2 Corinthians 9

Kris alo nuguting munan bolala awu betemonko den

Nina Kris saki nunga saonga ko munan mu maingkala ko ikiman. Se ani ko dugu duap tawun biya me ninga manikko. Mu ani ikisam, nina nunga saongalko nengemang ninguru aniso. Ani tom suen biya Macedonia Kris alo nomokete ninip patawukasam ale nunga manarukasam, yar namaram mu te nina Kris alo Achaia sor te bagasan mu ura mu beteralko balman makasam, ale nina ura imi beteralko ninguru sail tagikasan makasam. Se Macedonia alo ninga dugu duap ikiman, ale nuna suen biya tala Judea sor ko Kris alo agotala nunga sangarmonko balman.

Bare ana munan imi ko ninip patowaman bare nunguning me kapuruk bore ko, ana nanga singsang imi nengete nunga awuman se namasan. Nuna ninga sangarmon se ani Macedonia alo nunga manem butata, nina nigiting munan bolala awural ale bagaral se ana nengete tainakko. Mu awuk, ana nina nego ko nangamang ningi nunguning aram se ninip patowaman. Se Macedonia kari ani agarak taimon se nina munan mel me bolala awura iwita bagaral se ningarkomon, mu ana dolanak, se nina betela dolaralko.

Se umutang ko nanga singsang imi girimon nengete namomonko ani balem, nuna nigiting munan bolala awuralko balman mu te ninga sangarmon, ale bolala awu sapomonko. Se ana tainak mu nina nengemang amilmil ago la munan bolala awuman mu nangaralko. Mu ana ninga diruwusan se munan betesan iwita mena.

Kris alo nuguting munan ninguru tala betemonko

Ikialko: awiriya sume galuk yango ilagalata asurso, mu inang ilagalata giso. Se awiriya sume galuk yango suen biya asurso, mu inang suen biya giso. Nina suwan suwan ninga ikia te mel aguwaya mu beteralko ikiwasan mu te la beteralko. Bare nengemang sora se mena, aking bo ninga diruwuso se betesan iwita mena tala. Mu awuk, kari munan amilmil ago beteso mu Kaem ko amilmiloso. Se butata beteralko. Kaem mu mel suen biya ningarukko terong mam, se umutang te nina nengeta mel suen biya mu te terong ma la baga se, ura ningo duap duap mu te saongalko terong. Kaem ko batoga te kari sinar ningo mu ko munan mu ko iwita batagorman se aniso:

“Nu kariimet nungumik mel mena mu mel nungarso guruguso;
noko munan ningo mu tom suen biya aniso.”
2 Cor 9:6-9 Psalm 112:9. Saki alo mel nungara ko munan: Pro 11:24; Phil 4:19.

10 Se Kaem sume galuk yango kariimet nungarso se asursan, aking inang duap duap na ko mu nungarso se nasan, umutang mel suen biya terong ma la ningaru saguruk, se nina saki alo te nunga saongalko mu am terong la. Se kari sume galuk yango suen biya asurso se nunguning suen biya kaposo iwitata, nenenga munan ningo mu ko nunguning ninguru la aratu kapurukko. 11 Kaem mel terong ma la ningaruk se nina tom suen biya te saki alo nunga saongalko. Se nenenga munan ana ginak ale ago nama nungarnak, mu nuna nenenga munan mu ko Kaem ninguru amilmil tumonko.

12 Nenenga nigiting munan betesan imi mu, Kris saki alo mel ko tatapawasan mu nunga sangukko. Bare mu la mena. Nuna Kaem ninguru amilmil tumonko. 13 Nina saki alo nunga saongal mu te nenenga munan diram nunguning mu wetang te aratukko. Se kariimet nina Kristus ko den gilalong yawara apusan mu ninguru karo tusan mu aringimon, ale Kaem nup patawomonko. Ale nina yawarakala nuna se saki alo nunga sangorsan mu ko Kaem amilmil tumonko. 14 Ale ikimon, Kaem ko munan biyala ningaram ma balmon, ale umutang ko tom nuna nego ko ngatanga se, mu ninguru ninga kuemonko.

Se ana Kaem ko munan ningo yawara nangaram mu ko amilmil tunakko! Munan umutang mu yawarakala nunguningkiri, se ana ko balu kutuwunakko me terong!

15 

Copyright information for `WSK