2 Timothy 4

Timothy Kaem ko den am balu sagurukko

Jesus Kristus mu mel suen la bituokko tairuk ale kariimet marak anisan se maingkala kueman mu nunga tuterukko. Se ani mu ko iki se, Kaem se Jesus Kristus nomokete iwita sokel ago ka manorsam: Kaem ko den balu sagerko. Kariimet den ikimonko agi mena agi wore am baluko. Ale munan lila mu te den kawel biriruwur, ale kariimet nunga memek ko nunga manaru, ale lage ningo nunga kasuru se ikimonko. Mu awuk, tom tai aratuwuruk mu kariimet den nunguning ko nodogowa me tagimonko. Mena. Nuna den ikimonko kuesan mu la ko kausa kari nunga sor gimon ale nunga den ikimonko. Nuna den nunguning ikimonko memon, ale dugu duap kawel kawel ikimonko la nodogowa tagimonko. Bare ni tom suen biya keta ka ikia se ka bagara ko sinar toko. Ni ikup yaman am giko, den gilalong apura ko ura am bitarko, ale ura Kaem kiting te beteram mu am suen la bita saparko.

Bare ani mu ali imi bitirikko aga tom tai aratoso. Yu waen altar awete warsan se kaposo iwitata, aga momon se kuerikko mu tom pingi aram. Ani kager yawarakala beterem. Ale sokel ago nagurem nama nukum te aratem. Ale aninga angamang ningi nunguning mu am ilukuawuwasam. Se Kari Biya nu Tutera Kari diram, mu nu mel yawara ani aisuk ale te aga baluk ani kari ningo diram maukko mu nunguru beteram se aniso. Bare nu tairuk mu ani la mel aisukko mena, kariimet arikaya noko kua se nu tairukko kimi bitawakasan mu agotala mel yawara umutang nungarukko.

Timothy mel sang giok ale ago Paul kote namurukko

Lage i arik agi mu tairate aningate tairko. 10 Mu awuk, Demas nu ali imi ko munan ko kueram ale aninga beteram Thessalonica namaram. Se Crescens mu Galatia namaram, se Titus mu Dalmatia namaram. 11 Se Luke kota suwanta ani agarak bagoso. Se ni Mark to ale ilak tairko, mu awuk, nu ura te aninga sangukko terong mam.
2 Tim 4:11 Mark: Acts 15:37-40.
12 Se Tychicus mu ani Ephesus beterem se namaram.

13 Se tom ni tairko mu aninga guang maiya Troas wonong te Carpus ko kawam te beterem se aniso mu ago to ale karogo tairko. Ale aninga tam gawa batoga patunga mu suen la karogo gi ale ago tairko. Bare batoga patunga belelek guang te nunga mu me ko kamili sapurukko nunguningkiri.

14 Alexander, kari melmasak kapa te nungurso, mu nu ikup tawun biya nunguningkiri aisam. Nu munan aninga angimik te beteram mu Kari Biya kota ko koma diram la tuokko. 15 Nu anananga den balukasan mu nu am menawurokko ago kaeyakaso. Se ni agotala noko ninguru sinar toko.

16 Tom motam motam kari bibiya aninga isarman se ani nunga den koma balem, mu kari bo ani agarak me sanamaram, suen la nagu sapaman. Bare mu ko ikup bo aningate me aniso. Kaem nononga memek mu am siwu nungarukko. 17 Bare tom mu te Kari Biya ani agarak baga se sail aisukaso. Se ani den gilalong yawara am wetang te apurem se sor saki ko kariimet Juda ko mena wore ninguru iki gilingiman. Tom mu te ani lion kuring ningi iwita bagerem, bare Kari Biya aga bataguru tam. 18 Ale ani ikisam, Kari Biya nu ani memek suen biya ningi aga bataguru tauk ale, yawarakala aga sinar tauk agarak nama ko sor duruk wonong mu ningi agarak kasu nagurokko. Nu nup biya nikitang ago mu pempem la kote anirukko! Nunguning.

Den nukum

19 Ani Priscilla ko kuari Aquila ilak, se Onesiphorus ko kawam bagara suwan suen la arungu amilmil yawara nongote betesam. 20 Erastus mu Corinth am bagaram. Se Trophimus mu kuera tam se ani Miletus wonong te beterem se bagaram. 21 Se lage i arik agi mu, daula yar biya ko kam me tai aratuk la, ni tairatela gir aningate tairko.

Imi te Eubulus, Pudens, Linus, Claudia, se launuria suen la nunga amilmil yawara nina ningarsan.

Kari Biya nikerak bagurukko. Se noko gomang lila nina suen la nengerak bagurukko.

22 

Copyright information for `WSK