2 Thessalonians 3

Paul balam, “Ana nago ko ngatangaralko,” mam

Nanga singsang, aninga den nukum mu iwita balsam: nina ana nago ko ngatangaral se, Kari Biya ko den nenenga ningi namaram iwitatala paguk ale, wuli ago la sor suen biya te namuruk ale nu la kariimet nunga giokko. Ale ngatangaral se kari memek alo mu nuguting ningi Kaem nanga bataguru taukko. Mu awuk, kariimet saki Kaem ko nongomang ningi nunguning mena mu ago anisan.

Bare Kari Biya mu ana ko nangamang ningi nunguning arukko. Nu sokel ningaruk ale, kari memek Satan ninga maguwurok bore ko ninga sinar taukko. Ana Kari Biya te ikiman, nina munan beteralko ana ninga manorman mu nina bitawasan, ale eng butata bita se lagaralko. Anananga nangamang mu iwita: nanga Kari Biya ninga sanguk se nina Kaem ko ninguru kueral, ale Kristus ikup giam iwitatala sokel ago sanamaral ale ikup gialko.

Kris kariimet ura tamonko

Nanga saki alo, ana nanga Biya Jesus Kristus ko nup te ninguru ninga manorsan, kari awiriya yam kusumuri baga se den ana ninga manorman mu me karo tuso, am bagoso, mu ilak me kapetaralko. Mu nina nengeta ana bitakasan turantala beteralko mu nengeta ko ikisan. Ana nina nengerak bagakasan mu, gagor ago me bagakasan. Ana ninga ningi na inang bo ipi me tokasan, mena, mu ana dia se la. Ana turom woremkalal ura kowar to lagakasan, ana ikup bo ningarnak bore ko. Ana nenengate na inang ginakko mu terong la. Bare ana uwuta me bitakasan, mu awuk, ana kausa bitakasan, nina te arigal ale betela te beteralko. 10 Tom ana nina nengerak baga se mu, ana munan den imi ningarman: “Kari ura me iluwok, mu na me naukko.”

11 Ana iwita ninga ikiman, ninga ningi kariimet saki gagor kuruwim. Nuna me ura ilusan. Mena. Saki nunga ura betesan se nuna am duap karo karo geragawasan. 12 Kariimet uwutata mu ana Kari Biya Jesus Kristus nup te munan den iwita nunga manorsan, “Nina ngual ngual geraga beteral ale, nengeta ninga bagara ko ura iluwal ale te bagaralko.”

13 Bare aga singsang, nina munan ningo beteralko me gagoraralko. 14 Awiriya den ana tam gawa te ninga manorsan imi me karo tuok, mu ninguru arigal ale, nina ilak me nal gial ale, me ilak geragalko. Asele nu umutang te dolurukko. 15 Bare nenenga kager kari iwita me beteralko, bare ninga launuria ko iwita ikial ale ikia ningo la maonalko.

Den nukum

16 Se anananga nangamang mu iwita: Kari Biya, lila yawara ko duap, mu kota lila yawara tom suen biya te, munan suen la te ningarukko. Kari Biya nina suen la nengerak bagurukko.

17 Ani Paul agata aga agiting te amilmil den imi batagem. Ale aga tam gawa suen biya batagorsam mu ko kausa mu iwitata betesam. Aninga agiting kiwol mu iwitata.

Nanga Biya Jesus Kristus ko gomang lila nina suen la nengerak bagurukko. Nunguning.

18 

Copyright information for `WSK