Acts 4

Peter John ilak nunga talipaman

Peter John ilak kariimet den nunga manaruwaman se priest alo, se temple ko kager kari nunga supuling mu se, Sadducee alo tai nongote arataman. Nuna ikiman Peter John ilak nuna den kariimet nunga manaru se Jesus kueram bare barasam mu ko duap balukasan, ale kariimet kueman mu agotala barasomonko mu ko nunga manarukasan, se mu ko nuna ninguru nongomang magaram.
Acts 4:1-2 Sadducee alo nunga ikia: Acts 23:8.
Se nuna Peter John ilak nunga iluman. Bare maingkala baingam se talipara kawam ningi nunga awuman, se nuna turom umu te bagomon se ukirokko. Bare kariimet suen biya tala Peter John nunga den ikiman ale Kristus ko nongomang ningi nunguning aram. Se kari nunga tom mu nama 5000 iwita.

Juda supuling alo biguwuman Peter John ilak isa nungarukasan

Ukiram se priest bibiya, kari bibiya, se Law Den ko kausa kari bibiya alo Jerusalem biguwu gilingiman. Priest Supuling Annas mu bagaram. Se Caiaphas, John, Alexander, se Priest Supuling ko gue suwan saki tala mu ago tai arungak biguwuman.
Acts 4:6 Tom mu te Annas ko noton Caiaphas mu Priest Supuling bagakaso (A.D 18-36). Bare Annas mu nup Priest Supuling tala, mu awuk, nu A.D 6-14 mu te ura mu ilukaso.
Nuna apostle ilagala nomoke dugu te nunga awuman, ale nunga isa duap beteman ale balman, “Nina sokel awuk bore te se, nup awuk bore te mel owore beteman?”
Acts 4:7-8 Nuna Jesus kumik te butatatala beteman: Mat 21:23. Den koma ningo balman: Mat 10:19-20.


Se Peter Korang Bur kumik ago terong mam, se nunga maonam, “Nina Israel kari supuling se kari bibiya, nina kari suwik memek mu kumik te munan ningo aratam wore ko duap ikialko isesan agi, se nu aguwaya nungeram wore ko duap ikialko isesan agi, 10 mu nina se, Israel kariimet suen la nina den imi ikialko: kari imi nungeram ale aitak nemetam te sanamiwoso imi mu Jesus Kristus, Nazareth kari, wore nup te nungeram, kari nina tam kangono te tagiman se kueram bare aking Kaem mumam se barasam umutang. 11 Nu mu

'manga bo, nina kawam kaola kari balman memek ma balman,
bare aitak kawam giwoso' borta.
12 Kari bo kigilik anananga sangaru taukko me terong. Sor suen biya te Kaem nup kigilik bo anananga sangukko me nangaram.”
Acts 4:11-12 Psalm 118:22. Jesus la anananga sangaru taukko terong mam: John 14:6; 1 Tim 2:5.


13 Se nuna Peter John ilak nungarkaman, nguangara ko kari iwita mena, am den sail ago balukasan se nungarkaman. Nuna ikikasan mu nuna ilagala ikia biya bo me taman, am kari yam, bare den sokel agotala balukasan, se nuna tengeman ale nungamin yenakaso. Ale nuna nunga ikiman, mu nuna ulengkala Jesus ilak bagakasan. 14 Bare kari suwik memek baga nungeram mu nu ilagala mu arungu sanamiwakaso se aringiman, umutang ko nuna den ito balmonko mena. 15 Buta se nuna Peter John ilak nunga manorman, kari bibiya nunga betemon ale watingi aratomonko balman. Se Peter John arataman asele kari supuling alo den tagikasan ale balukasan, 16 “Ana kari ilagala umu awuk nunga betenakko? Nuna kilek kigilikta beteman, se kariimet Jerusalem anisan mu maingkala iki sapaman. Se ana balnak mel mu me aratam ma balnakko me terong. 17 Bare mel imi ko dugu duap paguk ale kariimet ningi biyala namuruk bore ko, ana den aora biya tala kari ilagala mu nunga manornakko, nuna udagi nup mu te den bo kariimet me nunga manarmonko!” maman.

18 Asele aking nunga aruman se kasu naguman se nunga manarukasan, udagi Jesus ko nup kariimet me nunga kasurmon, ale te den bo me nunga manarmonko makasan.

19 Bare Peter John ilak den koma iwita balman, “Nina nengeta ikialko, munan diram aguwaya Kaem koma te aniso, nina nigiring kaora ko agi, Kaem kuring kaora ko agi, mu nina nengeta tuteral ikialko. 20 Bare ana ilagala nagiring kalonakko me terong. Ana mel aringiman ikiman mu ko dugu duap am balnakko.”

21 Se kari supuling aking den aora biya tala nunga manorman ale yam nunga awuman se namaman. Nuna lage ito nuna ilagala te nunga bita maguwumonko wore ninguru me ko ikikasan. Mu awuk, kariimet suen la mel aratam mu ko Kaem nup patawukasan. 22 Kari kilek sokel ago mu kumik te aratam mu ko yar 40 ko kualala iwitata.

Kris alo sokel tamon ale te den apumonko Kaem aru ngatangarukasan

23 Supuling alo Peter John ilak nunga awuman se arataman ale nunga saki nongote peleman namaman. Ale priest bibiya se kari bibiya den nunga manorman mu suen la balman. 24 Se iki gilingiman, ale biguwuman Kaem ngatangorman: “O Kaem Biya, ni duruk, ali, se gagi beterem, ale mel suen biya ningi se awete aniso. 25 Ni Korang Bur te, anananga girigir nika ura kari David ko kuring te, iwita balem,

‘Awuk se ali sor saki ko kariimet nongomang magoso?
Ale anape ko kariimet ikia memek duap duap tasan?
Mu betemonko, bare nunguning mena.
26 Ali sor ko supuling kagermonko nongomang suwan awuman
ale arerem te la sanami muruwuman,
Kaem Biya se ko Kari king ko bagurukko balam borta arungu kagermon ale nunga menawumonko bolala awuman.’
Acts 4:25-26 Psalm 2:1-2. “Kari king ko bagurukko” maso umutang Kristus.

27 “Nunguningta, Herod Pontius Pilate ilak, wonong imitang ningi Israel alo se wonong saki ko kari arungu biguwuman, ale nika Ura Kari Jesus, kari kako ni Kristus ko ma balem, wore ko nup menawumonko den nungurman. 28 Ale eng mel suen biya ni girem ale balem aratukko maem mu nuna bita gilingiman. Se mel mu suen la nika sail te aratu saparam. 29 O Kari Biya, nuna anananga bita maguwumonko den aora biya balman wore ko iki ale, ana nika ura kariimet sokel nangaru se me nguanganak, sokel agotala nika den balnakko. 30 Ni kiting patawur ale sokel nangaru se kariimet kuera ikes ago mu nunguru se, mel duap duap yawarakala ka Ura Kari Jesus nup te betenakko.”

31 Nuna ngatanga kutuwuman mu kawam nuna ningi biguwuman bagaman mu yukuakaso. Se nuna suen la Korang Bur nungumik ago terong mam, se nguangara mena sokel agotala Kaem ko den balukasan.

Kris alo suen la nongomang suwanta bagakasan

32 Kris alo suen la nongomang suwanta, se nunga ikia suwanta. Kari bo ta mel arikaso ale balukaso imi agata aga mel ma me balukaso. Mena. Nunga mel mu eng nuna suen la nunumi tuikasan. 33 Apostle alo Kari Biya Jesus barasam mu ko den apukasan, bare nunga den sokel ago nunguningkiri. Se Kris alo suen la Kaem ko marak ningo te yawarakala bagakasan. 34 Nunga ningi kari bo ta na mel ko me tukunang akaso. Mu awuk, kariimet sang nunga ali se nunga kawam ago agi mu, kariimet saki arungu diakasan, ale ko manga tokasan ago tai 35 apostle nunga nusuwik duap ningi awukasan. Se nuna kariimet mel ko tukunang akasan mu tutiakasan ale nungarukasan.

36 Nunga ningi kari bo ko nup Joseph, nu Levi kari bo, ko wonong duap Cyprus. Se apostle alo aking nup bo beteman Barnabas. Nup mu ko nunguning mu “Kari saki nongomang sail tua ko kari.” Bare nu ko ali saki diaram, ale ko manga tam ago tai apostle nusuwik duap ningi awuram.
Acts 4:36-37 Barnabas: Acts 9:27; 11:22-26; 13:1-3; 14:14; ch 15; 1 Cor 9:6; Gal 2:1-13; Col 4:10.


37 

Copyright information for `WSK