Acts 5

Ananias Sapphira ilak nunga dugu duap

Bare kari bo ko nup Ananias, ko nuwus Sapphira, mu nuna ago ali bo diaman ale ko manga taman. Bare nuna nunumi manorman ale nunga manga sang nongota ilu se Ananias sang la giam ale ago tai apostle alo nungaram.

Se Peter balam, “Ananias,” mam, “awuk se Satan gemang kulukuam se ali diarem mu ko manga sang keta iluwa se sang la giem ago tairem ale Korang Bur kulursam a? Ulengkala ali sumu nika, se ni keta ka ikia te aguwaya bitarko mu nika mel. Se udagi ni ali diarem mu manga mu nika, ka gemang te aguwaya bitarko. Bare ni anape ko kawel sowore bitarko ikia taem? Ni ana kari imi me nanga kulursam, ni Kaem kuluruwasam!”

Se Ananias den mu ikiam, ale eng dagulam kueram. Se kariimet mel mu ko den ikiman mu nuna ninguru nguangakasan. Kari kulak taiman ale ko kumik guang mu guang bilik te kaloman ale giman ilak nama mutim tuguman.

Udagi hour ilagala suwan namaram se aking Ananias ko nuwus tairam kasu naguram. Nu mel aratam mu nu me ko ikikaso. Se Peter isuam, “Awuk a? Ni ka kari ilak ali diaman, ale ko koma manga taman, mu ko tom te ani aisiman ta iwo ye?”

Se imet mu balam, “Mu butata diram.”

Se Peter nu maonam, “Awuk se nina ilagala den nungurman ale Kaem ko Korang Bur kulalko ago kaesan a? Arikko. Kari nika kari mutim tuguman mu taiman songkuring ago sanami se anisan. Ale ni karogo ka gimon kerak namomonkowo.”

10 Se tairatela imet mu Peter suwik duap ningi dagulam ale kueram. Se kariimet kulak utu naguman, nu kueram se aringiman, ale taiman giman ilak nama kuari beta dugu te mutim tuguman. 11 Se Kris alo suen la, se kariimet saki ago mel mu ko den ikiman, ale nuna ninguru nguangakasan.

Apostle alo kariimet saki kuera ikes ago wore nunga nungurukasan

12 Apostle kilek yawara sokel ago duap duap kariimet ningi bitakasan. Se kariimet nongomang ningi nunguning mu tom suen biya temple ningi, kuwim Solomon nup te beteman, mu te biguwukasan. 13 Kariimet sang nungarkikasan mu kariimet yawara ko nunga balukasan, bare nongorak biguwumonko nguangakasan. 14 Bare kariimet suen biya tala Kari Biya ko nongomang ningi nunguning akaso, se Kris alo arungu biguwukasan. 15 Se kariimet nunga saki kuera ikes ago mu nunga gikasan, ale arungu watingi aratukasan, ale lage te, pakapang te se sarek te, nunga awu awu ago namaman se ani se bagakasan, se Peter kusumuri aolak iluwok namuruk se ko kuting nungumik te bitiruk se nungemonko butata bitakasan. Mena mu, worem nu arigok se ko dora la kariimet saki nongote namuruk se nungemonko. 16 Kariimet wonong gotektek Jerusalem ko pingita mu ago tai biguwukasan. Nuna kariimet kuera ikes ago wore nunga diruwukasan ale arungu taikasan, ale kariimet bur memek nunga ngualuwuram mu ago la arungu taikasan. Se suen la nungia sapaman.

Engel bo apostle alo talipara ningi nunga giam arungu aratam

17 Buta se Priest Supuling, ko sikisaki arungu, nuna Sadducee, mu nuna ninguru nongomang maga gorogerakasan. 18 Se apostle alo nunga iluman ale talipara biya mu te nunga awuman se bagakasan. 19 Bare turom Kari Biya ko engel bo namaram talipara kawam ko songkuring kaogam ale arungu aratam, 20 ale balam, “Nina namaral temple ningi sanamaral ale Jesus marak ko duap wore ninguru nunga manaru se bagaralko.” 21 Se apostle alo den mu karo tuman, ale tumong biyala namaman temple ningi kariimet den nunga kausa duap beteman.

Se udagi te, Priest Supuling ko kari arungu temple ningi taiman, mu nuna Israel kari supuling bibiya, Sanhedrin umutang, mu suen la nunga aruman se tai biguwuman. Ale apostle alo talipara kawam ningi bagaman mu arungu taimonko den beteman.
22 Se dirdir namaman, bare apostle talipara kawam ningi me bagaman se nungarkaman. Ale peleman taiman ale balman, 23 “Talipara kawam ana aringiman, mu nuna ninguru ko kuring baguman. Se nunga bitua kari songkuring suen biya te sanami namaman. Se ana songkuring kagaru kagaru namaman, bare kari bo owola me bagaman.”

24 Se temple ko kager kari supuling se priest bibiya arungu den mu ikiman ale ikia biyala nunga moakaso, se udagi mel aguwaya aratukko wore ko nungamin tugukasan.

25 Asele kari bo tairam nunga maonam, “Ikialko!” mam. “Kari nina nunga talipaman mu aking o temple ningi sanamaman ale kariimet den nunga manaruwasan,” mam. 26 Se temple ko kager kari supuling, ko kari sang arungu namaman nunga ilu gilingiman. Bare alis ago me nunga iluman. Mu awuk, kariimet nuna manga te nunga usagomon bore ko nguangakasan.

Apostle alo supuling bibiya nomokete den balman

27 Nuna arungak tai kari supuling nunga kusumuri nunga bangorman. Se Priest Supuling balam, 28 “Ana den aora biya ninga manorman, nup imi te kariimet den bo me nunga maonalko maman. Bare nina den imi te Jerusalem ira muruwuman! Ale nina kari kumik gue kaparam mu ko den ikup mu ana atumu nangaralko ago kaesan!”

29 Bare Peter apostle saki ago iwita balman, “Ana kari nuguring me karo tunakko, ana Kaem la kuring karo tunakko! 30 Nina Jesus tam kangono te tagiman se kueram, bare anananga taleng girigir nunga Kaem aking nu patowaram se barasam, 31 ale kote nama tarigiram, se noko kuting sengam mu te beteram se dagiwoso. Nu anananga Kari Biya, anananga Saonga, ana Israel nangamang gurugok se giris palaganak se nanga memek kutuwu sapurukko. 32 Ana mel suen biya umutang ko den apura kari ana. Se Korang Bur agotala den imi balso. Kariimet Kaem ko kuring karo tusan, mu nu Korang Bur nungarso.”

Gamaliel den ningo balam

33 Apostle alo uwutata balman, se kari bibiya ikiman ale nongomang ninguru maga kaparam, se nunga momon se kuemonko balman. 34 Bare supuling bo barasam, nu Pharisee bo, ko nup Gamaliel. Nu Law Den ko kausa kari bo, kariimet nu kari yawara ko balukasan ale ko kuakasan. Mu barasam ale balam, apostle alo tom katirta ko watingi aratomonko balam, se arungu watingi arataman.

35 Asele nu kari supuling nunga maonam, “Nina Israel kari, nina kari imi nungumik te ikia i beteralko mu ninguru ikial ale asele ko! 36 Giringila Theudas barasam ale balam, ‘Ani kari biya asokel ago,’ mam. Se kari 400 arataman nu kowom karoman. Bare kari sang nu moman se kueram, se ko olekem alo parasaman, se ko ura mena namaram. 37 Aking ko udagi tala, kariimet nunga kaura tutera ko kam te, Judas Galilee kari mu barasam ale kari saki nunga giam ale nongomang atumam. Se ali supuling nunga karomonko kager patowaman. Bare nu betela moman se kueram se noko olekem parasaman. 38 Buta se ani aitak nina ninga manorsam, aguwaya me nunga beteralko, am nunga awural se namomonko! Mu awuk, kari nongota nunga sail te ura imi duap beteman namawasan agi mu, namawa dagulokko. 39 Bare ura imi Kaem ko ikia se ko sokel te agi mu, nina kari imi nomoke kaolalko me terong. Nina buta beteralko negeral, mu nina Kaem ilak kageraral bore ko sinar talko!”

40 Gamaliel butata balam se nuna noko kuring karoman. Ale olekem alo nunga aruman se taiman se kari sang nunga manorman se nunga lilumaman.
Acts 5:40 Mu kariimet te lilumara ko mayang (”whip”) wore te nunga lilumaman: Mark 13:9; Acts 22:19; 2 Cor 11:24.
Asele nuna den aora biya nunga manorman, “Nina udagi Jesus nup te den me balalko,” maman. Asele nunga awuman se namaman.

41 Se apostle alo Jesus nup te ikup giman wore ko amilmilakasan.
Acts 5:41 Nuna ikup giman bare am amilmilaman: Mat 5:10-12; James 1:2; 1 Peter 4:13.
Ale tom suen biya nuna temple ningi, se kariimet nunga kawam kawam, mu am den nunga kasurukasan. Nuna ura me bita tokasan, nuna am Jesus mu nu Kristus makasan, ale ko dugu duap yawara mu tom suen biya kariimet nunga manarukasan.

42 

Copyright information for `WSK