Colossians 4

Nina ura kotam alo, ninga ura dungan kariimet munan diram yawarakala te nunga sinar talko. Nina ikialko, nenenga Kari Biya duruk uningi bagoso.

Ngatang ko den se yawarakala bagara ko den

Nina ngatanga se bagasan mu me bita talko. Ale ikia ago la Kaem aru ngatongal ale amilmil tualko. Ale ana nago ko ago ngatongal se Kaem lage korang kagaru nangaruk se ana te noko den gilalong yawara, nu Kristus te kariimet nunga sangaru taukko, mu balnakko. Den umutang yumura te aniram, bare ana aitak wetang te balsan. Se den mu ko ani talipara ningi bagasam. Se ago ko ngatongal se Kaem ura imi aisam iwitata, ani den mu ninguru balik se kariimet ikimonko.

Tom nina kariimet Kris mena mu nunga ningi bagasan mu, ikia munan ago bagaralko, tom am me namurukko.
Col 4:5-6 Ana ikia munan ago baganakko: Eph 4:29; 5:15-16; 1 Thes 4:11-12; 1 Peter 3:15-16.
Nina tom suen biya munak te mu nunga kua se, den welang yawara nunguning ago la arungu munakaralko. Umutang te nina kariimet suen la nunga den koma balu nungaralko mu terong la.

Tychicus Onesimus ilak Colosse nongote namomonko

Tychicus mu ani aguwaya bagasam mu aga dugu duap suen la ninga manaru sapurukko. Nu aninga bo yawara, nu Kari Biya ko ura kari yawara, aninga ura suwan. Ani nu nenengate betesam, nu ana aguwaya bagasan mu ninga manuk se ikial, se nu nengemang sokel tuokko. Nu Onesimus ilak nengete namurukko. Onesimus mu anananga bo yawara tala, nu gomang ningi nunguning, se nenenga wonong suwan tala. Nuna ilagala mel aguwaya imi te aratuwoso mu ninga manarmonko.

Amilmil den saki Colosse Kris alo nongote namaram

10 Aristarchus, nu ani agarak talipara ningi bagoso, mu ko amilmil den ningarso. Se Barnabas ko numar Mark mu betelatala ko amilmil den ningarso. Nu geragawa nengete tairuk mu, ani ninga manem iwitatala amilmil ago talko. 11 Joshua ko nup bo Justus mu karogotala ko den amilmil ningarso. Juda alo nunga ningi kari ilagala suwan mu la ani agarak Kaem ko kingdom ko ura ilusan. Nuna ani ninguru aga sangarukasan ale angamang sokel tuikasan.

12 Ninga wonong suwan Epaphras, Jesus Kristus ko ura kari, mu ko amilmil den ningarso. Nu tom suen biya nina nego ko sokel ago la Kaem aru ngatanguru lagoso, nina Kaem ko ikia gomang karo tui se sokel ago la sanamaral ale nengemang ningi nunguning aora biya bagaralko, ko Kaem ngatangaruwoso. 13 Ani noko ninguru ikiem ale ninga manorsam, nu nina se Kris alo Laodicea se Hierapolis bagasan mu nego ko ura kowar ninguru taso.

14 Anananga bo yawara Luke, nu doctor, se Demas, mu nononga amilmil den ninga manorsan. 15 Se aninga den amilmil aga singsang Laodicea anisan, se imet Nimpha mu se, Kris sang noko kawam te biguwusan, mu nungaralko.

16 Nina tam gawa te den imi arigal mu, aking Kris alo Laodicea anisan mu nongote beteral se namuruk se agotala aringimonko. Se tam gawa Laodicea nongote beterem se namaram mu nina agotala tal arigalko.

17 Ale Archippus iwita maonalko: “Ni ura Jesus Kristus ni kisam mu ninguru bita saparko.”

Ani Paul den imi baluwerem se kari bo batogam, bare aga amilmil den imi agata agiting te batagem. Ani talipara ningi bagasam imi ago ko iki se bagaralko. Kaem ko lila yawara nina nengerak bagurukko.

18 

Copyright information for `WSK