Colossians 1

Den gira

Ani Paul, Kaem aga balam se ani Jesus Kristus ko apostle bagasam, se nanga bo Timothy ilak den imi bataguru nina Kris nunguning alo Colosse bagasan mu ningarsan. Nina Kristus te nanga singsang yawara.

Anananga Nainet Kaem ko gomang yawara, se ko lila ningaruk se te bagaralko.

Paul Colosse Kris alo nogo ko Kaem amilmil tuikaso

Tom ana nina nego ko ngatangasan mu ana nanga Nainet Kaem, se nanga Biya Jesus Kristus ko Nuet, mu pempem amilmil tusan. Mu awuk, ana nina Jesus Kristus ko nengemang ningi nunguning aram mu ko ikiman, ale nina Kris suen la nunga kuesan mu ko ikiman ale ko amilmilasan. Se nina uwutata betesan mu ko duap iwita: nina Kaem ko den nunguning, den gilalong yawara umutang ko ikiman, ale ko nengemang ningi nunguning aram, se Kaem ilak duruk wonong te bagaralko mu ko kimi bitawasan.

Sor suen la te den gilalong yawara pagam namaram se ko nunguning aratu namawoso. Se nenenga ningi betela, tom nina den mu ikiman ale Kaem gomang ningaram mu ko den ninguru ikiman, tom mu te, se eng tai aitak, den mu ko nunguning ninga ningi aratuwoso. Nina den mu nanga ura suwan yawara Epaphras kuring te ikiman. Nu ninguru nanga sangarso ale Kristus ko ura ninguru iluso. Se kari borta nina Korang Bur te ninimi ko ninguru kuesan mu anananga maonam se ikiman.

Buta se, tom ana nenenga den ikiman, mu tom umutang te la, se eng tai aitak, ana tom suen biya nina nego ko Kaem aru ngatangorsan, nu Korang Bur te ninga ikia sinar awurok se nina noko ikia se ko gomang ko ninguru ikialko. 10 Mu te nina munan ningo se bagara Kari Biya ko kueso mu la bita se te bagaralko. Nina munan ningo ningo mu ninga ningi, tam ningo bo aguwa se nunguning tom suen biya kapawara iwitata bagaralko. Ale nina Kaem ko iki iki nama eng am ko ninguru ikialko. 11 Nu sokel karogo nunguningkiri, se ana iwita nu ngatangorsan, nu sokel ninguru la ningaruk se nina ikup suen biya te am sokel ago sanamaralko. Ale nengemang amilmil ago la 12 Ba Kaem nup patowaral ale amilmil tualko. Mu awuk, nu ninga balam noko kariimet diram mam, se nina ko kariimet saki arungu tom suen biya noko kingdom nikim karogo mu ningi ilak bagaralko. 13 Ana Satan ko tiromorom ningi bagaman, bare nu nanga giam ale noko Kuriang, ko gomang motam, wore ko kingdom ningi nanga awuram. 14 Kaem noko gue te nanga dia tam, nanga memek siwuram, se ana aitak Satan ko ura dungan kariimet me bagasan. Mena.

Kristus mu mel suen biya ko supuling bagoso

15 Ana Kaem me arigisan, bare Kristus te ana Kaem arigisan, mu awuk, nu Kaem iwitatala. Nu mel suen biya Kaem beteram wore ko Supuling Gira bagoso. 16 Mu awuk, nu te mel suen biya aratam, duruk te se aliti, se mel ana arigisan se me arigisan tala mu, se engel bibiya nunga sokel aguwaya, bare nu te mel suen biya aratam se noko la. 17 Mel suen la me arata la, nu giram bagakaso, ale noko sokel te mel suen biya iluwoso se me parasa namoso.
Col 1:15-20 Kristus nu Supuling Gira, mel suen biya iluwoso: John 1:1,18; 8:58; Heb 1:2-3; Rom 8:19-23; Rev 17:14.


18 Kris alo mu noko kariimet biguwura suwanta, se nu nunga supuling bagoso. Nu kota nononga marak sokel ko duap. Nu kariimet kueman mu nunga ningi nu giram barasam, mu nu mel suen la ko Gira Kari bagurukko se. 19 Mu awuk, Kaem ko gomang noko munan se ko marak sokel lilim la ko Namar kumik te anirukko. 20 Ale nu te mel suen la, ali imi te, se duruk te, mu noko gue tam kangono te kaparam mu te, nunga gi koma dugu te, ko lila bowa ningi nunga awurok se bagomonko.

21 Nina ulengkala Kaem ilak me bagakasan. Mu awuk, nenenga ikia munan memek te nina noko kager kari iwita awar bagakasan. 22 Bare aitak noko Kuriang Jesus kari ko aratam ale kueram mu te, nu ninga memek siwuram, ale ninga gi koma dugu te ninga awuram. Nu butata beteram mu, noko ikia mu nu udagi te ninga giok se memek bo mena, laili se yawarakala ilak bagaralko. 23 Bare nina den gilalong yawara ikiman ale ko nengemang ningi nunguning aram umu me beteralko, ilukuawural ale te sokel ago bagaral mu asele nu butata bitirukko.
Col 1:23 Ana me pelenak, sail ago baganakko: Heb 3:14; 6:11; 10:35-38.
Den umutang sor suen biya te kariimet nunga manorman se ikiman, se ani Paul den mu ko ura kari ani bagasam.

Paul Kris alo nunga sangukko ikup gikaso

24 Aitak ani nina nego ko ikup giwasam, bare ani mu ko amilmilasam. Mu awuk, Kristus anananga sangukko ikup yaman giam ale kueram. Se ani noko nup te ko kariimet alo te yawarakala bagomonko angimik te ikup gisam mu terong. 25 Kaem kota aninga balam se Kris kariimet nunga ura kari ko bagasam, ani ninga sangik ale noko ikia yumura te anikaso wore balu wetang awu sapirik se ninguru ikialko aga balam.

26 Ikia umutang kam maiya biya yumura te la anikaso, bare aitak ana Kaem ko kariimet wetang te ko ikiman, 27 ana Juda alo se, nina ali sor saki ko kariimet betelatala. Mu awuk, Kaem ko gomang butata. Se noko ikia yawara nunguningkiri umutang ko ikiman mu iwita: Kristus ninga nengemang ningi baguruk mu, nina nu ilak tom suen biya ko nikinang te bagaralko.

28 Se ana Kristus borta ko dugu duap ana balu lagasan. Ana kariimet suen la giris palagomonko ko den sokel ago nunga manaru se, ikia ningo nunguningkiri mu te ninguru ta nunga kasursan. Mu awuk, anananga nangamang nuna suen la Kristus ilak kapetomon ale ko munan ninguru karo tumonko. 29 Umutang ko ani ninguru sail tagisam, ale Kristus ko marak sokel aisiso mu te ura aora garagar tasam.

Copyright information for `WSK