2 Corinthians 7

Aga singsang yawara, Kaem ko den ningo ningo uwuta balu nangaram. Buta se ana anapeya nanga ikia nangamang karur tugumokko mu nabiring tunak ale Kaem ko nguanga se kako nunguningkiri yawarakala baganakko.

Paul Corinth Kris alo noko kuring karoman mu ko amilmilakaso

Nina nengemang ana nago ko kagaru nangaralko. Ana ninga ningi bo memek kumik te me beteman, bo ikia lage memek me kasurman, bo ko mel ginakko me kuluru aringiman. Ani nina den te ninga atumusam ale den imi me balsam. Ani ulengkala balem iwitata aking balsam, ana ninguru ninga kuesan, ale ana kuenak agi, marak baganakko agi, wore ana tom suen biya nengerak baganakko. Ani wetang te la ninga manorsam, ani nenenga ninguru amilmilasam! Ani angamang sokel ago bagasam. Se ana ikup giwasan, bare umu ningi mu aninga amilmil mu biyala.

Tom ana Macedonia namaman mu ana naneman sapanakko kuring bo mena. Ikup duap duap nangate aratukaso, kariimet den te nangarak kagerakasan, se nangamang ningi mu nguangara taikaso. Bare Kaem, nu ana kariimet nangamang motam ikup ago mu nangamang sokel tuso, mu nu Titus ko taira mu te ana nangamang motam sokel tuam.
2 Cor 7:6-7 Paul Corinth Kris alo nunga ikia moakaso: 2 Cor 2:12-13.
Bare noko taira mu te la mena. Nina nu gomang sokel tuman mu ko dugu duap aga maonam, se ani umutang te ago la angamang sokel tuam. Nu ninga dugu duap nanga maonam, ale balam, nina ana nangarkalko kuesan mam, ale ikup nina ningi aratam mu ko nengemang biyala batagoso mam, ale ani ninguru aga kuesan ale agarak yawarakala bagaralko ko ikia ninga moso mam. Se ani den mu ikiem ale ninguru amilmilerem.

Ani ikisam, ani tam gawa ningarem mu nina nengemang batagam. Se mu ko ani aking angamang batagakaso. Bare ani tam gawa ningarem mu ko amilmilasam. E nina tom tukunangta nengemang batagakaso mu ko me amilmilasam. Mena. Bare ninga nengemang bataga umutang te nina giris palagaman, se ani aitak amilmil biya. Mu awuk, nina Kaem koma te nengemang batagam, se anananga den mu me ninga bita maguwuram. 10 Nangamang bataga Kaem ko kueso mu ana te giris palagasan se nu nanga sangaru taso. Se mu mel ningo: ana nangamang batagoso se giris palagasan mu ko amilmilasan. Bare ali imi ko nangamang bataga mu me te giris palagasan, mena, mu te kuesan.
2 Cor 7:10 Nangamang bataga Kaem koma te: Psa 51. Ali imi ko nangamang bataga: Mat 27:3-5; Heb 12:16-17; Rom 6:23.


11 Nina Kaem koma te nengemang batagam mu ko nunguning yawara mu arigalko: Nina biririkiman, ale nenenga ninip ningo te aratukko sail tagiman. Nina ninguru biririkiman, ale Kaem ko nguanga se, ana diram la baganakko ma balu se, kari ninga ningi memek beteram mu tairatela manorman ale giris palagukko lage te beteman.
2 Cor 7:11 Paul balso, “kari ninga ningi memek beteram” maso, mu nu ikup ko duap 1 Cor 5:1-5, 13 mu te aniso mu ko balso agila.
Ale nina ana nangarkalko ninguru nengemang niakaso. Buta se munan suen biya umu te nina ninimi wetang te beteman, ninga ningi ikup bo aratam, bare nina mu memek bo mena.

12 Se ani tam gawa ningarem, mu kari memek beteram mu ko me batagem, ale aking awiriya nu kumik te memek beteram mu ko me batagem tala. Mena. Bare mu nina Kaem koma te wetang te ikialko, nina ana nago ko ninguru kuesan mu te ikialko, se borta ko ani tam gawa mu ningarem. 13 Se ana Titus kuring te nenenga den ikiman umutang te ana nangamang ningi sokel tairam. Ana nangamang motam kutek mam.

Bare mu la mena. Nina suen la Titus, nego ko ikia moakaso, bare yawarakala taman ale ninguru gomang motam sokel tuman, se nu gomang amilmil biyala nangate peleram tairam se ana aringiman ale karogo amilmilakasan.
14 Nu nengete me namakaso la, ani nu koma te ninip patawukasam. Se nina dolara me aisiman, am yawarakala nu taman. Mu ana tom suen biya den nunguning tala ninga manorsan. Se ani Titus koma te ninga ninip patowerem mu betela nunguning tala se nu arigam. 15 Nu nengete namaram mu nina ko nguanga se, yawarakala taman, ale kuring ninguru karo tuikasan. Se aitak nu ninga munan mu ko iki se ninguru ninga kueso. Se ani ninga ikisam, nina mel suen la mu ninguru beteralko. Umutang ko ani angamang ningi nunguning aram, se nenenga ninguru amilmilasam.

16 

Copyright information for `WSK