Acts 3

Kari bo suwik memek wore aking suwik nungeram

Tom bo Peter John ilak temple ningi namakasan, bainga ningi 3 o'clock, ngatang ko tom te namakasan. Se kari sang kari bo suwik memek mu giman ago taiwakasan. Kari mu nuam tuagu ningi la ko suwik butata ago bilangaram, se tom suen biya nu gikasan ale ilak nama songkuring bo, ko nup Songkuring Yawarakala masan, mu te bitakasan se manga ko ai se bagakaso. Kari nukung Peter John ilak temple ningi kasu nagumonko negawaman se nungarkam, ale manga ko nunga auram. Se nuna arikuawuwa se Peter balam, “Ana ilagala nangarkiko!” mam. Se kari mu nungarkam ale ikikaso mu mel i tumonko i makaso.

Bare Peter balam, “Ani silver gold mena,” mam. “Bare mel aningate ago mu ani kisekko. Jesus Kristus Nazareth kari wore nup te bares ale aolak ilupko!” Ale ko kuting sengam mu te iluwam ale sangaruwaram se tairatela ko suwik tuagu dirmam, sokel tam. Se ting palagam sanamaram ale aolak iluwa duap beteram. Ale kari ilagala mu arungu temple ningi kasu naguram, ale aolak ilukaso, tingakaso ale Kaem nup patawukaso. Kariimet suen la nu aolak ilukaso Kaem nup patawukaso mu aringiman, 10 ale ikiman, mu kari pempem Songkuring Yawarakala masan mu kuringi dagi se manga ko ai lagakaso borta. Ale nuna kilek nu kumik te aratam mu aringiman ale ninguru biririkiman, ale ikia mena saparam.

Peter temple ningi den apuram

11 Kari nungeram nukung mu Peter John am nunga ilukuawuram arungu bagakaso, se kariimet suen biya biririkiman, ale naguman tai nongote biguwuman, kuwim Solomon nup te beteman mu te biguwuman. 12 Se Peter mel mu arigam ale nunga maonam, “Israel kari, nina anape ko tengeman? Nina ikisan ana ilagala nangata nanga sail te, nanga bagara ningo te, kari imi nungurman se aolak iluso i masan ale nangarki kuawuwasan e? Buta mena. 13 Abraham Isaac se Jacob nunga Kaem, se nanga nanangatak ari suen la nunga Kaem, mu ko ura kari Jesus nup biya tuam. Mu kari nina kager kari nuguting te beteman borta. Se Pilate nu am bitiruk se namurukko balukaso, bare nina miakasan. 14 Nina kari diram kako nunguningkiri mu nibiring tuman, ale kari kuting gue ago mu Pilate noko kuwim te kutuwu ningarukko balman, se kutuwu ningaram.
Acts 3:13-14 Nuna Jesus nubiring tuman: Luke 23:13-25.
15 Anananga Kari Gira, marak ningo ko duap, mu nina moman se kueram. Bare Kaem nu patowaram se barasam. Se ana mel imi ko dugu duap apunakko kari ana bagasan. 16 Jesus ko nup te nina kari ariwasan ale ko ikiwasan imi nungeram. Ana ko nangamang ningi nunguning noko nup sokel ago, se te kari imi nina nemetam te sokel yawara tam.

17 “Aga singsang, ani ikisam nina ninga supuling arungu ninguru me ikia se munan umu Jesus kumik te beteman.
Acts 3:17 Nuna munan ninguru me ikia: Luke 23:34; 1 Tim 1:13.
18 Bare girakala Kaem noko Ura Kari Kristus memek imi taukko mu prophet alo nuguring te balam. Se nina munan beteman mu den giram aniram borta ko nunguning nina beteman. 19 Buta se nina giris palagal ale Kaem aural, se ninga memek siwurok, 20 ale nengerak baga se sokel ningarukko. Ale nu kari Jesus Kristus, nina nego ko balu beteram, umutang bitiruk se aking nengete tai kapurukko. 21 Nu girakala prophet alo nuguring te balam, Jesus Kristus mu duruk wonong te baguruk nama tom Kaem mel suen biya baluk se iru iwita aratukko mu te asele nu tai kapurukko.

22 “Moses iwita balam: ‘Kaem ninga Kari Biya nu ninga launuria bo tauk, ale ani ninga prophet ko bagakasam iwitatala, ninga Prophet ko bitiruk se bagurukko. Se nina suen la ko kuring karo tualko. 23 Kari awiriya Prophet umutang kuring me karo tuok, mu Kaem ko kariimet ningi me bagurukko, mu memek tauk ale kuerukko.’ Moses buta balam.
Acts 3:22-23 Moses ko den: Deut 18:15, 18-19.
24 Se prophet Samuel, se prophet saki udagi arataman, mu suen la tom aitakta ana te bagasan mu ko karogo balukasan.

25 “Nina mu den prophet alo balman, se den Kaem ninga taleng girigir nunga maonam borta ko nunguning gialko kariimet nina. Mu awuk, nu Abraham iwita maonam, ‘Nika taleng girigir te ani kariimet suen la marak nungarikko,’ mam.
Acts 3:25 Kaem ko den Abraham maonam: Gen 22:18.
Ale Kaem noko Ura Kari balu beteram mu giram nenengate beteram se tairam, mu nina ninga memek nibiring tual se nu marak ningarukko tairam.”

26 

Copyright information for `WSK