2 Peter 2

Kawel kariimet sang Kris alo nunga ningi bagomonko

Bare Israel kariimet nunga ningi prophet kawel sang agotala bagakasan. Se mu turantala, kariimet saki kausa nunguning mena, den kawel baluwara, mu nenenga ningi ago aratomonkowo! Nuna tetela la ikia kawel, kariimet nunga nongomang ningi nunguning te parasurukko, mu balmonko. Ale Kari Biya nunga dia tam mu nubiring tumonko. Umutang te nuna nongota tairatela ikup tagi nungumik te betemonko. Kariimet suen biya kawel kariimet umutang nunga den ikimon ale nunga bagara aolak memek mu karo tumonko. Se mu te kariimet saki lage nunguning mu balu maguwumonko. Kariimet umutang nengete manga gimonko se, nongota nunga ikia te dugu duap kawel ninga manarmonko.
2 Peter 2:3 2 Cor 2:17 ago arikko.
Bare nunga Tutera Kari mu giram ale memek nungarukko sinar ago bagoso. Kari nunga bita maguwurokko mu me aniwoso, nu marak sinar ago bagoso, ale memek nungarukkowo!

Engel sang kilek memek beteman mu Kaem me yam nungarkiwaram. Mena. Nu kuwim memek ningi nunga awuram, se mutim tiromorom biya nunguningkiri mu ningi baga se, tutera kam ko kimi bita se bagasan.
2 Peter 2:4 Engel memek alo: Jude 6.


Aking yu lom me arata la, ali imi ko kariimet Kaem nubiring tuman bare nu yam me nungarkiwaram tala. Mena. Nu balam se yu lom biya aratam ale ali ira mituwuram se nuna sarenga namaman. Bare Noah mu munan diram ko balukko kari, se Kaem nu se, kariimet 7 tala mu nunga sinar tam se yawarakala bagaman.

Aking Kaem wonong ilagala Sodom Gomorrah nunga maguwuram, tama te maliluwu saparam. Ale te nanga kausam mu, udagi te kariimet Kaem nubiring tusan mu nungumik te uwutata aratukko. Bare nu kari ningo Lot sangaru tam. Lot mu nu kari munan kiakasan ale kilek memek bita lagakasan mu nogo ko gomang ninguru ikuwakaso. Nu nunga ningi baga se tom suen biya nunga munan memek arikaso ale nunga den memek ikikaso. Ale nu kari diram, se nu gomang yaman ikikaso.
2 Peter 2:5-7 Noah: Gen 7:1. Lot: Gen 19:16, 24.


Buta se, den suen biya imi te ana ikisan, Kari Biya mu kariimet noko kuring karo tusan mu ira ariga nongote aratoso mu ningi nunga sangaru taukko terong mam.
2 Peter 2:9 1 Cor 10:13 arikko.
Ale aking kariimet memek mu memek te nunga bitiruk nama tutera tom biya mu te aratukko terong mam.
10 Bare nu kariimet noko den ikisan ale mel yam ko balsan, ale nongota nunga ikia memek nongomang barasa karo tusan, mu memek ninguru nunguningkiri nungarukkowo.

Nuna nusupuling lagara se, nguangara dolara bo nongote mena. Nuna engel ta wore nunga balu maguwumonko me nguangasan!
11 Bare Kaem ko engel sokel ago nunguningkiri se kariimet umutang ninguru nunga kiaman, bare nuna mu Satan ko engel me nunga balu maguwusan, ale Kari Biya koma te den te me nunga atumusan.
2 Peter 2:10-11 Jude nu den sang iwitatala balam: 6-10, 16.


12 Bare kariimet umutang mu mel nuna ninguru me ko ikisan bare balu maguwusan. Nuna ikia mena, buruk kausik ikia sinar mena iwita, am gue te kilek aguwaya mu betesan wore nunga turan, nunga nunam nunga iluso se am nunga mora ko ewere la. Mel diwang memek tasan turantala, nuna memek tamonko.

13 Nuna kariimet saki ikia lage memek te nunga betesan mu ko koma uwutatala nuna tamonko! Nuna woremkalal wetang te yu inang no se nguala se bagara ko mu ko me dolasan, am ko amilmilasan. Nuna ninga ningi dagisan ale na nasan, bare nuna mel memek karur ago wore turan ninga ningi bagasan. Ale nunga ikia kawel betesan mu ko amilmilasan. 14 Nuna imet nungarkomon ale nongomang barasukko la se, kilek memek betera ko munan umu me bita to arigisan. Nuna kariimet nunga ikia nongomang sokel mena mu nongomang kulukursan ale, kilek memek betemonko nunga tagisan. Nuna bo ko mel aringimon ale ko nomotam nongomang barasukko mu ko munan ninguru iki gilingiman. Se Kaem koma memek nunguningkiri nungarukkowo! 15 Nuna lage diram mu nubiring tuman ale nguala sipa se anisan. Nuna kari Beor ko namar Balaam mu ko molak karosan ale manga ninguru ko kuesan.
2 Peter 2:15 Balaam mu nu prophet. Se King Balak nu maonam, “Ni Juda kariimet memek tamonko ko den balu ale ko koma manga toko,” mam. Se Balaam den mu baluk ale ko koma manga taukko ninguru kuakaso, bare donkey Balaam maonam me bitarko mam se me beteram: Num 22.
16 Bare Balaam ko donkey te namawaram se kakirip iwita munakaram ale nu ining tuam, ale ko ikia ngualara bitirukko ikiwaram mu me bitirukko maonam se Balaam ikia mu eng me beteram.

17 Kariimet umutang mu nuna yu kuting galang wore turan, ale aking taiti nuwi daula itugu ago komasang te namoso wore nunga turan. Se Kaem nunga nuguwim tiromorom biya mu ningi balu beteram se aniso mu te namomonkowo. 18 Mu awuk, nuna nunumi patawu patawu, nuguring kapa kapa, den nunguning mena balu balu geragasan. Ale ikia memek nongomang barasa ko munan te, kariimet ulengkata ikia kilek memek nubiring tui se anira mu nongomang kulukursan. 19 Ale nunga manorsan, “Nina anananga den karo tual mu nina yawarakala bagaralko. Munan den bo ta me ninga kalokko.” Bare nuna nongota mu kilek memek, te nama magara ko, mu ko bowa ningi ura dungan kariimet bagasan. Mu awuk, kari munan aguwaya bita lagoso, mu nu munan mu ko bowa ningi ko ura dungan kari bagoso.
2 Peter 2:19 Kilek memek ko ura dungan kariimet: John 8:34; Rom 6:16-17.
20 Nuna nanga Biya Jesus Kristus, nanga Sangaru Ta Kari, mu ko ikiman, ale kilek memek te magara ko mu nubiring tuman, bare akingtala pelesan ale kilek memek mu ko ura dungan kariimet ko bagasan. Buta se, nuna duap te memek bagaman, bare aking nukum te mu eng memek biya bagasan. 21 Mu awuk, nuna Kristus ko ikiman, ale ko munan den kako mu ikiman, bare am nubiring tuman, se umutang ko koma memek biyala tamonkowo! E nuna Kristus ko me ikiman, ale ko den me ikiman ale mu, nuna koma memek biyala me tamonko ale. Mu munan uwuta nongote aratam mu den ira kariimet iwita balsan mu turan: “Kausik peleso ale anapeya mel kota kapi beteram mu naso.” Se aking bala bo mu iwita: “Se buruk yu nunguning maingkala guruso, bare aking peleso namoso lom gege pupurut ningi tagoso girigirik maso,” iwitatala.
2 Peter 2:20-22 Kariimet munan ningo bitawa pelesan: Mat 12:45; Heb 6:4-5; Proverbs 26:11.


22 

Copyright information for `WSK