2 Timothy 2

Timothy Jesus Kristus ko kager kari yawara ko bagurukko Paul maonam

O aga kuriang, Jesus Kristus ko marak sokel ni kisiso mu te sokel ago bagerko. Ale den ani kariimet suen biya nomokete balem se ni ago ikiem, mu kariimet ni nunga ikisam nongomang ningi nunguning ura tamonko mu nunga kasuru se nuna sang alo nunga kasurmonko.

Ni Jesus Kristus ko kager kari yawara ko baga se, ikup ana giwasan mu ni agotala am giko.
2 Tim 2:3 Ana ikup am ginakko: 2 Tim 1:8; 4:5.
Kari awiriya kager kari ko bagoso, mu noko gomang mu nu ura ninguru bitiruk se ko supuling ko amilmilurukko. Se umutang ko nu ura saki saki mu ningi ago me namoso taiso. Mena. Nu noko ura diram mu la beteso. Aking kari bo kolara bo koluruk ale te girokko gomang aniso, umutang mu nu kolara mu ko munan karo tui saposo. Nu buta me bitiruk, mu nu saki nunga kiaruk ale koma yawara taukko mu me terong. Aking kari ningam ningi ura kowar tam umutang girok na giokko. Se ani den ira ilagala suwan ka manorsam imi ninguru ko kamin tugum, se Kari Biya ka sanguk se ko duap mu suen la iki saparko.

Jesus Kristus nu King David ko gue te kari ko aratam, ale kueram, bare aking Kaem patowaram se barasam, den umutang tom suen biya am kamin te anirukko. Ani den gilalong yawara borta balsam.
2 Tim 2:8 Jesus: Rom 1:3-4.
Se den umutang ko ani ikup aisiman, ale memek kari iwita ZZZ (mayang) / sen / chain te aga talipaman se bagasam. Bare Kaem ko den mu sen te kalomonko me terong!
2 Tim 2:9 Kaem ko den mu mayang sen te kalomonko me terong: Phil 1:12-14.
10 Se mu ko ani ikup suen la aisuwasan mu am giwirikko. Mu awuk, aninga angamang mu ani den gilalong yawara kariimet nomokete balik, se mu te Kaem kariimet noko ko giram nunga balam mu Jesus Kristus te nunga giok, se tom suen biya ko nikinang te ilak bagomonko.

11 Imi den nunguning:

Ana nu ilak kueman, mu ana nu ilak wete marak baganakko.
12 Ana nangamang sokel ago ikup ginak,
mu ana nu ilak wete mel suen biya bitarnakko.
E ana nabiring nu tunak, mu nu betela buring ana nangarukko.
2 Tim 2:12 Ana nabiring Jesus tunak, mu nu betela buring ana nangarukko: Mat 10:33.

13 Ana den balman mu me karo tunak,
bare nu kota ko den balam nu karo tuokko.
Mu awuk, nu ko munan aguwaya beteso mu aking me guruguso patawoso.
2 Tim 2:13 Jesus ko munan me guruguso patawoso: Rom 3:3-4; Heb 13:8.

Ura kari yawara ko munan

14 Se nika kariimet mel mu ko am nunga manaru sagerko. Ale Kaem ko nup te nunga manaruko, nuna ikia duap duap ko den me tagimon gurugumonko. Den tagira gurugumura uwuta mu kariimet me nunga sangukko. Bare awiriya den umu ikiso umutang ko gomang ningi nunguning maguwurokko.
2 Tim 2:14,16,23-24 Den tagi gurugumura: 1 Tim 4:7; Titus 3:9-11.
15 Ni Kaem koma te ura kari yawara ko aratuko sail tagir ale Kaem ko den diram la baluko. Umutang te Kaem ni ko ko amilmilurukko, se ka ura mu ko me dolerko. 16 Ni kariimet den ngual ngual tagisan gurugumusan mu arungak me bagerko. Mu awuk, kariimet uwuta betesan mu nunga bagara aolak eng am maga sapurukko. 17 Aking nononga den balsan mu lot aora nangimik nunguning naso ale pagoso wore iwita paguk, ale kariimet saki nongote aratu aratu namurukko. Se mu ko sinar toko. Hymenaeus Philetus ilak mu kari ari ani nunga baluwasam wore nunga saki. 18 Nuna ilagala den nunguning nubiring tuman, ale iwita kawelakasan, “Ana udagi nangimik guang iru ago barasanakko mena, ana maingkala maragaman ale barasaman.” Buta balsan, ale den mu te saki alo nunga nongomang ningi nunguning maguwusan.
2 Tim 2:18 Nononga den kawel: 1 Cor 15:12.


19 Bare Kaem ko manga aora mu bangaru kuwim tuam se bagoso.
2 Tim 2:19 Kari Biya noko kariimet nunga ikiwoso: Num 16:5:1; 1 Cor 8:3. Manga aora mu den nunguning (Heb 6:1-2), agi Kristus kota (Is 28:16; Rom 9:33; 1 Cor 3:11; 1 Pet 2:6), agi Kristus ko apostle se prophet alo arungu (Eph 2:20-21), agi nongomang ningi nunguning alo likilim, borta manga aora.
Se awete mu den ilagala imi aniso: “Kari Biya noko kariimet nunga ikiwoso.” Se aking “Kari awiriya balso nu Kari Biya ko kari bo ma numi balso, mu nu kilek memek suen la buring tuok ale kilek ningo la bitirukko.”

20 Kari kumik mel ago ko kawam te mu taiwir bagun duap duap aniso. Saki yawara yawara mu silver se gold te nunga, se saki mu tam te se ali gege te nunga. Saki silver se gold te nunga mu ura ningo te betera ko aniso, se saki tam te se ali gege te nunga mu pempem te no gi se bagara ko aniso. 21 Se kariimet kilek memek suen la nuburing tumon ale diram la bagomon, mu taiwir bagun ura ningo te betera ko aniso iwitata, Kari Biya ura yawara duap duap te nunga bitirukko.

22 Se umutang ko ni kilek memek gemang barasa ko munan kari kulak saki nongote aratoso mu biring tuiko. Ale munan ningo imitang la karo tuiko: bagara diram, Kaem ko gemang ningi nunguning, bo gemang tua, se bagara lila, munan umutang karo tuiko. Kariimet ikia ningo nongomang ningi karur mena Kaem nunga sangukko arusan, mu munan diram umutang karo tusan. Se ni nuna betesan turantala ni bitarko.

23 Den yam yam kawel ningi me bagerko. Ni ikisam, den mu te eng nama ining munak aratoso. 24 Bare ni Kari Biya ko ura kari, se ni saki alo arungak den me tagi gurugumurko. Mena. Ni kariimet suen la nunga kua se, kausa kari yawara ko baga se, munan lila te kariimet den nunga kasuruko. 25 Ale kariimet saki nika den biriruwumon se ni ko arungak baluko, mu ni ekes te munan te nunga manaruko. Ni me ko ikisam, Kaem nunga sanguk se nuna giris palagomon ale den nunguning tamon ale nongomang te betemon se mu te nononga ikia dirmaukko agila. Se Satan, nunga iluwam ale ko ura dungan kariimet ko nunga awuram se anisan, mu ko dagarok batutumumon ale aratomon nagumonko.

26 

Copyright information for `WSK