Acts 10

Engel Cornelius kote tairam ale den maonam

Kari bo Caesarea bagakaso, ko nup Cornelius. Nu Rome ko kager motam bo, nunga balsan Italy Kager Kari masan, wore nunga supuling bo. Nu Kaem ko kuakaso, ale nu, se ko imet kuriang, se ko ura kariimet suen la Kaem ko kuring bowa ningi bagakasan. Nu kariimet nungumik mel mena mu yawarakala nunga sangarukaso. Ale nu tom suen biya Kaem aru ngatangarukaso.

Tom bo, bainga ningi 3 o'clock iwita, nu ipingiram ale mel wetang te nunguningkiri arigam, mu Kaem ko engel bo kote tairam ale auram, “Cornelius,” mam.

Se Cornelius engel arikuawukaso ale ninguru nguangakaso. Ale isuam, “Kari biya, awuk a?” mam.

Se engel balam, “Kaem ni ngatangarukasam, ale munan ningo ningo kariimet nungumik mel mena mu nungarukasam, mu arigam ale ko ikiwoso.
Se aitak ni kari sang nunga awur se Joppa namomon ale kari bo nup Simon, ko nup bo Peter, mu manarmon ale ilak taimonko. Nu Simon bo tala, Joppa kari, bulmakau guang nungurso, wore ilak bagoso. Ko kawam mu gagi norogen te wo.”

Engel nu ilak munaka kutuwuram ale namaram. Se Cornelius ko ura kari ilagala se ko kager kari bo mu nunga auram. Kager kari mu nu agotala Kaem kuring bowa ningi. Se taiman, se mel suen biya aratam mu ko duap nunga maonam, ale nunga awuram se Joppa namakasan.

Peter ko ipingira

Se ukiram se aolak iluman nama worem tai dirmam mu Joppa aratomonko pingi awaman, se Peter kawam gul te Kaem ilak munakurukko nama tarigiram. 10 Baga nu na ko kueram, ale na naukko kaeyakaso. Se nuna na nunguruwaman se nu ipingiram. 11 Ale taiti kuring kaigam se mel bo tai kapakaso mu arigam. Mu guang aromemek iwita, se ko bewelak ilagala ilagala iluman ale beteman se ali te tai kapakaso. 12 Guang mu ningi mu buruk-bulmakau, urer-tuguta, inanganang, o mel duap duap ningi anikasan se ago tai kaparam mu arigam.
Acts 10:12 Mel sang mu Juda alo me nokasan, mu karur ago makasan. Betelatala, Juda kariimet mu sor saki ko kariimet arungu me no gikasan.
13 Se kuring bo Peter maonam, “Peter,” mam, “bares ale mel sowore nunga moar ale noko,” mam.

14 Bare Peter balam, “Kari Biya, ani mel sumu me naikko! Ani ulengkala mel karur ago me nokasam.”

15 Se kuring udagi aking balam, “Mel Kaem balam ‘karur mena’ mam, mu ni me balu ‘karur ago’ meko.”

16 Munan mu tom ilagala suwan ko aratam asele guang mu tairatela peleram duruk te nama tarigiram.

17 Se Peter mel arigam mu ko am kuamin tuguwaram se kari Cornelius nunga maonam mu tai Simon ko kawam aringiman ale songkuring ago sanamaman, 18 ale isarukasan, “Simon ko nup bo Peter mu ewela bagoso e?” makasan.

19 Se Peter ipingira mu ko am kuamin tuguwaram se Korang Bur maonam, “Simon, kari ilagala suwan nika kupuwasan,” mam. 20 “Bares ale nongote kapar, ale arungak namarko mu ko me kamin yenerukko. Mu ani agata balem se taiman,” mam.

21 Se Peter nongote kaparam ale balam, “Kari nina kupuwasan mu anigita imitang. Nina anape ko taiman?”

22 Se nuna balman, “Cornelius, nu kager kari nunga supuling, bare nanga maonam se taiman. Nu kari diram, Kaem ko nguangoso. Se Juda suen la balsan nu kari ningo ko balsan. Kaem ko engel bo nu maonam, nu nika aurok se ko kawam te namar, se nu nikate den sang ikiokko balam.”

23 Se Peter balam, “Utu naguralko,” mam. “Ana turom imi te aninak ale asele.”

Peter Cornelius ko kawam te namaram

Ukiram asele nu arungak barasam namaram. Se Joppa kari saki nongomang ningi nunguning mu ago nu ilak namaman.
24 Nuna aolak iluman turom suwanta lage te animan. Ale ukiram se aolak ilu nama Caesarea arataman. Cornelius nuna taimonko ikiam, ale ko launuria ko singsang nunga auram se taiman se nunga kimi bita se animan. 25 Se Peter tai aratam se Cornelius kote namaram koma dugu te bugura kulukuam. 26 Bare Peter balam, “Baresko,” mam. “Ani kari yam tala pa!”

27 Ale Peter nu ilak munaka munaka kawam ningi kasu naguman, ale kariimet suen biya biguwuman animan mu nungarkam. 28 Ale nunga maonam, “Nina ikisan,” mam, “ana Juda nanga munan aora biya aniso. Se Juda kari bo kariimet saki Juda mena mu arungak me geragukko, arungak nunga kawam te me namuruk na yu naukko. Bare Kaem iwita aninga maonam, ani kari bo balik karur ago ma me balikko mam. 29 Buta se ani ninga aira me merem, am tairem. Ale ani ninga isarsam, nina anape ko ani tairikko balman?”

30 Se Cornelius balam, “Tom 4 namaram mu te ani bainga ningi, 3 o'clock iwita - aitak ani nengerak munakawasam iwitata - aga kawam te ngatangawerem se tetela la kari bo guang nikim karogo naguram mu tai amake dugu te sanamaram, 31 ale balam, ‘Cornelius,’ mam, ‘ni ngatangakasam, ale munan ningo ningo kariimet nungumik mel mena mu nungarukasam, mu Kaem arigam ale ko ikiwoso.’ 32 Ale balam, ‘Kari sang nunga manaru se Joppa namomon ale kari bo Simon, se ko nup bo Peter, mu manarmon ale ilak taimonko. Nu Joppa kari bo ko nup Simon tala, bulmakau guang nungurso, mu ko kawam gagi norogen te mu te ilak bagoso.’ 33 Engel buta balam se ani tairate kari sang nunga manem se ni kete namaman. Se ni yawarakala tala tairem. Se ana aitak tai Kaem koma te biguwuman, Kari Biya den aguwaya nanga kasuruko nika maonam mu balu se ikinakko.”

Peter Cornelius ko kawam te den apukaso

34 Se Peter kuring paogam ale den balam, “Nunguningta,” mam, “aitak ani ikisam, kariimet Juda ko agi Juda ko mena agi, wore Kaem mu te nunga ikiso ale me nunga tuteso. Mena. 35 Sor suen la ko kariimet ningi, awiriya noko nguangoso ale munan diram beteso, mu Kaem kari mu ko kueso.
Acts 10:34-35 Kaem kariimet suen la nungumik te munan diram beteso: Rom 2:9-11.
36 Kaem den yawara ana Israel kariimet nanga maonam, ale iwita nanga kausam, Jesus Kristus mu kariimet suen biya nunga Kari Biya, se nu te kariimet Kaem ko lila biya te bagomonko.

37 Mel Judea sor te aratukasan mu nina nengeta ko ikisan, mel mu Galilee sor te duap beteram, John ko anuwa ura mu bita saparam se buring ko aratam wore. 38 Mu Kaem Korang Bur sokel ago mu Jesus Nazareth kari mu tuam, se sor saki geragakaso kariimet nunga sangarukaso. Kaem nu ilak se kariimet suen biya Satan nunga maguwuwaram mu nu nunga nunguru sapakaso.

39 “Se mel suen biya nu ana Juda nanga sor te beteram, ale nanga wonong Jerusalem ningi ago beteram, mu ana aringiman ale ko balnakko kari ana. Nuna kari mu tam kangono te ituwuman se kueram. 40 Bare tom ilagala suwan mu te Kaem patowaram se barasam se wetang te kariimet saki nomotam te nunga kasurukaso. 41 Nu kariimet ngual ngual me te nunga kausam. Bare ana kari maingkala nanga balam mel umutang ko balnakko, mu namakete nanga kasurukaso. Nu kueram bare barasam se ana ilak na yu naman. 42 Nu nanga maonam, ana noko dugu duap kariimet nunga manornakko. Ale balnak, kari borta nu kariimet marak anisan se kariimet maingkala kueman mu nunga tuterukko Kaem balam. 43 Prophet suen la noko iwita balsan, awiriya noko gomang ningi nunguning aruk, mu noko memek suen la Kaem kari umutang nup te siwu sapurukko.”

Korang Bur kariimet saki Juda ko mena wore nongote tai kaparam

44 Peter am munakawakaso se Korang Bur kariimet den ikiwaman mu suen la nongote tai kaparam. 45 Se Juda Kris alo Peter ilak taiman, mu Kaem Korang Bur sor umu ko kariimet Juda mena wore agotala nungaram mu aringiman, ale biririkiman. 46 Mu awuk, kariimet umutang den duap duap me te munaka ariga wore te munakakasan Kaem nup patawukasan se ikikasan.

Se Peter balam,
47 “Kariimet imi ana Korang Bur taman wore turan to gilingiman. Se awiri nuna yu te anuwa tamonko mu nunga lage kalokko? Mena!” Ale nu nunga maonam, nuna Jesus Kristus nup te anuwa tamonko balam. Se nuna nu tom bo agotala arungak bagurukko balman.

48 

Copyright information for `WSK