Ephesians 3

Paul ko ura mu wonong saki den gilalong yawara nungarukko

Borta ko ani Paul, Jesus Kristus ko ura kari, mu talipara ningi aga beteman se bagasam. Mu awuk, ani nina sor saki ko kariimet den gilalong yawara ago ikialko ura bitawerem se aga talipaman.

Mu nina ikiman agila, Kaem gomang ani aisam ale ura imi ani balu aisam, ani nu gomang ningaram mu ko ninga manikko. Nu ko ikia yumura te aniram mu aninga kausam se ikiem, se ani maingkala katir ko ninga manem se ikiman. Kaem Kristus te aguwaya bitirukko ko ikiwaram mu ani ko ikiem ale urukuem, se nina den umutang kaural mu karogo ko ikialko. Mu awuk, girakala Kaem noko ikia imi kariimet wetang te me nunga kausam. Bare aitak nu Korang Bur te ana apostle se prophet alo nanga kausam. Se noko ikia yumura te aniram mu iwita: den gilalong yawara mu te wonong saki ko kariimet Juda alo arungak motam suwanta biguwumon ale Kaem ko kariimet ko aratomonko. Ale nuna marak sokel yawara Kaem Jesus Kristus te noko kariimet nungarukko balam mu tamonko.

Kaem gomang aisam ale ani den gilalong yawara imi apurekko ko ura kari ko aga balam, ale sokel aisam. Ani Kaem ko kariimet suen la nunga nobowa ningi.
Eph 3:8-13 Paul ko apostle ura: 1 Cor 15:9-10; 2 Tim 2:10.
Bare Kaem kota ura ningo imi ani aisam, mu munan ningo ningo Kristus kote aniso, ana ko iki sapanakko koma mena, wore wonong saki ko kariimet nunga manikko aga balam.
Kaem mel suen biya beteram, ale nu aguwaya bitirukko ikia beteram mu kam maiya biya yumura la anikaso, bare ani balu pagikko aga kausam. 10 Se noko gomang mu iwita: engel sokel bibiya taiti kuali anisan mu aitak Kris alo nunga aringimon ale te ikimon, mu Kaem ko ikia duap duap se yawarakala.
Eph 3:10 1 Peter 1:12 ago arikko.


11 Kaem duap te nunguning nanga Biya Jesus Kristus te ura uwutata bitirukko mu ko ikiam, ale eng beteram. 12 Se ana aitak Kristus te, se nangamang ningi nunguning te tala, Kaem kote am kasu nagunak ale nguangara bo mena koma te sanamanakko. 13 Buta se ani ninga manorsam, ani nina nego ko memek tasam mu ko me nengemang batagukko. Memek ani tasam mu ani nina ninga sangorsam.

Kristus ko gomang nangara

14 Borta ko ani Kaem koma dugu te abugura kulukursam ale nego ko ngatangasam. 15 Nu ana suen la nanga Nainet Biya, noko kariimet duruk wonong te se ana ali imi te betelatala. 16 Nu munan ningo, sokel biya nukote aniso. Se ani nu aru manorsam, nu ko Korang Bur te sokel ningaruk se te nengemang ningi sokel ago bagaralko. 17 Ale nenenga nengemang ningi nunguning te Kristus nengerak bagurukko. Ani nu aru ngatangorsam, mu nu ninga sanguk se tam yager ali ningi kaposo ale ali iluso gek am aniso iwitata, nina Jesus Kristus ninguru ilukuawural, 18 ale ana Kris saki nangarak mu ninguru ikialko, nu nego ko ninguru tala kueso, ale ninguru tala gomang ningarso. Bare noko gomang ningarso mu ko ulal, ko du, ko tarigira, ko maiya, mu nina ta, ana ta, mel imi mu iki kutuwunakko me terong. Nina butata beteral mu te munan ningo suen biya Kaem kota kote aniso, mu suen la nengemang te tai sapurukko.

20 Kaem ko sokel nanga ningi biyala nunguningkiri ura towoso. Se ana anape mel nu bitirukko me terong iwita se ko nu manornakko? Mena. Mel suen biya nu betera ikiso. Noko ikia anananga ikia suen la kiaram. Buta se Kris kariimet alo nungumik te se, Jesus Kristus ko kumik te, Kaem tom suen biya nup biya taukko. Ana aitak tom imi te, se tom udagi te betelatala nu nup biya tui se laganakko! Nunguning.

21 

Copyright information for `WSK