Galatians 6

Ana Kris alo nainimi ninguru sangornakko

Aga singsang, Kris kari bo lage memek karuk agi mu, nina Korang Bur te aolak iluwasan mu kari mu ekes te maonal, se giris palaguk ale peleruk lage ningo te tairukko. Bare tom nina nu sangaru se mu, ninimi me patowaralko, Satan nina betela ninga ira arigok bore ko. Nina ikup gial mu ninimi saongalko. Umutang te nina Kristus ko munan den ninguru karo tualko.
Gal 6:1-2 Nanga saki alo lage ningo nunga kasurnakko: James 5:19-20. Kristus ko munan: John 13:34; Rom 15:1-2.


Bare ni awiriya keta nimi ikisam ni terong se nip ago ma balsam, bare ni nip mena, mu ni keta nimi kuluruwasam. Ana suen la nangata nanga bagara aolak tutenakko. Ale diram yawarakala ikinak mu asele amilmilanakko. Bare ana nangata nanga bagara aolak mu saki alo nunga bagara aolak karogo me tutenakko. Mena. Ana nangata nanga betera kaora ko sinar tanak, ale namake namake nanga ikup ginakko.
Gal 6:3-5 Nainimi me patowanakko: Rom 12:3; 1 Cor 10:12. Nangata nanga bagara aolak tutenakko: 1 Cor 11:28; 2 Cor 13:5.


Nina kari bo Kaem den ninga kasurso, mu ninga melmasak sikina kari mu te saongalko.

Nina ikia kawel te ninimi kulal bore ko sinar talko. Kari bo ta Kaem kulokko me terong mam. Kari mel aguso, mu borta la tarigiruk se giokko. Mu turantala, kariimet ikia memek nongomang te aniso mu karo tui lagasan / mu karo tusan ale kilek memek bita lagasan, mu udagi ko nunguning memek tala tamonko. Bare kariimet Korang Bur karo tusan ale munan yawara bita lagasan, mu ko nunguning mu nuna marak ningo tom suen biya te bagomonko mu Korang Bur nungarukko. Buta se ana kilek ningo ningo betenakko me gagornakko. Mu awuk, ana me gagornak, am sail taginak mu asele nama ko tom te ko nunguning aringinakko.
Gal 6:8-10 Lage ilagala: Rom 8:13. Munan ningo betenakko me gagornakko: 2 Thes 3:13. Ana koma yawara tanakko: 1 Cor 15:58.


10 Buta se ana aguwaya kariimet suen la nunga sangornakko terong agi mu nunga sangornakko. Bare nongomang ningi nunguning alo mu asele biyala nunga sangornakko.

Paul Jesus ko tam kangono ko amilmilaram

11 Nina agiting garek letter bibiya imi arigisan? Mu ani agata den nukum imi batagorsam.

12 Ikialko. Juda kari sang nenenga ningimik guang batutumumonko ninguru sail tagisan mu ko duap iwita: nuna nunga saki nomotam te nunup biya aratukko kaesan. Nuna Kristus tam kangono te kueram mu ko den diram la balmon se Juda alo nunga bita maguwumon wore ko nguangasan ale.
Gal 6:12 Kristus tam kangono te kueram mu te nu ura Kaem te nanga giokko mu bita kutuwuram: John 19:30. Bare kari saki tam kangono ko den diram me balukasan, Juda nunga munan karogo biguwukasan: Gal 1:6-10; 5:11-12; Phil 3:18.
13 Bare kari nungumik guang batutumura umutang mu nongota mu Law Den saki me karo tusan! Bare nunga ikia nina ningimik guang batutumural, se te nuna ninga balmon nononga olekem ma balmon, ale nunumi patawomonko!

14 Bare ani mu mel saki nup me patawirikko. Mena. Ani nanga Kari Biya Jesus Kristus tam kangono te kueram mu ko la amilmilirik, ale nup patawirikko. Nu ani ago ko kueram mu ko, ani ali imi ko mel se ko kilek mu suen la abiring tuem. Se ani ali imi ko kariimet nomokete mu ani kari aip mena, kuerem iwitata. 15 Ana nangimik guang batagorman agi mena agi mu mel yam. Ana Korang Bur te kariimet iru ko arataman umutang mel nunguningkiri.
Gal 6:15 Ana Kristus te kariimet iru aratasan: 2 Cor 5:17. Nuna Paul ninguru bita maguwukasan: 2 Cor 4:8-12.
16 Nenenga ningi kariimet ikia imi ilusan ale karo tusan, mu Kaem ko gomang motam, se ko lila nengerak bagurukko. Nina umutang Kaem ko kariimet nunguning, se Israel nunguning.

17 Se ani kari bo udagi ikup bo me aisukko! Mu awuk, Kristus ko nup balukasam mu ko kawilis angimik te aniso.
Gal 6:17 Nuna Paul ninguru bita maguwukasan: 2 Cor 4:8-12.


O aga sikisaki, nanga Biya Jesus Kristus ko gomang lila nenenga nengemang motam ningi anirukko. Nunguning.

18 

Copyright information for `WSK