Ephesians 2

Ana kueman bagaman, bare Kaem Kristus te nanga maraguwuram

Ulengkala nina kuring batoga ko kariimet, kilek memek duap duap bitakasan. Buta se nina kueman ale bagaman.
Eph 2:1 John 5:24 ago arikko.
Tom mu te nina ali ewere ko munan memek te geragakasan, ale kari memek Satan ko munan karo tuikasan. Nu bur memek nanga ningi geragawasan mu nunga supuling bagoso. Ale nu kariimet Kaem kuring batagorsan mu nongomang ningi ura aitak am bitawoso.

Ana ulengkala nuna turantala suen la kuring batoga ko kariimet bagakasan. Ana nangata nanga nangamang te ikia memek anikaso mu karo tuikasan ale dugu kaora memek te bagakasan. Se ana nuna iwitatala koma memek tanakko bagaman. Bare Kaem ko gomang mu tawun biya nangaram, ale nanga kuakaso. Ana nangata nanga memek te kueman ale bagaman, bare nu Kristus te marak nangaram, se ilak maragaman. E nina kariimet diram se Kaem ninga giam uwutata mena. Mu Kaem kota gomang ningaram ale ninga giam. Nu ana Kristus ilak nanga maraguwuram, ale nanga patowaram duruk wonong te nanga awuram se ilak dagiman bagasan. Nu Jesus Kristus te gomang biyala nunguningkiri nangaram, mu awuk, noko gomang kariimet aitakta ko se tom udagi te aratomon mu agotala noko ikimon, nu kari gomang tua ko Kaem nunguningkiri mu ko ikimonko. Mu iwita: nina Kaem ko marak sokel yawara taman mu nengeta ninga sail te mena. Mu Kaem kota gomang ningaram ale nengemang ningi nunguning te ninga giam.
Eph 2:8 Kaem gomang nangaram ale nanga giam: Titus 3:3-7.
Nu munan am ipi ningaram.
Mu nina ura beteman mu ko koma iwita mena. Buta se kari bo kota numi te patawurukko me terong. 10 Kaem kota nanga beteram, ale Jesus Kristus te ana kariimet iru ko nanga beteram, ana munan ningo te nainimi sangaru se baganakko, noko gomang motam te aniram mu uwutata.

Ana kirker bagaman, bare Kristus te motam suwan awuman

11 Nina ulengkala aguwaya bagakasan mu me ningamili sapurukko. Nina Juda nunga gue te me bilangaman, nina sor saki ko kariimet. Se Juda alo ninga balukasan “kari nungumik guang batoga me ikia” makasan. (Bare Juda alo nungumik guang batagorsan mu nungumik guang ko munan wore la. Sang Kaem ko me ikisan.)
Eph 2:11 Munan nangimik guang ko la mu me nanga sangukko: Rom 2:28.
12 Tom mu te nina Kristus kumik duap te mena, nina awar biya bagakasan. Nina Israel alo nongorak mena, se Kaem Israel arungu den nungam ale nunga sangukko balam, bare mu nina nongorak mena tala. Ale nina ali imi te baga se anapeya ningo nuam udagi te aratukko mu ko ikia nengete mena tala. Mu awuk, nina Kaem ko me ikiman se.

13 Nina awar biya bagakasan. Bare aitak nina Jesus Kristus ilak kapetaman ale bagasan, se Kaem noko gue te ninga giam ale kumik duap te ninga awuram. 14 Mu awuk, Kristus kota mu anananga marolila ko supuling bagoso. Ulengkala ana Juda se nina sor saki ana nangarak bagara suwanta mena, nainimi biriruwukasan. Bare Kristus kota ko kumik te tam tareng kusumuri aniram mu gi waru saparam, ale nanga biguwuram se bagasan. 15 Ana nainimi karokasan. Bare nu kueram mu te nu ana Juda nanga Law Den, se ko den suen biya karo tua ko karogo mu menawu saparam, ale te motam ilagala mu nanga kager menawuram. Ale nu kumik duap te nanga biguwuram, se motam suwanta iru arataman. 16 Nu tam kangono te kueram mu ana kariimet kager te bagaman wore nanga biguwuram, motam suwan awuram, ale nangarak Kaem kote peleram namaram. 17 Nu tairam ale marolila kapurukko den balam, se den nu balam mu nina awar bagaman mu ninga, se ana Juda kariimet pingi bagaman mu nanga. 18 Mu awuk, Kristus te ana suen la Korang Bur suwanta mu te la Kaem kote namanakko.
Eph 2:18 Ana Korang Bur suwanta taman: 1 Cor 12:13.


Ana Kris alo mu ana Kaem ko kawam laili iwita

19 Buta se nina aitak kariimet iwareng iwita me bagasan. Mena. Nina Kaem ko kariimet saki arungak digo suwanta ningi bagasan. Ale nina Kaem ko kuriang bagasan. 20 Nina se ana mu kawam Kaem kalowoso wore turan. Nu ana apostle se prophet alo arungak kawam mu ko ngatalek iwita nanga baongam. Se Kristus mu ngatalek amu kawam giokko owore ko baongam. 21 Se kawam mu ko tam kuting suen la mu nu Kristus awete la awu saparam se iluwam ale gek mam. Se Kaem kawam mu am kalowoso, mu kawam kako ko anirukko. Nina betela Kristus ilak, se Kaem nina Kris saki karogo ninga biguwuso se ko kawam kako ko aratasan. Se Kaem kota ko Korang Bur te kawam mu ningi bagoso.

22 

Copyright information for `WSK