Acts 17

Thessalonica kariimet Paul Silas ilak nunga momonko karogo kaeyakasan

Nuna aolak iluman nama Amphipolis, se nama Apollonia, se nama Thessalonica arataman. Wonong mu te Juda nunga synagogue bo karogo. Se Paul pempem bitakaso butata beteram, ale synagogue ningi kasu nagukaso, ale Sabbath ilagala suwan ko nu Kaem ko batoga nunga manarukaso. Ale Kristus ikup yaman biya giok ale kueruk ale aking barasukko mu Kaem ko batoga te giram balam mu nunga kasurukaso. Ale balukaso, “Kari Jesus, ani ko duap ninga manorsam, borta Kristus,” makaso. Se kariimet den mu ikiman ale nunga ningi Juda kariimet saki mu se, Greek kari suen biya Juda nunga munan ningi animan mu se, imet bibiya suen nuam tala mu Kristus ko nongomang ningi nunguning aram, se Paul Silas ilak nogowom karokasan.

Bare Juda sang nongomang goroger pagam. Se namaman kari memek sang nunga sangarmonko mu nunga giman se tai biguwuman ale kariimet nongomang atumukasan se ngata nirung barasukaso. Asele nama Jason ko kawam taluru gilingiman ale kasu naguman Paul Silas ilak nunga kupukasan, nunga gimon ale arungu aratomon kariimet nomokete nunga awumonko. Bare me nungarkaman. Buta se nuna Jason se Kris kari saki arungu nunga iluman, ale nunga tagiman arungu wonong supuling alo nongote namaman, ale balukasan, “Kari ari munan memek sor suen biya te beteman mu aitak tai imi te arataman! Se kari Jason imi amilmil nungaram se ilak ko kawam te bagasan. Nuna suen la Caesar ko munan den kiasan, ale king bo bagoso, ko nup Jesus, ma balsan.”

Se kariimet motam biya, se wonong supuling alo den mu ikiman biririkiman ale nongomang ikuwakaso se nirung bitakasan. Se supuling alo Jason ko kari saki ago nunga manorman, “Nina ninga den imi menawuralko, mu manga te diaral bore asele namaralko.” Se manga nungarman ale nama gilingiman.

Paul Silas ilak Berea sor te ura bitakasan

10 Turom batagam, asele turom umutang te la Kris alo Paul Silas ilak nunga awuman se Berea namaman. Nuna nama arataman mu dirmaman Juda nunga synagogue ningi namaman. 11 Juda kariimet Berea wonong ningi bagaman mu nunga ikia ningo nuam, nuna Juda alo Thessalonica ningi bagaman mu nunga kiaman. Se Paul den balukaso mu ikikasan ale ninguru ko kuakasan. Ale tom suen biya te nuna Kaem ko batoga kaukasan, mu Paul ko den mu nunguning agi kawel agi wore te ikimonko. 12 Nunga ningi suen la Kristus ko nongomang ningi nunguning aram. Se Greek kari suen biya, se Greek imet nunup ago mu suen biya agotala nongomang ningi nunguning aram.

13 Bare udagi te Juda alo Thessalonica ningi bagaman mu Paul Berea ningi Kaem den baluwoso mu ikiman. Ale wonong mu te karogo tai gilingiman, ale kariimet Paul Silas arungu kagermonko nunga nongomang atumukasan, ale nunga ikia ngualuwukasan. 14 Se Kris alo Paul tairate beteman se wonong langi mu te nama kaparam. Bare Silas Timothy ilak mu am Berea bagakasan. 15 Kari Paul taman mu ilak Athens nama beteman. Ale pelemonko, se Paul nunga maonam, Silas Timothy tairate aningate taimonko mam.

Athens sor te

16 Paul nu Silas Timothy ilak nunga kimi bita se, kaem kawel wonong mu ningi ninguru terong mam mu arigam ale mel mu ko ninguru gomang ikuwuram. 17 Se nu Juda nunga synagogue ningi namakaso, ale Juda alo, se Greek kariimet Kaem ko nguangakasan, mu arungu balukaso. Ale tom suen biya namakaso kuwim kariimet te nama tai biguwuwara mu te den nunga manarukaso.

18 

Se ikia kari saki, nunga balsan Epicurean
Acts 17:18 Epicurean kariimet mu kari bo nup Epicurus (B.C 340-270 te iwita) mu ko ikia karo tuikasan. Nuna ikiman ali mel suen la kota aratam, Kaem bagoso mu me ko ikiman. Nunga ikia mu ali imi te ko bagara ningo kutek am ?? amilmil mu te la bagomonko kuakasan, ale ikup yaman nungumik te tairukko me ko kuakasan. Bare Kaem ko den mu buta me baluwoso.
se Stoic
Acts 17:18 Stoic kariimet mu Cyprus kari nup Zeno (B.C 340-265 te iwita) wore ko ikia karo tuikasan. Mu nunga ikia mu amilmil se nongomang bataga ko munan mu nuna miakasan. Nuna ikikasan bagara diram mu mel biya, bare nongota nunga sail te se nunga ikia te la bagomonko kuakasan. Pantheistic.
masan, mu nunga saki nu ilak den tagikasan.
Acts 17:18
Sang balukasan, “Kari den ngual ngual baluwara wore anape balukko ago kaeso!” Se sang balukasan, “Nu sor saki nunga kaem sang nunga duap balso agila pa?” makasan. Mu awuk, Paul Jesus kueram ale aking barasam wore ko duap balukaso.
19 Se/Ale Paul taman ilak kari supuling nunga balsan Areopagus masan mu nongote namaman. Ale nu manorman, “Ana den iru ni kariimet nunga manorsam wore ikinakko. 20 Mu ni den sang iru ko ikia kigilikta balem se ana ikiman ale ninguru ko duap ikinakko.” 21 (Athens kariimet, se sor saki ko kariimet Athens ningi bagakasan, mu nuna mel bo kigilik me bitakasan, am den ikia iru owore la munaka iki gurugu se nunga tom menawukasan.)

22 Se Paul Areopagus kari bibiya nomokete sanamaram ale balam, “Athens kari,” mam, “ani nina suen la ningarkasam nina kaem nunup patowara ko kari nunguningkiri. 23 Mu awuk, ani geragem ale ninga kaem mel nodora te nunup patowasan mu nungarkem, ale geragawa kuwim bo karogo arigem, mu nuna garek bo iwita batagorman, ‘Imi kaem bo ana me ko ikisan wore ko kuwim nungurman.’ Se aria, Kaem nina me ko ikisan bare ko nup patowasan, mu ko dugu duap ani balik se ikialko.

24 “Kaem ali imi beteram ale mel suen biya ali imi te animonko mu ago beteram, mu borta ali taiti ko Kari Biya, se nu kawam kako kari nuguting te kalo gilingisan mu ningi me bagoso. 25 Nu mel bo ko tukunang aruk se aliti kariimet nu sangarmonko mena. Nu kota marak kariimet nungarso se te marak bagasan, nu kota mel suen biya nungarso. 26 Ale girigir suwanta Adam beteram mu te kariimet suen biya aratomon, ale sor suen biya te dagi namomonko. Ale nu kota kariimet motam suwan suwan nunga ali tom nungaram, ale tom nuna te aratomon ale nama menamonko mu nungaram.

27 “Kaem uwuta beteram, nuna te nu kupumon, ale nama nama aringimonko agila. Bare nu awar me bagoso, nu ana suen la nangarak pingita bagoso. 28 ‘Ana noko te marak tasan, se sokel nangarso se te geragasan, ale nu te la marak bagasan.’ Ninga ikia kari sang iwita balman butata, ‘Ana nunguningta noko kuriang,’ maman.

29 “Ana Kaem ko kuriang bagasan. Buta se ana ikinak Kaem mu mel dora, kariimet nunga ikia, nunga nuguting te, manga, silver, gold mu te nungursan mu turan me ikinakko. 30 Tom ikia mena tom te, kariimet munan uwuta bitakasan mu Kaem am motam la arikaso, bare aitak nu sor suen biya te kariimet lilim la giris palagomonko den sokel ago nunga manarso. 31 Mu awuk, nu den ariga ko tom bo maingkala balu beteram, nu te ali lilim ko kariimet diram la nunga den arigok ale nunga tuterukko. Ale kari den tutera ko ura umutang bitirukko mu agotala balu beteram se bagoso. Ale mel suen la uwutata aratukko mu munan imi te kariimet nunga kausam: kari mu kueram se aking Kaem mumam se barasam.”

32 Paul uwutata balukaso. Se nuna kari kueram ale barasam wore ko den nu balam se ikiman, mu sang nu gusirukasan. Bare sang balman, “Ana udagi ni kiring te den sumu ikinakko,” ma balman. 33 Mu te Paul biguwura mu beteram. 34 Bare kari sang nu kowom karokasan ale Kristus ko nongomang ningi nunguning aram. Bo mu Dionysius, nu Areopagus motam wore ko kari, se imet bo ko nup Damaris, se kariimet sang karogotala.

Copyright information for `WSK