Acts 26

Paul King Agrippa moke te den balam

Se Agrippa Paul maonam, “Ni keta ka dugu duap baluko ana kuring kisisan.”

Se Paul kuting patowaram, ale noko den koma balukaso.
“King Agrippa,” mam, “ani aitakta ni kema te sanamerem ale mel suen la ko Juda alo den te aga atumusan mu ko koma balikko mu ko amilmilasam. Mu awuk, ni ana Juda nanga munan, se mel ko nainimi ilusan, mu ni ninguru ko ikisam. Mu ko ni aninga den ikiko mu me gagorerko ka isarsam.

“Duap nunguningkiri, tom ani gotektir la, se tai aitak ani garukerem, mu agata aga sor te se Jerusalem ningi, mu aninga bagara aguwaya mu Juda alo ninguru iki sapaman. Ulengkala biya nuna ani aga ikikasan mu ani Pharisee motam ningi bagakasam. Pharisee alo mu nunga munan karo tusan mu aora biya, Juda motam saki nunga munan mu kiaram. Se ani uwutata bagakasam mu nuna ko ikisan, ale karogo balmonko agi mu am balmonko. Se aitakta ani den te sanamiwasam mu ko duap iwita: ani den yawara Kaem anananga taleng girigir nunga maonam mu ko angamang ningi nunguning aram se ko nunguning aratukko mu ko kimi bitawasam.
Acts 26:6 Paul den yawara ko gomang ningi nunguning aram mu iwita: kariimet kueman mu aking barasomonko.
Se Juda motam 12 turom woremkalal Kaem nup patawu se den borta tala ko nunguning aringimonko ko kimi bita se anisan. O king, den yawara ani ko nunguning arigekko kimi betesam borta ko Juda alo ani den ningi aga beteman. Bare kariimet kueman mu Kaem nunga amumok se barasomonkowo! Se nina awuk ikisan ale mel mu ko me nengemang ningi nunguning aso?

“Girakala ani agata betela ikikasam, ani Jesus Nazareth kari mu ko nup menawurikko sail tagirik, mu ani munan diram bitawasam ko balukasam. 10 Ale ani Jerusalem ningi uwutata bitakasam. Ani priest bibiya nongote sokel taem, ale Kaem ko kariimet suen biya talipara ningi nunga awukasam. Ani nunga momon se kuemonko mu ani ago aing makasam. 11 Ani tom suen biya synagogue te geragakasam ale memek te nunga bitakasam, ale nunga nongomang ningi nunguning sapomonko nunga diruwukasam. Ani ninguru nunga angamang magakaso, se nunga bita maguwurikko sor wonong awar awar mu te karogo namakasam.

12 “Se tom bo betelatala ani priest bibiya nongote den sokel taem ale Damascus namakasam. 13 O king, ani lage karem nama worem tai dirmam umu te nikim biya bo taiti kuali tai kaparam se arigem, ko nikim mu worem ko nikitang kiaram. Se nikim mu kari sang agarak namawaman mu arungu nanga taluru gurugam. 14 Se ana suen la ali tuagu te dagulu muruwuman. Se ani kuring bo ana Juda nanga den te
Acts 26:14 Kuring mu Aramaic den agi Hebrew den te Paul arukaso.
te aga arukaso mu ikiem, mu iwita balukaso, ‘Saul, Saul,’ makaso. ‘Awuk se aga bita maguwuwasam a?’ makaso. ‘Ni anape ko keta mel kore karogo wore siwik te atumusam ale nimi yaman tuiwasam?'
Acts 26:14 Bulmakau ko kotam diruwuwoso se sowek buring ko saposo ale tam kore ago te diruwuwoso mu te kota numi moso iwitatala, Paul kota numi yaman tuikaso.


15 “Se ani isem, ‘Kari Biya, ni awiri ya?’

“Se Kari Biya balam, ‘Ani Jesus, ni aga bita maguwuwasam bore.
16 Se aitak barasu sanamirko. Ani nikate aratem, mu ni aninga ura kari ko aratuko ka balsam. Ni aitakta ani agarkem imi ko dugu duap, se mel sang udagi ka kausek mu karogo saki alo nunga manaruko. 17 Ani keta ka kariimet Israel alo, se sor sang ko kariimet nunga ningi ka bataguru taikko. Ani nika betesam, 18 mu nononga nomotam neger se po mauk, se tiromorom nubiring tumon ale giris palagomon nikitang aringimonko. Nuna Satan ko kingdom betemon ale Kaem kote namomonko. Se nu nunga memek siwurok ale nunga giok, ale awiriya ani ago ko gomang ningi nunguning aram se kako anisan mu arungu nunga awurokko.’

19 “O King Agrippa, ani taiti kuali mel mu arigem, mu ani ko kuring me merem. Mena. 20 Motam motam Damascus ningi, se Jerusalem ningi, se Judea sor suen la, se nama sor saki ko kariimet ningi karogo la ani balukasam, nuna giris palagomon Kaem kote namomon, ale nunguningta giris maman mu ko kausa mu munan ningo la betemonko.
Acts 26:20 Nuna giris maman mu ko kausa munan ningo la betemonko: Mat 3:8.
21 Mel umutang ko, Juda alo temple ningi aga iluman ale aga momon se kuerikko ago kaeyakasan. 22 Bare Kaem aninga saongam tai aitak tom imi te ani sanamerem, ale nina kari supuling se kari yam mu ago nemekete den balsam. Ale ani prophet alo se Moses buta mel aratukko balman mu la ko balsam, 23 Kristus ikup giok kueruk ale kota girok aking barasuk, ale Israel kariimet se sor saki ko kariimet nunga manuk, sor ukiram bo ma balukko, den umutang la balsam.”

24 Paul uwutata balam se Festus biyala alisiram ale balam, “Paul, ni ngualasam! Ni ikia biyala taem se ka ikia nukung ka ngualuwuram,” mam.

25 Bare Paul balam, “Kari biya Festus, ani me ngualasam. Ani den nunguning diram balsam. 26 King Agrippa mel suen biya imi nu ko iki saparam, se ani manikko me nguangasam. Ani ikisam, mel bo ta nu me supuram, nu iki saparam, mu awuk, mel suen biya imi yumura te me aratam.
Acts 26:26 Mel suen la yumura te me aratam: John 18:20; Luke 24:18.
27 Se King Agrippa, ni prophet nunga den ko gemang ningi nunguning? Bare ani ikisam, ni gemang ningi nunguning aram!”

28 Bare Agrippa Paul maonam, “Awuk a? Ni ikisam tom tukunangta iwita mu ni neger se ani Kris ko aratik i?”

29 Se Paul balam, “Kam maiya agi tukunang agi, bare ani Kaem ngatangorsam mu ni, se awiriya suen la tom imi te aninga den ikiwasan, mu aninga iwitatala aratalko. Bare mayang imitang mu asele nina ningimik te me anirukko.”

30 Paul buta balam, se King Agrippa barasam, se kari biya Festus, se Bernice, se kariimet saki arungu dagiwaman mu ago la barasaman. 31 Ale nuna watingi arataman mu nunumi manarukasan, ale balukasan, “Kari imi mel bo memek nu te mora se kuerukko, agi te talipara ko, mu me beteso,” ma balukasan.

Se Agrippa Festus maonam, “Kari imi Caesar noko den arigokko me balam ale, mu ni am betesam se namoso ale.”

32 

Copyright information for `WSK