Acts 21

Paul nama laga Jerusalem aratam

Ana nunga beteman ale dal te aragaman, se dal nangarak aratam mu ana dirmaman nama tual Cos mu te namaman. Ale ukiram se nama Rhodes mu te arataman asele aking nama Patara arataman. Ale mu te dal bo Phoenicia namurukko negawaram mu aringiman, ale te aragaman ale namakasan. Ale nama tual Cyprus ari se, koma sengam mu te arataman, ale eng nama Syria sor te arataman. Se dal nangarak nama Tyre wonong te yereram, mu te meltutuk dal ningi mu gimon se aratukko.

Se wonong mu te ana Kris alo sang nungarkaman, ale ubou suwanta ko nongorak bagakasan. Se nuna Korang Bur ikia nungarukaso se te Paul manarukasan, “Ni Jerusalem me namarko,” makasan. Bare anananga tom te arungu baganakko mu menaram, mu ana lage tanakko barasaman. Se aking nuna suen la nunga imet kuriang arungu nangarak tai wonong buring ko arataman, ale tai langi kapaman. Ale mu te ana suen la nabugura kulukurman ale ngatangaman. Asele nuguting ilu namaman. Ale bagomonko nunga manaru se ana dal te aragaman, se nuna peleman uningi namaman.

Ana Tyre beteman mu dal nangarak nama Ptolemais arataman. Ale mu te Kris alo nungarkaman, ale tom suwanta ko mu te arungu bagaman. Ale ukiram se aking ana Ptolemais beteman nama Caesarea arataman. Ale dal beteman ale Philip, evangelist kari, kari 7 saonga ura betemonko nunga balman wore nunga ningi bo, wore ko kawam te namaman ale ilak bagaman.
Acts 21:8 Philip mu saonga kari 7 wore nunga ningi bo: Acts 6:3-6.
Noko nanawus ari ilagala ilagala kari me giman, am baga se Korang Bur te Kaem ko den balukasan.

10 Ana tom sang agotala umu te bagaman, se prophet bo nup Agabus mu nu Judea beteram tai kaparam. 11 Nu ananangate tairam ale Paul ko mayang luan te kalowaram mu kutuwuram, ale kota ko sowek kuting te taliparam, ale balam, “Korang Bur iwita balso: ‘Juda alo Jerusalem bagasan mu mayang imi ko kotam iwita ilumon ale talipomon, ale kariimet Juda ko mena mu nuguting te betemonko.’”

12 Se ana den umu ikiman mu ana, se sang nangarak bagaman, mu Paul Jerusalem me ta namurukko manarukasan. 13 Bare Paul balam, “Nina anape ko niasan ale ani angamang batagorsan? Ani Jerusalem ningi Kari Biya ko nup ko aga talipomon agi, aga momon se kuerik agi mu, terong tala, ani me nguangasam.”

14 Paul buta balam, se ana ikiman ana noko ikia mu kalonakko me terong. Se ana am kutek maman, ale balman, “Kari Biya ko gomang te aniso mu ko nunguning am aratukko,” maman.

15 Umu te baga melmasak nungurman ale aking Jerusalem namaman. 16 Se Caesarea sor ko Kris kari sang nangarak namaman, ale kari ko nup Mnason ko kawam te aninakko nangarak namaman. Mnason mu Cyprus kari, nu ulengkala biya Kris kari ko aratam ale bagakaso.

Paul nama James arigam

17 Ana nama Jerusalem arataman, se Kris alo amilmil ago la tai nangarkaman ale nagiting iluman. 18 Se ukiram se Paul nangarak James arigokko namaram. Se Kris supuling suen la umu te ago bagaman. 19 Se Paul nuguting iluwam arungu amilmilaram, asele tom nu sor saki ko kariimet ningi ura iluwakaso se Kaem noko ura ningi munan suen biya bitakaso, mu nunga manaru saparam.

20 Se nuna den mu ikiman ale Kaem nup patowaman. Ale Paul manorman, “Nanga bo, ni arikko,” maman, “Juda alo thousand awilaya Kristus ko nongomang ningi nunguning aram! Ale nuna suen la Juda nunga munan bibiya se munan gotektek mu ninguru ilukuawusan ale karo tuiwasan. 21 Kari saki ni ko ko balman se nuna ikiman, ni Juda alo sor saki ningi bagasan mu Moses ko Law Den nubiring tumonko nunga manarukasam, nuna nunga kuriang nungumik guang me batutumumonko, ale anananga munan me karo tumonko balukasam. 22 Se ana awuk manak? Nuna ni tairem mu ikimonkowo! 23 Buta se ana munan bo ni bitarko balnak, mu yam bitarko. Anananga kari ilagala ilagala imi te bagasan, nuna Kaem koma te mel bo betemonko den nungurman ale bagasan. 24 Se ni kari imitang nunga gi ale munan nuna te nungumik den ikup mena te aratomonko mu arungu bitarko. Ni nunga dier se nuna nomone batagarmon ale turuwumonko.
Acts 21:23-24 Juda nunga munan bo: Numbers 6:13-21.
Ni uwuta bitar se kariimet te ka ikimon, den suen biya ni ko ko balman se ikiman mu den kawel ko iwita ikimon. Ale nuna te ka ikimon, ni keta Law Den kaora ko kari mamonko.

25 “Bare kariimet Juda ko mena wore nongomang ningi nunguning aram umutang, mu ana maingkala den nungurman mu tam gawa te batagorman ale nungarman: nuna na inang kariimet saki kaem kawel te tama tuman mu me namonko ana balman. Ale melsak gue karogo me namonko, se mel saki nunga ilusan ale nodogotak irukusan, mu betela me namonko. Ale saman katagot mu me betemonko.”
Acts 21:25 Tam gawa sor saki alo nungarman: Acts 15:29.


26 Ukiram se Paul kari ilagala ilagala mu nunga giam, ale arungu Juda nunga kilek te karur menawumonko munan umutang duap beteman.
Acts 21:26 Paul Juda alo nunga munan karo tuam ko duap: 1 Cor 9:20.
Asele nu temple ningi kasu naguram ale priest alo nunga maonam, tom amaruya nunga memek mu mena sapuruk se nuna nomoke nomoke nunga meltutuk gimon ale ago tai priest alo nungarmon se te Kaem tama tumonko mu ko nunga maonam.

Paul temple ningi iluman

27 Tom 7 mu menarukko tom pingi aram, se Asia sor te ko Juda kari saki nuna temple ningi Paul aringiman. Ale kari nongomang patowaman, ale Paul iluman, 28 ale aikasan, “Israel kari, nanga saongalko!” makasan. “Kari imitang sor sor geragakaso kariimet nunga manarukaso, ale ana Israel kariimet, se nanga Law Den, se nanga kuwim sor imitang balu maguwukaso. Se mu la mena. Nu Greek sang nunga gikaso, ale arungu temple ningi kasu nagukaso, ale kuwim kako imi karur tuikaso.” 29 Nuna den mu balman, mu awuk, nuna Ephesus kari Trophimus Paul ilak wonong ningi geragakaso se aringiman, ale nungamin tuguman, mu Paul kari umu ilak temple ningi kasu naguram makasan.

30 Se Jerusalem ningi kasik la biririkiman ale am ngual ngual naguman taiman. Ale temple ningi kasu naguman ale Paul iluman tagiman ilak watingi aratuwaman se tempel bitua kari temple kuring bagu gilingiman. 31 Se Paul momon se kuerukko negakasan. Jerusalem ningi nirung ngata biyala barasukaso, se tairate den Rome ko kager kari nunga supuling biya kote namaram. 32 Se nu tairatela kager kari sang nunga supuling ago nunga giam, ale arungu nagu nagu nama arataman. Se nuna kager kari supuling ko kari arungu nungarkaman, mu nuna Paul moawaman mu bita to gilingiman.

33 Se kager kari supuling namaram Paul iluwam, ale mayang ilagala te talipomonko balam. Ale isam, “Mu awiri? Anape awuk mam?” 34 Se kari motam biya bagakasan mu sang aikasan den bo baluwakasan, mu sang aikasan ale den am ngil ngual balukasan. Se nirung biyala, se kager kari supuling mu den ko nunguning me tam. Se nu balam se Paul ilak kager kari nunga nuguwim te ilak namakasan. 35 Se Paul aolak ilu nama titeng irok tarigirukko negawaram, mu kager kari kualala gi gilingiman, mu awuk, kariimet momonko nunguningkiri ilak kaeyakasan se. 36 Ale nuna yam karo se balukasan, “Am moral se kuerukko, moral se kuerukko,” makasan.

Paul kariimet ningi numi duap balam

37 Kager kari alo mu Paul taman ale ilak nunga kawam ningi kasu nagumonko negawaman se nu kager kari nunga supuling biya mu isuam, “Ani den bo ka manik e?”

38 Se supuling mu tingam ale balam, “Ni Greek den te munakasam e? Ani ikikasam mu ni Egypt kari, ulengkata nu ali sor supuling arungu kagerurukko duap beteram, kari kager ko ikia 4000 nunga giam ale arungu sor garagarayam mu te namaram, borta ko ka balukasam.”

39 Se Paul den koma balam, “Ani Juda kari, ani Tarsus, wonong nup ago wore te bilangerem, Cilicia sor te. Se ani ka isarsam, balu se kariimet nunga manikko.”

40 Se kager kari supuling aing mam, se Paul titeng te sanamaram ale kuting te kariimet kutek mamonko nunga manarukaso. Se kutek maman, se Juda nunga den te nunga manarukaso.
Acts 21:40 Tom mu te Juda alo mu Hebrew den te agi Aramaic den te munakakasan. Saki Greek den te ago munakakasan.


Copyright information for `WSK