Galatians 4

Ana aitak ura dungan kariimet mena, ana Kaem ko kuriang bagasan

Aninga den mu iwita: kuriang mu noko nuet kote mel suen la giokko. Se kuriang mu mel suen biya mu ko kotam iwita bagoso. Bare tom nu kulak la, mu nu yam ura kari iwita bagoso. Ale nu kari nu bitaruwasan mu nuguring bowa ningi bagoso, nama tom ko nuet balam mu te asele nu mel suen la giso.

Mu turantala, ulengkala ana kuriang iwita baga se, ali imi ko kilek suen biya ko bowa ningi talipara kari iwita ura tokasan. Bare tom tai aratam se Kaem ko Namar beteram se imet tuagu ningi aratam. Ale Juda nunga Law Den bowa ningi bagakaso. Mu nu ana kariimet Law Den bowa ningi bagakasan bare nanga dia tauk, se te ana Kaem ko kuriang ko aratanakko uwutata beteram.

Ana Kaem ko kuriang bagasan, se nu ko Korang Bur beteram se nangamang ningi tairam. Se noko Namar turantala ana nu arusan, “Ba, ni anananga Ba,” masan.
Gal 4:6-7 Kaem ko Bur nangaram se nu arusan: Rom 8:14-17.
Ana ura dungan kariimet bagaman, bare aitak mu mena. Aitak ana Kaem ko kuriang. Se mel suen biya nu ko kuriang nungarukko balam mu ana ginakko.

Paul Galatia Kris alo nogo ko ikia tawun biya moakaso

Ulengkala nina Kaem ko me ikikasan, ale ali imi ko mel, nina kaem makasan bare kaem nunguning mena, bare nobowa ningi ura dungan bita lagaman. Bare aitak nina Kaem ko ikiman. (E ani iwita balik, Kaem nenenga ikiam ale ninga giam ma balik mu asele ani terong balsam.) Bare awuk se nina pilawasan, ali ko mel, ulengkala nobowa ningi ura ilu lagaman, wore nongote aking ura iluwalko pelesan e? Ali imi ko kaem mu kituwura, ninga sangarmonko nosokel mena! 10 Nina yar naung ningi tom saki aratasan mu nunga balsan tom bibiya masan, ale ninguru arigisan! Ale sige saki, yar saki betelatala nunga balsan tom bibiya masan, ale arigisan tala!
Gal 4:9-10 Nuna pilakasan munan aora bowa ningi namakasan: Col 2:16-17, 20-23.
11 Borta ko ani nina nego ko ikia ninguru aga moso. Mu awuk, aninga ura kowar nenenga ningi beterem wore ko nunguning mena, yam ipi namuruk bore ko!

12 Buta se aga singsang, ani nina nego ko angamang motam niaso. Tom ani Law Den abiring tuem, mu ani nenenga iwitatala aratem. Bare aitak nina Law Den karo tualko karogo kaesan. Bare aninga angamang mu nina aninga iwitatala aratal ale den mu bowa ningi me bagaralko!

Nina memek bo ulengkala ani angimik te me beteman.
13 Nina ikisan, ani motam motam den gilalong yawara ninga manem mu ko duap iwita: ani kuera karogo angimik sokel menaram se nina ningi baga se den ninga manem. 14 Se ani kuera ikup taem mu ninga ira arigam. Bare nina ani me nibiring aisiman, ale me aga meman. Mena. Nina ani Kaem ko engel bo iwita, se Jesus Kristus iwita aga taman. 15 Ani ninguru ikisam ale balsam, nina tom mu te amilmil biyala. Nina ninguru aga kueman ale aga saongalko ninguru kuakasan. Se awuk se nenengate amilmil biya mu aitak menaram a? 16 Bare aitak ani wetang te ninguru ninga manorsam mu te nina aninga ikisan ani nenenga kager kari bo e?

17 Kari nenenga nengemang kulukurmonko kaesan, mu nononga nongomang mu nina anananga beteral ale nogowom kaoralko wore ko nengemang kulukursan ale ninga tagisan. 18 Bare ani nengerak bagirik agi, sor bo te namirik bagirik agi se, kari sang ninga sangarmonko agi mu terongtala. Bare nononga ikia diram te ninga sangarmon mu asele ani ko amilmilirikko!

19 O aga kariimet, imet kuriang iluwokko kumik yaman ikiso iwitata, ani aking nego ko angamang ninguru batagoso. Se aninga angamang bataga imi me menaruk la, nina nama Jesus Kristus iwita aratal se ningarkikko. 20 Aninga angamang biyala mu nengerak baga se den ningo sang balik se ikialko. Bare mena. Se mu ko ani nina nego ko ikia ninguru aga moso.

Sarah Hagar ilak nunga dugu duap

21 Nina kariimet Law Den bowa ningi bagaralko kaesan, mu isa imi ko koma balu aisalko! Nina Law Den kausan ko nunguning ikisan e? 22 Den mu iwita balso: Abraham ko kuriang ilagala. Ura saonga imet Hagar mu bo iluwam. Se noko nuwus nunguning Sarah mu bo iluwam.
Gal 4:22-23 Hagar mu Ishmael iluwam: Gen 16:15. Nuwus nunguning Sarah mu Isaac iluwam: Gen 18:10; 21:2; Rom 9:7-9.
23 Ura imet kuriang iluwam, mu ali ko munan te iluwam. Bare Abraham ko nuwus nunguning kuriang iluwam, mu Kaem ko kuring balu tuam wore te iluwam.

24 Se den umutang mu den tuaturum iwita. Imet ilagala mu

den ilagala Kaem kariimet nungaram wore turan. Bo mu nu Duruk Sinai mu te Law Den Moses tuam se Juda kariimet nungaram. Se nuna Law Den mu bowa ningi ura dungan iwita bagasan: umutang mu Hagar.
Gal 4:24 Duruk Sinai mu Law Den ko balso: Heb 12:18-21. Arabia sor ko kariimet sang Duruk Sinai mu Hagar masan.
25 Duruk Sinai Arabia sor te aniso umutang Hagar ko balso. Se wonong biya Jerusalem mu ura dungan imet Hagar turantala, mu awuk, wonong mu ko kariimet mu ura dungan ko bagasan tala.
Gal 4:25 Juda kariimet Jerusalem bagakasan mu Law den bowa ningi bagakasan: Mat 23:2-4; Acts 15:10.


26 Bare anananga wonong duap mu Jerusalem kualala biya, duruk wonong.
Gal 4:26 Jerusalem kualala biya: Heb 12:22; Rev 21:2, 10.
Mu anananga nainam Sarah iwita. Se ana ko kariimet mu yawarakala bagasan, Law Den me nanga talipawoso.
27 Mu awuk, Isaiah mel mu ko iwita balam:

“Ni imet kuriang mena, kuriang iluwa ko yaman me ikikasam, bare ni am amilmilerko!
Ni biyala ai nier ale amilmilerko!
Mu awuk, ni kuriang suen biya,
ale dungan imet mu kier ale ka kuriang suen biya nunguningkiri!”
Gal 4:27 Isaiah 54:1.

28 O aga singsang, nina Isaac turantala. Mu awuk, Kaem ko den balam mu te nina noko kuriang ko arataman. 29 Bare ikialko. Girakala kuriang nuam ali ewere ko munan te iluwam, mu nu kuriang nuam Kaem ko den balam mu te diram iluwam wore bita maguwukaso. Se aitak kilek moke suwanta tala aratuwoso. 30 Bare Kaem ko batoga te awuk balso? Mu Kaem iwita Abraham maonam:

“Ura dungan imet ko kuriang ilak nunga karoko,” mam.
“Mu awuk, ura dungan imet ko kuriang mu imet nunguning ko kuriang ilak wete Abraham ko mel me giokkowo.”
Gal 4:28-30 Kaem ko Bur te ana noko kuriang ko aratasan: John 1:12-13. Ishmael Hagar ilak: Gen 21:9-10.

Buta se aga singsang, ana ura dungan imet mu ko kuriang mena. Bare ana noko nuwus nunguning mu ko kuriang.

31 

Copyright information for `WSK