Acts 18

Paul Corinth wonong ningi ura bitakaso

Udagi Paul Athens beteram ale Corinth namaram. Ale Juda kari bo, ko nup Aquila, ko wonong duap Pontus, mu arigam. Ulengkala nuam, nu ko nuwus Priscilla ilak Italy beteman ale tai gilingiman, mu awuk, Rome ko kari biya Claudius iwita balam, Juda suen la Rome betemon ale namomonko mam. Se Paul nungarkukko namaram, ale eng arungak bagakaso. Mu awuk, nu kawam sel nunga ko kari tala, se arungak ura tokaso. Nu Sabbath suen biya te synagogue ningi namakaso, ale Juda se Greek kariimet Kristus ko nongomang ningi nunguning arukko nunga manarukaso.

Udagi Silas Timothy ilak Macedonia beteman ale tai kapaman, mu te Paul den apura ko ura mu la bitawakaso. Ale Juda alo nunga manarukaso, “Jesus mu Kristus, kari nina ko kimi bitawasan borta,” makaso. Bare nuna noko den biriruwukasan ale den memek manarukasan. Se te ikimonko ko guang tam ale sisuwuram, ale balam, “Nina ikup memek bo arigal, mu nenenga mel / ikup ko koma! Ani angimik den mena. Se aitak ani kariimet Juda ko mena wore nongote la geragikko.”

Buta balam, asele synagogue beteram, ale kawam mu duap te, Titius Justus mu ko kawam te namaram. Kari mu nu Kaem ko ikikaso, ko nup patawukaso. Se synagogue ko kari supuling, ko nup Crispus, nu ko kuriang imet ago Kari Biya ko nongomang ningi nunguning aram. Se Corinth suen biya tala Paul ko den ikiman ale Kristus ko nongomang ningi nunguning aram se anuwa taman.

Se turom bo te Paul ipingira te mel bo ariwaram se Kari Biya iwita maonam, “Paul, ni me nguangerko. Sokel ago am balu sagerko, me kawus meko. 10 Ani nikerak bagasam. Se kari bo me ka moruk maguwurokkowo. Mu awuk, wonong imi ningi aninga kariimet suen biya tala anisan.” 11 Se Paul yar suwanta ko sige 6 ago Corinth ningi baga se Kaem ko den nunga kasurukaso.

12 Bare udagi, tom Gallio Achaia sor ko kari biya bagakaso, mu Juda alo biguwuman ale Paul taman ilak den ariga kari bibiya nongote namaman, 13 ale balman, “Kari imi,” maman, “kariimet Kaem nup patawomonko nunga manarso, bare munan nu nunga kasurso mu anananga Law Den beteman se aniso wore batagarso!” ma balman.

14 Se Paul den balukko negawaram bare Gallio nu Juda alo nunga maonam, “Nina Juda alo,” mam, “kari imi munan bo kiaram agi memek beteram ale mu asele, ani ninga den ikisam ale. 15 Bare nina taiman den balsan mu nengeta ninga Law Den se nengeta ninga bala tagira gurugumura, se nengeta nungalko! Ani mel uwutata mu ko den arigekko me kuesam.” 16 Gallio uwuta balam ale Juda alo nunga den mu karogo nunga kaoram.

17 Se nuna nunga synagogue ko supuling Sosthenes iluman, ale kawam te den tagiman mu ko songkuring ago moa maguwuman. Bare Gallio mel mu ko me ikia moakaso.

Paul peleram Syria sor te Antioch namaram

18 Paul Corinth ningi kam maiya nuam ko baga, udagi Kris alo arungak amilmilaram ale nunga awuram, ale Priscilla Aquila arungu dal Syria namurukko mu taman. Me namaman la, nu Cenchrea wonong te noko mone batogam, mu awuk, nu mel bo bitirukko Kaem maonam mu bita kutuwuram se ko kausa mu beteram.
Acts 18:18 Paul ko mone batogam: Num 6:18. Change order? Cenchrea mu dal te yeromonko kuwim biya bo te anikaso, Corinth ko pingita, koma worem bausa wore te.


19 Dal te nama Ephesus arataman, ale sor mu te Paul nu Priscilla Aquila ilak nunga awuram. Ale nu kota Juda nunga synagogue ningi namaram ale Juda alo arungu munakakaso. 20 Se nuna nu kam maiya nuam arungak bagurukko isarman. Bare nu balam, “Ani nengerak me bagirikkowo,” mam. 21 Bare tom nu nunga bita se mu nu balam, “Kaem baluk mu ani nengete pelerik tairikko.” Ale bagomonko balu se namaram ale dal te aragam, se dal Ephesus beteram Caesarea namakaso. 22 Dal nama Caesarea aratam, mu nu Jerusalem namaram Kris alo woremkalal yawara nungaram ale arungu amilmilaram. Asele peleram Antioch tairam.

23 Ale nu tom maiya nuam Antioch baga, udagi te aratam Galatia se Phrygia ko wonong wonong te geragakaso ale Kris alo sokel nungarukaso.

Apollos Ephesus sor te den balukaso

24 Se Juda kari bo, noko wonong duap Alexandria, mu Ephesus tairam. Noko nup Apollos. Nu Kaem den balukko kari ningo, ale nu Kaem ko batoga suen biya ninguru ikikaso. 25 Nu ko wonong te nuna Kari Biya Jesus ko dugu duap mu kasurman se ikiam, ale nu wuli ago la Jesus kowom karukko kaeyakaso, ale Jesus ko duap dugu diram la kariimet nunga manarukaso. Bare nu John anuwa ura beteram mu la ko den ikikaso.
Acts 18:25 John anuwa ura bitakaso: Luke 3:3; Acts 1:22; 19:3. QQQ Jesus anuwa ta ko munan den balam: Mat 28:19. Acts 2:38 ago arikko.
26 Nu synagogue ningi namakaso ale den sokel ago balukaso. Se Priscilla Aquila ilak ikiman, ale nu taman ale Kaem ko lage diram nunguningkiri nu kasurman se ikiam.

27 Udagi Apollos Achaia sor te namurukko mam. Se Ephesus wonong ko Kris alo balman, mu terong pa, namarko maman. Ale tam gawa bo bataguru sor mu ko Kris alo nongote beteman se namaram, Apollos namuruk mu nuna ilak amilmilomonko ma balman. Se Apollos Achaia sor te namaram, ale kariimet Kaem gomang nungaram se Kristus ko nongomang ningi nunguning aram mu ninguru nunga sangarukaso. 28 Mu nu kariimet nomotam te den sokel ago balukaso ale Juda nunga den menawukaso, ale Kaem ko batoga te nunga kasurukaso, Jesus mu Kristus makaso.

Copyright information for `WSK