2 Peter 3

Jesus peleruk tairukko

Aga singsang yawara, ani tam gawa bo girem ningarem, ale aking aitak bo ningarsam. Ani tam gawa ilagala ningarem mu ko duap iwita, mu mel maingkala nina ikiman wore ko aking diram tala ikialko ninga ikia ningamin sinar awusam. Aninga angamang nina den girakala Kaem ko prophet kako alo balman mu se, munan den nanga Biya Jesus, nanga Sangaru Ta Kari, ninga apostle nuguring te ningaram wore ningamin te tairukko.

Nina mel imi ko ninguru ikialko: tom nukum te mu gusia kariimet alo aratomonkowo! Nuna nongota nunga ikia memek nongomang te mu karo tui se, gusia den balu se balmon, “Kari ito tairukko balam mu aparete taiwoso ya? Anananga nanangatak ari kueman, bare mel suen biya mu duap te nunguningkiri Kaem te nungam owore te diram aratu aratu namawoso.”
2 Peter 3:3-4 Tom nukum: Mat 24:48-51; 1 Tim 4:1; Jude 18.


Nuna uwuta balmon bare mena. Nuna mel imi ko ikia tamonko me ko kuesan: Mu girakala biya Kaem ko den marak sokel ago mu te taiti aratam, se ali mu yu ningi aratu nama marakam, ale yu kusumuri kusumuri bagakaso. Se Kaem yu te tala ali mu lilim la moa mituwuram. Se den borta nuna ikimonko me kuesan.
2 Peter 3:5-6 Ali yu ningi aratu nama marakam: Gen 1:6-9. Kaem ali mu moa mituwuram: 7:11-21.
Kaem ko den marak sokel ago borta tala, taiti se ali aitak anisan mu te nunga iluwoso, se kani namomonko kimi bitawasan. Nuna tutera tom biya mu ko kimi bitawasan. Se tom umutang te kariimet Kaem nubiring tuman mu maga namomonkowo.

Bare aga singsang yawara, mel suwanta imi me ko ningamili sapurukko: Kari Biya ko ikia te mu, tom suwanta mu 1000 yar iwita, se 1000 yar mu tom suwanta iwita tala.
2 Peter 3:8 Psalm 90:4.
Saki alo ikisan Kari Biya nu mel bitirukko balam mu bitirukko gora kira lagoso ma balsan. Mu uwuta mena. Bare noko gomang kari bo ta sarenga namurukko me aniso. Noko ikia se ko gomang mu kariimet suen biya giris palagomonko aniso.
2 Peter 3:9 1 Tim 2:4 ago arikko.
Buta se, nu nina nego ko ikia taso ale ninga kimi bita lagoso.

10 Bare Kari Biya ko tom tairukko mu tere kari taiso se kariimet biririkisan iwitata tairukko. Taiti biyala niaruk, nirung kapuruk ale mena namurukko. Se mel suen biya mu tama kani sapomonko. Se ali se mel suen biya awete aniso mu kani malila sapomonkowo.

11 Mel suen biya munan umutang te maga sapomonko. Se nina tom imi te aolak bagara awuk bore te bagaralko mu terong? Mu nina Kaem koma te kariimet laili diram nunguningkiri baga se, 12 Kaem ko tom biya mu tairatela tairukko balu se, ko kimi bita se bagaralko. Tom mu te taiti tama te kani malilirukko, se kowar umutang te mel suen biya mu parasa namurukko. 13 Bare ana mu taiti iru se ali iru Kaem ko balam mu ko kimi bitawasan, se taiti se ali iru mu te mu munan diram nunguningkiri mu la anirukko.
2 Peter 3:13 Taiti iru se ali iru: Isa 65:17; Rev 21:1,27.


Kris alo sokel ago bagomonko

14 Buta se, aga singsang yawara, tom nina mel mu ko kimi bita se mu, sail tagiral ale Kaem koma te memek bo mena, am diram yawarakala baga se, nengemang suwanta nu ilak bagaralko. 15 Kaem nanga bo Paul ikia tuam se te tam gawa te den bataguru ningaram iwitatala, Kari Biya kimi beteso mu ko iwita ikialko, nu kariimet giris palagomon se te nunga giokko tom nungarso.
2 Peter 3:15 Kari Biya kimi beteso ko duap: Rom 2:4; 2 Peter 3:9.
16 Paul ko tam gawa suen la te mu nu mel imi ko uwutata balso. Noko tam gawa te den sang, ko nunguning ikia ko ikup nuam mu karogotala te aniso. Se kariimet sang ikia sinar mena, nongomang namara taira ago, mu nuna den umutang tasan ale kariimet nunga ikia te gurugusan se nama magoso. Ale Kaem ko den sang agotala tasan ale uwutata la betesan.
2 Peter 3:16 Den imi te ana am iwita ikinakko: den Paul batogam mu kota ko ikia te mena, bare Kaem ko den, Old Testament te aniso mu iwitatala.
Se umutang ko nuna memek tamonkowo!

17 Buta se, aga singsang yawara, nina mel mu maingkala ko ikiman, se ko sinar talko! Kariimet munan kiawara nunga kawel te ninga tagimon se ninga nigiwim te sokel ago sanamiwasan wore beteral bore ko ninguru sinar talko! Bare nanga Biya Jesus Kristus, nanga Sangaru Ta Ta Kari, mu ko ninguru iki se, ko gomang ningarso mu te eng sokel ago la bagaralko. Noko nup biya nikitang karogo, aitak se tom udagi ko, tom suen biya te. Nunguning.

18 

Copyright information for `WSK