga ura ningo maso mu ninga kasursan asele nina nunga ikisan. Se ana mu tam gawa uwutata mu ninga kasurnak asele nanga ikialko e? Agi ana ninga isarnak se nina tam gawa nanga ura ningo maso mu bataguru nangaralko e? Mena tala.
Tam gawa ana nanga ura ningo ma balso mu nenengeta. Tam gawa umutang mu ninga nengemang motam te batogam, se kariimet suen biya am kaumon ale ikimonko. Ale ninga bagara aolak mu te iwita ninga ikimonko, nina mu Kristus kota kote tam gawa bo tairam iwitata bagasan. Se tam gawa tairam umutang anananga ura ko nunguning.

Bare Kristus tam gawa batogam mu ink te, agi manga biling awete me garek iluwam. Mena. Mu nu Kaem marak bagoso wore ko Korang Bur te nengemang motam ningi batogam.
2 Cor 3:3 Girakala Kaem ko Law Den manga biling awete batogam ale Moses tuam, bare munan den iru mu uwuta mena: Jer 31:31-34; Ezek 11:19-20; 36:26-27.


Ana Kristus te Kaem ko nangamang ningi nunguning aram se anananga ura ko uwutata balsan. Ana nangata ikia ago se sokel ago se ura umu betesan ma me balsan. Bare Kaem kota sokel nangarso se ura betesan. Nu Kristus te munan den iru kariimet arungu kaolam, ale ana den mu ko ura kari baganakko sokel nangaram. Se den ana balsan mu Law Den batagorman se aniso mu iwita mena, bare mu Korang Bur ko ana balsan. Mu awuk, Law Den mu kariimet te nama kuesan. Bare Korang Bur mu tom suen biya kariimet marak sokel nungarso.
2 Cor 3:6 Kaem Kristus te munan den iru nangarak kaolam: Jer 31:31-34; Mat 26:28; 1 Cor 11:25. Mu anananga memek siwura ko balso. Bare Law Den mu ana munan den suen la karo tunakko balso. Munan den motam motam se munan den iru: Rom 7:6; Heb 8:6-13.


Munan den iru Kaem nangarak kaolam mu ko nikim biya nunguningkiri

Law Den Kaem manga te batogam se te nama kuesan, mu Kaem ko nikim biyala ago aratam. Se Moses den mu kariimet nungaru se mu, noko koma motam nikim biyala, se kariimet aringimonko me terong. Bare aking nikim mu mena mena namakaso.
2 Cor 3:7-8 Moses: Exo 34:29-35. Kaem ko Korang Bur nangarso: Gal 3:2,5.
Bare munan den iru Kaem nangarak kaolam mu te Kaem ko Korang Bur nangarso mu ko nikim biyala nunguningkiri! Law Den an kariimet te den ningi kapakasan mu nikim ago. Bare munan den iru kariimet te ningo diram ko aratasan mu ko nikim mu biyala nunguningkiri! 10 Se aitak ana Law Den giringila mu ko nikitang mu sokel mena iwita arigisan. Mu awuk, munan iru ko nikitang mu sokel ago nunguningkiri! 11 Law Den tom tukunangta ko aniruk eng menarukko mu ko nikinang ago. Bare munan iru tom suen biya anirukko mu ko nikitang mu biyala nunguningkiri!

12 Ana uwutata ikisan. Buta se ana me nguangasan, wetang te biyala balsan. 13 Ana mu Moses beteram iwita me betesan. Nu mu Israel kariimet noko koma motam nikitang te mena namawakaso wore aringimon bore ko, guang koma te iram. 14 Bare ko kariimet agotala nunga ikia, nunga nongomang motam sisiram, nomotam posaram, guang nomoke motam te ira mura se anira iwitata. Se eng tai aitak, tom nuna Law Den kausan, mu ko nunguning ninguru me ikisan. Mu nuna guang nomoke te ira iwita.
2 Cor 3:14 Israel alo: Rom 11:7,25.
Bare kari giris palagoso ale Kristus ko ikiso umutang te asele, Kari Biya kari mu koma motam te guang bilik mu kutuwu saposo.

15 Nunguningta, aitak tom imi te ta, mu tom nuna Moses ko den kausan, mu guang bilik mu am nunga nongomang motam ereso tala. 16 Bare awiriya giris palagoso Kari Biya bowa ningi taiso, mu Kari Biya guang mu kutuwu taso. 17 Se Kari Biya ani ko baluwasam mu Korang Bur borta.

Se Kari Biya ko Korang Bur kari bo kote aniso, mu kari mu munan aora bo nu me kaolam ilak bagoso, nu yawarakala bagoso.
2 Cor 3:17-18 Ana Kristus te yawarakala bagasan: John 8:32,36; Rom 8:21,29; Gal 5:1. Kristus ko nikitang: 2 Cor 4:4, 6.
Se ana Kris kariimet, mu ana suen la guang bo namake te me ereman se aniso. Se ana Kari Biya ko nikinang mu nangate biyala kaposo, se ana ari se, ari se, namawa eng am nu iwitatala aratanakko. Kari Biya ko Korang Bur mu ura uwutata beteso.

18 

Copyright information for `WSK