Acts 27

Paul Rome namakaso

Nuna ana dal tanak ale Italy namanakko den nungurman. Ale Paul taman, ale talipara kari saki arungu Julius kuting te nunga awuman. Nu Caesar ko kager kari nunga supuling bo. Ana Adramyttium wonong nunga dal bo te aragaman, dal mu Asia sor te ko wonong langi mu te aratu aratu namurukko. Se ana arataman namakasan. Aristarchus, Macedonia sor te Thessalonica ko kari bo, mu ana nangarak namakaso.

Se ukiram mu ana nama Sidon arataman. Se Julius mu Paul gomang tuam ale balam se aratam ko singsang nongote namaram se ko sinar taman. Se Sidon beteman arataman mu daula nanga moram, se Cyprus koma sengam ko, daula mena mu te arataman ale namakasan. Ale ana Cilicia Pamphylia ko gagi biya mu batagorman nama Myra wonong, Lycia sor te arataman.

Se umu te kager kari nunga supuling Julius nu Alexandria nunga dal bo aratuk Italy namurukko mu arigam, ale te nanga awuram. Se dal nangarak aratam mu ura kowar tokaso, ale tom suen biya ko nangarak gora gora nama laga Cnidus ko pingi aman. Ale am dirmanak namanakko, bare daula biyala nanga moakaso. Se ana guruguman nama Crete tual koma daula mena mu te, nama Salmone sima
Acts 27:7 Nuna Salmone point kiaman. Sima mu English den te “Cape” masan.
mu kulukurman.
Ale ana lang karoman namakasan, bare ura kowar nunguningkiri tokasan, nama sor nup Lang Korang Ningo masan mu te arataman, Lasea wonong duap te.

Ana lage luan te tom suen biya namaram, se Juda nunga tom biya na me namonko masan mu maingkala nanga kiaram. Buta se gagi ninguru magaram. Se ko Paul nunga maonam, 10 “Nina kari, ani ikisam ana am namanak, mu memek aringinakko. Dal, se melmasak ningi aniso mu la me sarengukko, mu ana agotala memek tanakkowo.”

11 Bare kager kari nunga supuling mu Paul ko ikia me karo tuikaso. Nu dal ko yager iluwa kari se, dal ko kotam mu la nunga ikia karo tuikaso. 12 Saun korang umu mu daula biya ko tom te mu dal te bagurukko mu me terong. Se kari suen nuam tala nunga ikia balman, sor mu betemon ale namawa Phoenix aratomonko terong agi mu, aratomon ale daula biya ko tom mu nuna umu te bagomonko maman. Phoenix mu saun korang bo, daula biya ko tom mu te yumura ko yawarakala.

Daula biya

13 Se koma south mu te daula katir katir taira duap beteram. Se nuna ikikasan mu saun korang balman mu te yawarakala namomonko i makasan. Ale nuna anchor tagiman se tarigiram, ale lang la Crete ko saun korang karoman ale namakasan. 14 Bare kam me maiyam se daula biya nunguningkiri north-east masan mu tual te tai kaparam, 15 ale nanga daleluwuram. Se ana aratanakko me terong. Se dal la gurugu beteman se daula kota giam se pata pata namakaso.

16 Ana naguman nama tual gotek Cauda masan mu ko buring ko arataman. Ale dal gotek ninguru kalonakko ura kowar nunguningkiri taman.
Acts 27:16 Dal gotek umutang mu lanis masan, aking English den te “dinghy” masan.
17 Nuna tagiman se tairam se patawu kualala beteman. Asele dal biya mu mayang aora bibiya mu te norogen sang te kalokasan ale karogo kapa bowa ningi la karogo tarigi norogen sang te tagi kuawu kuawu kaloman, dal te aora la anirukko. Nuna nagumon nama Libya ko bararem te soromon bore ko nguangaman, ale sel kututuwuman, se daula kota dal giam se namakasan.
Acts 27:17 Kari saki ikisan mu nuna mayang te anchor agi sel bo kaloman ale gagi ningi beteman, dal iluwok se te gora gora namurukko. / Kari saki ikisan mu nuna mayang te anchor bo kaloman se dal bowa ko kaparam kekawakaso, dal te gora gora namurukko.


18 Daula gagi ninguru nunguningkiri nanga moakaso, se ukiram se nuna mel tutuk dal ningi mu gi wara duap beteman. 19 Se aking ukiram, mu dal ko nuamur tutuk mu nongota nuguting te gi gi waru sapakasan. 20 Tom maiya biya ana worem se baras me arikasan. Se daula mu am sokel ago taiwakaso. Se ana nanga ikia te sor bo i te aratanakko agilawo mawaman, wore ikia mu menaram.

21 Nuna kam maiya biya na bo me naman, se Paul nomoke dugu te sanamaram ale balam, “Aga kari alo,” mam, “nina ani agiring karoman Crete me beteman ale mu, nina dal imi me magaram se mel sang me waru sapaman ale. 22 Bare aitak ani ninga manorsam, me nguangaralko! Mu ana bo ta memek me tauk ale kuerukkowo! Mu dal mu la magurukko. 23 Turom Kaem, ani ko nup patowasam, se ani noko, mu ko engel aningate tairam, 24 ale balam, ‘Paul, me nguangerko!’ mam. ‘Ni nama Caesar koma te sanamirko. Kaem nika ngatang ikiam, ale kari suen la nikerak dal sumu te mu bo me kuerukko,’ mam. 25 Se kari alo, me nguangaralko! Ani Kaem ko angamang ningi nunguning, nu mel uwutata aratukko aga maonam mu uwutata aratu sapurukko. 26 Bare ana dal nangarak nagurok nama tual bo te nanga warukko.”

27 Se ana am Gagi Adria mu te pata pata namawaman la, turom ko tom 14 mu te mung luan dal ko ura kari ikikasan mu sor bo i te tai aratasan ko balukasan. 28 Ale mayang bo gagi ko du te ikimonko beteman se kaparam, mu ko tom 37 metre aringiman. Aking nama kam me maiyam akingtala beteman se kaparam, mu ko tom 27 metre ari gilingiman.
Acts 27:28 37 metre mu 120 feet, se 27 metre mu 90 feet.
29 Ale nuna dal manga te araguk bore ko nguangaman, ale anchor ilagala ilagala dal nukum ko garukuman se kaparam. Ale tairatela ukirokko ngatangakasan.

30 Se dal ko ura kari nagumonko ago kaeyakasan. Ale dal gotek mu kutuwuman ale gagi ningi beteman. Ale kawelakasan, anchor sang dal dun gira mu te warmonko makasan. 31 Bare Paul kager kari supuling Julius, ko kager kari arungu nunga maonam, “Ura kari imi dal te me bagomon, mu nina suen la memek arigalko.” 32 Se kager kari mayang dal gotek te kalo beteman mu batutumuman se namakaso.

33 Se sor ukirokko tom pingi aram mu Paul nuna suen la na namonko nunga maonam. Ale balam, “Kam maiya biya nina ninguru me dagikasan ale na bo me naman tai aitak tom 14 imi. 34 Se ani ninga manorsam, na nal se sail ningarukko. Se ninga ningi bo ta ko mone gawa suwan bo me yumurokko.” 35 Nu uwuta balam mu nu bread bo tam ale nuna suen la nomoke dugu te Kaem aru maonam, asele paogam ale nokaso. 36 Se nuna suen la nongomang auram, se nongota na gi gi nokasan. 37 Se ana dal te mu nanga tom 276. 38 Nuna suen la na naman terong mam, mu nuna dal te gopurukko inang wheat sang gagi ningi waru sapaman.

39 Sor ukiram mu nuna sor aringiman, bare ninguru me ko ikikasan. Bare nuna gagi nukum ningi saun korang ningo ago mu bo aringiman, ale dal ago mu te aratomonko terong agi mu ko ikia to gilingiman. 40 Ale anchor ko mayang batutumuman se anchor gagi ningi animan. Ale mayang yager te kalo kalo ago namaman mu uruku uruku ago namaman. Ale nuna sel gira mu tagiman, se daula nunga giam arungu saun te namawaram, 41 bare dal bararem te aratam ale soraram. Dal dun gira mu ninguru gek mam. Se dal nukum udagi mu gagi moakaso se papak mam kapakaso.

42 Se kager kari talipara kari yamon aratomon ale nagumon bore ko, nunga momon se kuemonko ikia tokasan. 43 Bare nunga supuling Paul sangukko gomang anikaso, se munan mu me betemonko nomoke kaolam. Ale nu kari yara ko ikia mu girimon tengemon ale yamon aratomonko nunga maonam. 44 Ale sang mu dal biling biling gimon ale te aratomonko balam. Se ana butata beteman, ale suen la yawarakala watingi arataman.

Copyright information for `WSK