Acts 20

Paul Macedonia se Achaia sor te geragam

Kariimet nunga nirung menaram se Paul Kris alo nunga auram se kote taiman. Ale den sang nongomang te aurok se amilmil ago bagomonko mu nunga maonam, asele nunga beteram Macedonia namakaso. Ale sor mu te geraga se Kris alo nongomang te sokel ago bagomonko den suen biya nunga manarukaso. Nu udagi te Greece sor te nama aratam.
Acts 20:2 Achaia province ko nup bo mu Greece, se nup Greece mu Greek den te Hellas masan. Ko wonong biya mu Corinth.
Ale sige ilagala suwan mu te bagakaso.
Acts 20:3 Paul Corinth baga se tam gawa bo Rome Kris alo nongote beteram se namaram: Rom 15:26-28.


Udagi nu dal tauk ale Syria namurukko negawaram, bare Juda alo nu momonko den nungurman se ikiam. Se nu suwik te Macedonia ningi namuruk ale asele Syria namurukko mu ko ikia tam.

Sopater, Pyrrhus ko kuriang, nu Berea kari, mu nu Paul ilak namaram. Se Thessalonica kari ilagala Aristarchus se Secundus, se Gaius nu Derbe wonong ko kari, se Timothy, se Asia sor ko kari ilagala Tychicus se Trophimus, buta nuna ago Paul ilak namaman. Kari umu giriman Troas nama arataman ale anananga kimi bitakasan. Se ana Philippi wonong te Juda nunga Bread Yeast Mena ko tom biya mu aringiman, asele ana dal te aragaman ale namakasan, ale tom 5 mu te ana nama Troas arataman nungarkaman, ale ubou suwanta ana suen la Troas bagakasan.

Eutychus kueram aniwaram se Paul mumam se barasam

Se Saturday bainga turom
Acts 20:7 Kariimet saki ikisan mu ubou bainga turom. Juda alo nunga ikia te worem nama kaparam mu te Sabbath tom menaram(??) se tom iru duap beteram. Greek alo nunga ikia te days started at dawn.
ana pasa nanakko biguwuman. Ukirok se mu Paul Troas bitirukko, se nu kariimet den nunga kasuru se nunga manaruwaram se nama uriluan aram.
Kuwim kualala ana te bagakasan mu galep suen biya kaniwakaso. Se kari kulak bo, ko nup Eutychus, nu songkuring ago dagiwakaso. Se Paul am munakawakaso se Eutychus motam aniram se aniram kueram ale kualala biya wore tai aliti dagulam. Se nuna kapaman patowaman, bare nu maingkala kueram.

10 Se Paul tai laga kaparam ale kuriang kulak mu awete tararam, ale iluwam yasaram ale nunga maonam, “Nina me neneman sisirokko,” mam. “Nu marak bagoso!” mam. 11 Ale Paul aking kuwim kualala mu te nama tarigiram, ale bread mu paogam ale nongorak nam. Ale den maiya biya arungu baluwaram se nama sor ukiram. Asele nu nunga beteram ale namaram. 12 Se kari kulak mu marak bagaram se taman ilak namaman. Ale nongomang ninguru nungeram.

Nuna Troas beteman ale Miletus namaman

13 Paul ko gomang butata se suwik te Assos namawaram se ana dal te giriman namaman, 14 se mu te nu ana nangarkam. Asele ana suen la biguwuman dal te Mitylene wonong te namaman. 15 Se animan ukiram se Mitylene beteman ale nama tual Kios arataman, ale aking animan ukiram se nama tual bo tala Samos mu te arataman. Ale animan ukiram mu ana nama ali biya wonong Miletus mu te arataman.

Paul Ephesus Kris supuling saonga den nungaram

16 Paul Asia sor te wonong Ephesus mu te me sanamurukko ikia tam. Mu awuk, nu tairate Jerusalem namuruk ale mu te Pentecost ko tom biya arigokko terong mam agi, ewere ko ikikaso. 17 Se ana nama Miletus arataman mu Paul Ephesus Kris supuling nukote taimonko den beteram se nongote namaram. 18 Se nuna nu kote taiman se nu nunga maonam,

“Nina ikisan, ani motam motam Asia ningi tairem ale nengerak bagakasam, mu aninga bagara aolak nina ta arikasan.
19 Tom suen biya Juda alo aninga ura menawumonko balukasan, se ira ariga suen biya agate taikaso. Bare ani agata aimi karogo kapakasam ale amononge kapa se ura Kari Biya aisam mu la bitakasam. 20 Nina ikisan, ani den bo ta me kaluwukasam, ani den nina ninga sangukko mu apurekko me nguangakasam. Ani biguwura te se ninga kawam kawam te ani ninga kasurukasam. 21 Ale den aora biya Juda alo se Greek alo nunga manarukasam, nononga memek nubiring tumon ale Kaem kote namomon ale nanga Biya Jesus Kristus ko nongomang ningi nunguning arukko nunga manaru lagakasam.

22 “Se aitak ani Korang Bur kuring karo tusam ale Jerusalem namasam. Se owola anapeya angimik te aratukko ani me ko ikisam. 23 Bare mel imi ani ko ikisam: sor suen biya te ani taikasam mu Korang Bur den aora biya aninga manarukaso ale balukaso, ‘Ni talipara ningi namar ale ikup yaman suen biya arikko,’ ma balukaso. Umutang ani ko ikisam. 24 Bare ani marak bagirikko agi, aga momon se kuerikko agi, wore aninga ikia te mu mel gotek iwita ikisam. Ani mel suwanta ko ikia aga moso, mu Kari Biya Jesus ura aisam, ko den gilalong yawara Kaem ko kariimet gomang nungaram mu nunga manik ale ura bita kutuwurikko, umutang suwanta ko aeman sisiso.d

25 “Bare aitak ani ikisam, ani ninga ningi geragakasam ale Kaem ko kingdom ko den ninga manarukasam, bare udagi nina bo ta me ani agarkalko. 26 Buta se aitak ani nina ikialko den aora biya ninga manorsam, ninga ningi bo sarenga namuruk, mu aninga ikup mena. 27 Mu awuk, ani Kaem ko kuring ninga manaru saperem, den bo me ta ira kaluwurem.

28 “Buta se nina supuling alo, nina nengeta ninimi ko sinar to se, Kaem ko kariimet suen la ago ninguru nunga sinar talko. Nu kota ko gue te nunga dia tam. Se nina mu, Korang Bur kariimet umutang nunga bitua kari alo ninga awuram se bagasan.
Acts 20:28 Supuling alo nunga den: 1 Tim 4:16; 1 Peter 5:2-4.
29 Ani ikisam, ani ninga bitirik ale namirik, mu udagi te kausik diwang ninga ningi taimon ale sipsip nunga maguwumonko. 30 Se nengeta ningi tala, kari saki barasomon ale den kawel kawel balmon, ale te Kris alo nunga tagimon se nogowom karomonko karogo kaemonkowo. 31 Buta se nina ninguru sinar talko! Nina mel imi ninguru ko ikialko: Yar ilagala suwan ningi, turom woremkalal ani nina suwan suwan ikia ningarikko katir me bita tokasam. Ani amononge kapa se ninga kasurukasam.

32 “Se aitak ani Kaem kuting te ninga awusam, nu ninga sinar taukko. Noko gomang ningaram mu ko den ko ikialko. Se den mu sokel ningaruk se mel ningo suen biya, kariimet noko ma balam mu nungarukko, mu nina agotala ningarukko.

33 “Ani bo ko silver, ko gold, se ko guang mu ko angamang me barasu arigam. 34 Nina nengeta ikisan, ani agata ura iluwem, ale anapeya ani ko tukunang arem mu ko ura iluwem ale agata aimi sangem, ale saki agarak bagaman mu ago nunga sangem. 35 Ani mel suen biya bitakasam mu te ani ninga kausem, nengeta ninga ura kowar te kariimet saki nunumi sangarmonko me terong mu te nunga saongalko. Kari Biya Jesus kota ko den bo balam wore ana ko ikinakko, ‘Kari mel taso mu ko amilmil katirta. Kari ko melmasak saki alo nungarso mu ko amilmil biya.’”
Acts 20:35 Anananga manga melsak mu saki alo te nunga sangornakko: Mat 10:8.


36 Paul den imi balu kutuwuram, asele bugura kulukuam daigam, ale supuling supuling mu arungak ngatangakaso. 37 Udagi te nuna suen la niakasan, ale Paul iluman ale kol misikikasan. Paul nunga maonam nuna udagi moke me aringimonko mam, se umutang ko nuna nongomang ninguru batagakaso. Se Paul diruwuman ale dal te betemonko ilak namakasan.

38 

Copyright information for `WSK