Acts 11

Peter mel Cornelius ko kawam te aratam wore Jerusalem ningi balam

Apostle alo se Kris launuria saki Judea sor te bagaman mu den ikiman, kariimet Juda ko mena wore karogo tala Kaem ko den taman. Se tom Peter peleram Jerusalem namaram, mu kari nungumik guang batoga ko munan ko baluwaman mu ining tuman, ale balman, “Ni kari nungumik guang me batoga wore nunga kawam ningi namerem, ale arungak na naem!”

Se Peter mel suen biya aratam mu ko dugu duap ninguru balukaso. Nu balam, “Ani Joppa wonong te baga se ngatangawa ipingirem ale mel bo iwita arigem. Mu guang biya wore iwita, ko bewelak ilagala ilagala taiti kuali wore iluman ale bita bita taman se aningate tai kaparam. Se ani ningi loagerem ale wonong ko mel, giarum ko mel, ma urer, inanganang, mu arigem. Ale kuring bo iwita aga manarukaso, ‘Peter, bares nunga moar ale noko,’ makaso.

“Bare ani balem, ‘Kari Biya, ani me naikko pa! Ani ulengkala mel karur ago me nokasam.'”

“Se kuring udagi tala aking balam, ‘Mel Kaem balam “karur mena” mam, mu ni me balu “karur ago” meko.’ 10 Munan mu tom ilagala suwan ko aratam. Se aking tagiman se tarigiram.

11 “Se tairate kari ilagala suwan kawam ani te bagerem mu te tai arataman. Kari bo Caesarea bagaram wore nunga maonam se aningate taiman. 12 Se Korang Bur ani arungak namirikko mu me angamin yenerukko mam. Se arungak namerem. Se Joppa kari 6 sanamiwasan imi mu ago agarak namaman. Nama Caesarea arataman ale Cornelius ko kawam ningi kasu naguman. 13 Se nu iwita nanga maonam, nu engel bo ko kawam ningi aratu sanamaram se arigam mam. Se engel iwita nu maonam, ‘Kari sang nunga manaru se Joppa namomon ale kari ko nup Simon, se ko nup bo Peter, mu aringimon ale ilak taimonko. 14 Se nu den ka manuk se den mu te Kaem ni se, ka imet kuriang, se ka bagara suwan ninga sangaru taukko.’ Engel buta Cornelius maonam.

15 “Se ani den duap beterem mu Korang Bur ananangate giram kaparam uwutatala nongote tai kaparam. 16 Se ani den Kari Biya ulengkala nanga maonam mu angamin te tairam, ‘John yu te kariimet nunga anukaso. Bare nina mu Korang Bur ningimik ago terong maukko,’ mam.
Acts 11:16 Bala bo mu iwita: “Bare nina mu Korang Bur te anuwa talko.”
17 Se munan koma suwanta ana Kari Biya Jesus Kristus ko nangamang ningi nunguning aram se Kaem nangaram iwitatala nuna nungaram. Se ani awuk ta Kaem koma kalikko? Mena! Mu nu Kaem, munan beteram!”

18 Nuna Peter ko den mu ikiman ale nuna kute ma muruwuman. Ale Kaem nup patawukasan ale balukasan, “Kariimet Juda ko mena mu ago Kaem ko ikimon, giris palagomon, ale marak yawara tamonko Kaem lage korang kagaru nungaram.”

Kris alo Antioch sor te

19 Nuna Stephen moman se kueram tom mu te nuna Kris alo ninguru nunga bita maguwukasan. Se nagu parasakasan.
Acts 11:19 Kris alo nagu parasaman: Acts 8:1-4.
Sang awar biya Phoenicia, Cyprus, se Antioch nama gilingiman. Ale Juda alo sor mu te animan mu la den gilalong yawara nunga manarukasan.
20 Bare sang, nuna Cyprus tual se Cyrene wonong ko kari, mu nuna Antioch namaman ale Greek kari agotala Kari Biya Jesus Kristus ko dugu duap yawara mu nunga manarukasan. 21 Kari Biya ko sokel nuna arungak, se kariimet motam biya giris palagaman ale Kari Biya ko nongomang ningi nunguning aram.

22 Se Kris alo Jerusalem anira mu den mu ikiman ale Barnabas manorman se Antioch namaram. 23 Ale mel ningo Kaem nunga ningi bitakaso mu arigam ale amilmilaram. Ale nuna tom suen biya Kari Biya kuring karo se ko nungamin tugu se lagomonko nunga maonam. 24 Barnabas kari ningo, Korang Bur nu kumik ago terong mam, se noko gomang ningi nunguning aora garagar. Se kariimet suen biya Kari Biya ko nongomang ningi nunguning aram.

25 Se Barnabas Saul kupok arigokko Tarsus wonong te namaram, 26 arigam, ale ilak peleman Antioch taiman. Nuna ilagala yar suwanta ko Antioch baga se kariimet motam biya Kaem den nunga kasurukasan. Se Antioch sor te nuna giriman olekem alo nunga balman “Kris kariimet” maman.

27 Tom mu te prophet sang Jerusalem beteman ale Antioch tai gilingiman.
Acts 11:27-28 Prophet sang Antioch bagakasan: Acts 13:1; 15:32. Agabus: Acts 21:10-12.
28 Se nunga ningi bo, ko nup Agabus, mu barasam ale Korang Bur ko sokel te balam, karak biya wonong suen biya te aratukko mam. (Se udagi, tom Claudius Rome nunga Caesar bagakaso mu te, mel mu aratam.) 29 Se Kris alo nunga sikisaki Judea bagaman mu nunga sangarmon ale manga betemonko balman, nongota nongota nunga nungumik te manga mel aniso mu ko iki se te nungarmonko balman. Ale nuna butata beteman, ale manga Barnabas Saul nuguting te awuman, se giman ago Judea ningi Kris supuling alo nongote namaman ale nungarman.

30 

Copyright information for `WSK