Acts 12

Herod balam se James moman se kueram, se Peter talipaman

Tom mu te King Herod Kris sang nunga bita maguwura duap beteram.
Acts 12:1 Herod imitang mu Herod Biya ko numas bo, ko nup Herod Agrippa I. Nu A.D 44 te kueram.
Nu balam se John ko laun James dogotak batagorman. Se nu munan beteram umu Juda kariimet ko kueman se arigam, aking Peter taliparam. Mu Bread Yeast Mena ko tom te Peter iluwam ale talipara ningi beteram, ale kager kari sang nuguting te beteram se bitarukasan.
Acts 12:4 Kager kari nunga tom 16, bare motam ilagala ilagala, se kowar motam te kari ilagala ilagala taikasan ale Peter bitarukasan.
Herod iwita ikikaso, Passover ko tom menaruk asele nu Peter tauk kariimet nomotam te bitiruk ale ilak den arigokko.

Se Peter talipara kawam ningi am bagakaso se bitaruwakasan. Bare Kris alo Kaem nu sangukko sokel ago ngatanga se bagakasan.

Engel Peter talipara ningi wore tam ilak watingi aratam

Ukirok se Herod Peter ilak den arigokko. Se turom umu te Peter kager kari ilagala mu nunga kusumuri aniwakaso. Nuna mayang te talipaman. Se talipara kawam mu ko songkuring biya mu te kager kari sang bitaru se sanamiwakasan. Se tairatela Kaem ko engel bo Peter beta dugu te sanamaram se kuwim nuna te bagaman mu nikitang pagam. Ale engel mu Peter beta te kau tam ale mumam, ale balam, “Tairate baresko!” mam. Se mayang Peter kuting te mu kutukutuk mam kaparam.

Se engel nu maonam, “Ka siru luan kalo ale ka siwik tuagu tugumko,” mam. Se butata beteram. Se maonam, “Ka kimik guang to nagur ale agowom karoko.” Se Peter kuwim mu beteram ale engel kowom kaoram. Bare nu engel mel nunguning bitakaso mu me ko ikikaso, nu am ipingiso ko iwita ikikaso. 10 Se nuna aolak iluman kager kari motam motam mu nunga kiaman, udagi mu nunga kiaman, ale tai songkuring ain mu te watingi aratomonko. Se songkuring umu yam kota kaigam, se nuna ilagala arataman ale lage bo te aolak iluman nama engel tairatela Peter beteram.

11 Asele Peter ko ikia dirmam se balam, “Nunguningta imi ipingira mena, imi mel nunguning!” mam. “Kari Biya ko engel maonam se tairam ale Herod kuting te aga bataguru tam, ale Juda mel betemonko ikia to se animan mu ningi aga bataguru tam.”

12 Nu mu ko ikiam, asele John, ko nup bo Mark, wore ko nuam Maria ko kawam te namaram. Kariimet suen biya kawam mu ningi biguwuman ale ngatangawakasan. 13 Se Peter songkuring moram se ura imet itiwik bo ko nup Rhoda songkuring kagukko tairam, 14 ale nu Peter ko kuring dogotak ikiam ale gomang ninguru amilmilakaso. Se songkuring me kaogam, nu am naguram kasu naguram ale nunga maonam, “Peter watingi songkuring te sanamiwoso!” mam. 15 Bare nuna nu manorman, “Ni ngualasam,” maman. Bare nu balam, “Nunguningta!” mam. Se nuna balman, “Mu noko engel,” maman.

16 Bare Peter am songkuring bong bong mawakaso. Se nuna songkuring kagorman ale aringiman ale ninguru tengeman. 17 Peter kuting te kawus mamonko nunga maonam se kawus maman, se Kari Biya nu talipara ningi bagaram se aguwaya tam ale ilak aratam mu ko dugu duap nunga maonam. Ale balam, “Nina James se nanga sikisaki ago nunga maonalko.” Nu uwuta balam asele nunga beteram ale kuwim bo te namaram.

18 Se ukiram tumongola kager kari ninguru biririkiman, ale nunumi isaru gurugumukasan, “Peter apalak namaram a?” makasan. 19 Se Herod balam se ko kari Peter kupukasan, bare me aringiman. Se nu kager kari den ningi nunga awuram, ale nunga isarukaso, ale balam, nunga momon se kuemonko mam. Udagi nu Judea sor beteram ale Caesarea namaram bagakaso.

Herod kueram

20 Herod Tyre Sidon kariimet nunga ninguru gomang magakaso. Se nuna sang biguwuman ale aringimonko namakasan. Ale giriman Blastus, Herod ko saonga kari biya bo, mu nunga sangukko isarman, se nu aing mam. Nononga nongomang mu Herod nuna nogo ko gomang nungeruk ale lila arukko se ko balukasan. Mu awuk, nuna king Herod ko sor te na inang diakasan.

21 Se tom Herod balu beteram mu te nu ko guang maiya mu naguram, ale ko daiga kuwim biya te daigam, ale kariimet den nunga manarukaso. 22 Se nuna aiman balman, “Mu kari bo ko kuring mena, mu kaem bo ko kuring baluwoso!” maman. 23 Se tairatela Kaem ko engel Herod kuera tuam, se yes gotektek gomang tuagu no gilingiman se kueram. Mu awuk, kariimet noko nup patawukasan, bare nu me nunga manarukaso “ani kaem mena” ma me nunga manarukaso, ale Kaem nup me patawukaso.

24 Bare Kaem ko den gilalong yawara am pagakaso, ale sokel ago sor suen biya te namakaso.

Barnabas Saul ilak Jerusalem ningi nunga ura menawuman, asele John, ko nup bo Mark, mu taman ale ilak Antioch peleman namaman.

25 

Copyright information for `WSK