2 Corinthians 5

Kaem nangimik guang iru nangarukko

Ana ikisan, ali imi ko nangimik guang imi mu kawam sasal ali imi ko wore turan. Se tom parasa namuruk mu, anananga nangimik guang iru duruk wonong te mu karogo. Se mu kawam nunguning turan, kari nuguting te kaola iwita mena, mu Kaem kota nungam, se mu marak tom suen biya anirukko.
2 Cor 5:1-4 Kaem nangimik guang iru nangarukko: Rom 8:23; 1 Cor 15:42-44, 48-49, 53.
Se aitak imi te mu, ana nangamang nia se, nangimik guang duruk wonong ko mu nanga guang iwita nagunakko nangamang biyala aniso. Mu awuk, nangimik guang mu nagunak umutang te, ana nangimik guang mena iwita me baganakko, ana nangimik guang yawara karogo baganakkowo.

Se tom ana ali imi ko sasal ningi bagasan, mu ana ikup nanga ereso se nangamang nia se bagasan. Mu ana nangimik guang ali imi te ko mu kutuwu sapanakko mu ko me niasan, mena. Bare ana duruk wonong ko guang wore tanak ale nagunakko nangamang biyala aniso. Se nangimik guang kuera ko imi mu menaruk se nangimik guang tom suen biya anirukko mu aratu nangarukko. Mu awuk, Kaem kota ana nago ko uwutata balu beteram se aniso. Ale Korang Bur nangaram, ana nu te iwita ikinakko, Kaem den nanga maonam mu uwutata aratukkowo.

Buta se ana tom suen biya nangamang sokel ago bagasan. Ale ana ikisan, tom ana nangimik guang ali imi ko mu te bagasan, mu ana Kari Biya ko wonong te ilak me bagasan. Anananga bagara ali imi te mu, ana mel me arigisan wore ko nangamang ningi nunguning aram se te bagasan. Ale ana nangamang sokel ago bagasan. Ana nangimik guang imi kutuwu betenak ale Kari Biya ilak baganakko nangamang biyala aniso. Bare ali imi ko nangimik guang imi te agi, nu ilak umu te agi, bare anananga nangamang mu tom suen biya munan nu ko kueso mu la betenakko. 10 Mu awuk, ana suen la Kristus koma dugu te sanamanak se nu nanga tuterukko. Se ana suwan suwan, ali imi te ko nangimik guang te munan bitakasan, ningo agi memek agi, mu te diram la ko koma tanakko.

Kariimet nunga gia ale Kaem koma dugu te nunga awura ko den

11 Buta se ana Kari Biya ko la nguangasan. Ale umutang ko ana kariimet nongomang ningi nunguning arukko ago kaesan. Ana Kaem ko nangamang ningi nunguning te ura bitawasan mu nu ninguru nanga ikiwoso. Se aninga angamang mu nina betelatala ana ninguru nanga ikialko. 12 Nina ikisan, ana buta balsan mu ana nangata nainimi te patowara ko iwita agila? Bare mu uwuta mena. Ana den balsan mu nina te nago ko amilmilaralko. Umutang te nina ura kari kawel sang, nunga ikia nongomang diram mena, bare nungumik guang te la ura nup te nunumi patowasan, wore anananga bagara aolak mu am wetang te nunga maonal ale nunga den sokel menawuralko.

13 Ana “ngualasan” ma nanga balmon, bare mu ana Kaem ko butata betesan! Agi ana me ngualasan agi mu, ana nina nego ko butata betesan! 14 Mu awuk, Kristus ana ninguru nanga kueso mu ko ana iki se, ura sail ago ilusan. Ana ninguru ikisan, nu kota suwanta kariimet suen la nogo ko kueram. Se mu te ana karogo ikisan, kariimet suen la kueman. 15 Se nu kariimet suen la nogo ko kueram mu noko ikia mu iwita: kariimet marak bagasan mu yam nongota nunumi ko la me bagomonko. Mena. Nuna Kari nogo ko kueram ale aking barasam mu ko la bagomonko.
2 Cor 5:15 Ana Kristus ko la baganakko: Gal 2:20.


16 Buta se, ana aitak ali imi ko ikia munan mu te kariimet me nunga tutesan. Tom ana me giris palagaman tom te, ana mel nungumik guang ko mu te la kariimet nunga tutiakasan.
2 Cor 5:16 Ana ali ko kilek te kariimet me nunga tutenakko: John 6:42; 8:15; James 2:1-4.
Ale Kristus mu betela uwutatala tutia ilak nama balukasan. Bare aitak mu mena.
17 Mu awuk, awiriya Kristus ilak kapetoso, mu nu kari iru nunguningkiri ko aratam. Ko ikia munan te bagakaso mu buring tuam, ale ikia munan iru nunguningkiri mu tam.

18 Kaem kota ura suen la imi beteso. Ana noko kager kari iwita awar biya bagaman, bare nu Kristus te anananga giam ale ko koma dugu te nanga awuram. Ale nu ana ura nangaram, ana kariimet sang noko kager kari iwita awar biya bagasan mu nunga manornak se giris palagomon ale nukote pingi taimonko. 19 Mu awuk, Kaem Kristus te ali imi ko kariimet nunga memek siwu saparam, ale lage korang nuna nukote namomonko mu kaogam. Ale nu ana dugu duap umutang kariimet saki alo nunga manornakko nanga maonam.

20 Buta se ana Kristus ko kuring bala ko kari bagasan, ale Kaem ana nagiring te ninga aruso iwitata. Se ana Kristus ko nup te iwita ninga manorsan, “Giris palagal ale Kaem kote namaralko!” Kristus kumik ikup memek bo mena. Bare Kaem balam se nu ana suen la nanga ikup memek giam, ale kari memek karogo ko iwita aratam ale kueram. Umu te ana awiriya nu ilak kapetanak, ale noko nangamang ningi nunguning aruk, mu Kaem nanga baluk noko kariimet ningo diram ko nanga balukko.

21 

Copyright information for `WSK