Acts 8

Se Saul mu nuna Stephen moman se kueram mu ko gomang nungeram.

Saul Kris alo nunga maguwukaso

Tom umutang te nuna Kris alo Jerusalem bagaman mu nunga bita maguwura duap beteman. Se nagu parasaman, sang Judea ningi, sang Samaria ningi namaman bagakasan. Bare apostle alo mu am Jerusalem bagakasan.
Kari sang Kaem ko kuring karo se anira mu Stephen mutim tuguman, ale ko ninguru mo nia gilingikasan. Bare Saul mu Kris alo nunga maguwuwakaso. Ale kawam kawam namakaso kariimet nunga ilu tagikaso ale arungu nama talipara ningi nunga awukaso.

Philip Samaria ningi Kaem Namar ko duap balukaso

Kris alo Jerusalem beteman ale parasaman mu sor saki saki te namaman, ale den gilalong yawara balu balu namakasan. Philip Samaria ko wonong bo te namaram, ale Kristus ko dugu duap balukaso. Se kariimet suen biya Philip ko den ikikasan, ale kilek kilek bitakaso mu arikasan, ale noko den ikimonko ninguru nodogowa tagikasan. Kariimet suen biya bur memek nungumik ningi anikasan mu bur memek mu biyala ai se arataman nagu gilingikasan. Se kariimet suen biya tilital, nusuwik memek, mu aking nungiakasan. Se wonong umu te amilmil biya aratam.

Simon mang kari wore ko dugu duap

Bare kari bo wonong mu te kam maiya nuam agotala bagakaso, ko nup Simon. Nu mang kawel kawel ago baga se kilek kilek bitakaso, se Samaria kariimet ninguru nungamin yenakaso. Nu balukaso, “Ani kari biya,” makaso. 10 Se kariimet nunup ago, se kariimet nunup mena, mu suen la noko den ikimonko sail tagikasan. Ale ko balukasan, “Kari ana balsan Sokel Karogo Nunguningkiri masan borta,” makasan. 11 Ale nuna noko den ikimonko kuakasan. Mu awuk, nu tom maiya nuam nunga ningi baga se kilek kilek bitakaso se nuna arikasan ale nungamin yenakaso.

12 Bare Philip den gilalong yawara balam, Jesus mu Kristus ma balam, ale Kaem ko kingdom ko nunga manarukaso. Se tom mu te nuna kari ta, imet ta, Kristus ko nongomang ningi nunguning aram, ale anuwa to gilingiman. 13 Se Simon agotala gomang ningi nunguning aram se anuwa tam. Ale Philip ilak baga se, kilek bibiya sokel ago Philip bitakaso mu arikaso, ale ko ikia biyala moakaso.

14 Se apostle alo Jerusalem bagaman mu Samaria kariimet Kaem ko den ikikasan ale nongomang ningi bitakasan mu ko den ikiman, ale Peter John ilak nongote namomonko nunga manorman. 15 Se ilagala namaman ale kariimet nogo ko Kaem aru ngatangarukasan, se ko Korang Bur nungarukko makasan, 16 mu awuk, Korang Bur kariimet mu nongote me tai kapakaso. Kariimet Jesus nup te anuwa to gilingiman mu la. 17 Se Peter John ilak nunga nuguting nusupuling te awukasan se Korang Bur tokasan.

18 Se Simon mu apostle ilagala nuguting kariimet nusupuling te awukasan se Korang Bur tokasan mu arigam, ale manga giam ago tai nunga kausam ale balam, 19 “Nina sokel sumu ani ago aisalko. Se kari awiriya ani agiting kumik te bitirik mu nu Korang Bur taukko.”

20 Bare Peter nu maonam, “Ni ka manga sumu karogo memek ningi namarko! Mu awuk, ni mel Kaem munan iwita ana nangaram mu ni manga te dierko masam. 21 Kaem ko ura ana betesan imi mu ni karogo me terong meko! Mena. Ka gemang Kaem koma te diram mena. 22 Se ni kilek memek mu biring tui ale Kari Biya ngatanguruko. Ani me ko ikisam, nu ka ikia memek sumu siwu sapuruk agi. 23 Ani nika gemang arigisam, mu gemang barasa sumu, se ka kilek memek memek ninguru ka taliparam.”

24 Se Simon nunga maonam, “Nina ani ago ko Kari Biya ngatongalko, se mel nina balman sumu ani angimik te me aratukko!” mam.

25 Peter John ilak Samaria ningi Kari Biya ko den balman, asele peleman Jerusalem namaman. Tom nuna nama se mu, Samaria ko wonong gotektek te Kaem ko den gilalong yawara balu balu namakasan.

Philip nu Ethiopia kari bo Kaem ko den maonam

26 Bare Kari Biya ko engel bo Philip maonam, “Bares ale lage koma south Jerusalem beteso nama Gaza aratoso wore te nama kaparko,” mam. Lage mu koma sor garagarayam te.
Acts 8:26 Bala bo mu iwita: “Bares ale lage koma south Jerusalem beteso nama Gaza aratoso, lage koma sor garagarayam umutang te nama kaparko.”
27 Se Philip barasam namakaso. Ale lage te Ethiopia kari bo arigam. Kari umu nu bitua kari bo, nu kari biya, Ethiopia nunga supuling imet, ko nup Candace, wore ko manga bitarukaso. Kari mu Jerusalem Kaem nup patawurukko namaram, 28 ale ko wonong te pilakaso. Nu ko karis te daigam, ale prophet Isaiah ko batoga kau se namakaso.

29 Se Korang Bur Philip maonam, “Karis duap te namar ale ilak namarko,” mam. 30 Se Philip naguram pingi namaram, ale kari mu prophet Isaiah ko batoga kaukaso mu ikiam, ale isuam, “Ni den kauwasam sumu ko nunguning ikisam agi?”

31 Se kari mu balam, “Kari bo den imi ko nunguning ani me aga manuk, mu ani awuk ikiekko?” Ale nu Philip maonam, “Tai basu agarak dagiko,” mam.

32 Se Kaem ko batoga nu kauwaram mu iwita:

“Nuna nu sipsip momon se kuerukko iwita ilak taiman.
Aking sipsip gotek mone batoga ko negesan se me niaso iwitatala, nu den bo me balam.
33 Nuna ninguru ira kutuwu ilak kapaman,
ale noko den diram ilak me aringiman.
Se awiri noko kuriang imas ari nunga dugu duap balukko? Mena.
Mu nu ali imi te bagurukko noko tom luan te batagorman.”
Acts 8:32-33 Isaiah 53:7-8.

34 Kaem den nu kauwaram mu uwutata balam se bitua kari mu Philip isuam, “Ani nika isarsam, prophet Isaiah awiri ko balso? Nu kota numi ko balso agi kariimet i ko balso, ale den imi batogam?”

35 Se Philip Kaem ko batoga umutang te den apura duap beteram, ale Kristus ko dugu duap yawara kari mu manarukaso.

36 Nuna ilagala lage te namawa yu bo te arataman, se bitua kari mu balam, “Arikko! Yu aniso iweya. Anape mel aninga kaolam se ani anuwa me taikko?” 37 
Acts 8:37 Batoga saki girakala batagorman mu te den imi ago aniso: “Se Philip balam, 'Ni gemang ningi nunguning aram agi mu asele.' Se kari mu balam, 'Ani Jesus Kristus mu Kaem ko Namar ani ko angamang ningi nunguning aram.'”
38 Ale balam se ko karis sanamaram. Se nuna kapaman ale yu ningi nama kapaman, se Philip nu anuwa tuam. 39 Tom nuna yu beteman ale arataman mu tairatela Kari Biya ko Korang Bur Philip tam ilak namaram. Se bitua kari mu udagi nu me arigam. Ale nu eng Kari Biya nup patawu se amilmil ago namakaso. Bare Philip Azotus nama aratam, ale geragakaso wonong suen biya te den gilalong yawara balukaso, ale nama Caesarea aratam.

40 

Copyright information for `WSK