Ephesians 1

Den gira

Ani Paul, Kaem aga balam se ani Jesus Kristus ko apostle bagasam, bare den imi bataguru nina kariimet Jesus Kristus ko nengemang ningi nunguning bagasan mu ningarsam.
Eph 1:1 Paul Ephesus sor te: Acts 18:19-21; 19:1-40; 20:17-38.
Anananga Nainet Kaem, ko Namar Jesus Kristus ilak, nunga nongomang yawara, se nunga lila ningarmon se te bagaralko.

Kristus te Kaem duruk wonong ko marak ninguru nangaram

Ana Kaem, anananga Biya Jesus Kristus ko Nuet, wore nup biyala patowanakko. Mu awuk, nu ana Kristus te duruk wonong ko marak, ko munan suen la nangaram. Ali imi me aratukaso la, nu anananga balam, ana Kristus te noko kariimet ko aratanak ale nu koma te laili nunguningkiri karur mena baganakko.
Eph 1:4 Kaem giram ana noko ma nanga balam: John 15:16; 2 Thes 2:13.
Nu gomang nangaram,
ale anananga balam Jesus Kristus te nanga giok se noko kuriang ko baganakko. Noko gomang, ko ikia mu butata. Buta se ana Kaem nikim karogo mu ko nup biyala patowanakko. Mu awuk, ana memek nunguningkiri bagaman, bare nu gomang ninguru nunguningkiri nangaram, ale ko Namar, noko yawara, wore balu nangaram se nanga bataguru taukko kueram, ale ko gue te anananga memek suen la siwuram. Kaem ko gomang nangara am biya nunguningkiri, se ko ikia biyala tala, se te nu saonga yawara mu beteram.

Nu Kristus ko ura te mel bitirukko mu giram ko ikiam, ale eng karo tui tui taiwoso. Ale aitak noko ikia ulengkala yumura te anikaso umu wetang te nanga kausam. 10 Mu iwita: tom nu ko ikiwoso mu tai aratuk mu te, nu duruk wonong ko mel, se ali imi ko mel mu suen la bolala awurok, se Kristus kota suwanta mel suen biya mu nunga supuling biya bagurukko.

11 Mel suen biya aratoso mu Kaem ko gomang girakala biya giram balam wore te aratu aratu namawoso. Se noko ikia girakala bitirukko balam mu karo tuam, ale Kristus te ana noko ma nanga balam. 12 Se mu te ana kariimet giriman Kristus ko nangamang ningi nunguning aram, mu ana Kaem nikim karogo ko nup biyala patowanakko.

13 Nina betela, nina den gilalong yawara ikiman, se den nunguning umu ninga giam. Nina Kristus ko nengemang ningi nunguning aram se Kaem Korang Bur nangarukko balam mu ningaram ale te ninga balam noko mam. 14 Se Korang Bur nangarak bagoso mu te ana ikiman, mel Kaem ko kariimet nungarukko balam mu ana nangarukkowo. Ale ana karogo ikiman, tom nu te nanga giok se ilak baganakko mu tairukkowo. Buta se ana nu nikim karogo wore ko nup biyala patowanakko!

Paul Ephesus nogo ko Kaem aru ngatongam

15 Buta se, tom ani ikiem nina nanga Biya Jesus ko nengemang ningi nunguning aram mu ko den ikiem, ale nina Kris alo suen la nunga kuesan mu ko den ani ikiem tala, mu tom umutang te se eng tai aitak, 16 ani nego ko tom suen biya Kaem amilmil tusam ale aru ngatangorsam. 17 Ale Kaem nikim garagar se nup biya karogo, se nanga Biya Jesus Kristus ko Nuet tala, mu manorsam: nu Korang Bur te ikia nunguning ningaruk ale ninga sanguk se noko ninguru ikialko. 18 Ale ani nu manorsam, nu ninga ningamin sinar awurok se nina te mel nu ko ninga auram se ko kimi bitawasan mu ko ikialko. Ale munan nu ko kariimet nungarukko balam umutang yawarakala nunguningkiri mu ko ikialko.
Eph 1:18 Nu munan yawara nunguningkiri nangarukko: 1 Cor 2:9-10.
19 Ale noko sokel ana kariimet nangamang ningi nunguning mu nanga sangarso umutang biyala nunguningkiri, mu karogo ko ikialko.

Sokel biya nanga ningi ura taso borta Kaem Kristus kueram wore te mumam se barasam, ale patowaram duruk wonong te ko kuting sengam mu te beteram se daigam.
21 Mu te Kristus aitak kualala biya bagoso. Nu ali supuling alo, kari gira anira, kari sail karogo, se kari bibiya suen la nunga kiaram, ale nu kualala biya bagoso. Ale nu aliti kari suen biya nunup ago bare nu nunga kiaram ale nu nup biya, tom imi te ko la mena, tom udagi te betelatala.
Eph 1:21-23 Jesus nup biya: Phil 2:9-10; Col 1:15-17; 2:15; Heb 1:1-3.
22 Kaem mel suen biya Kristus suwik duap ningi awuram, ale ana Kris alo nanga supuling biya balu beteram se bagoso. Ana Kris alo mu Kristus ko kariimet biguwura suwanta. Nu anananga ningi bagoso. Ale nu aliti se duruk te ko mel suen biya iluso ale bitaruwoso.

23 

Copyright information for `WSK