Genesis 1

Mel suen biya arataman ko duap

Duap te nunguningkiri Kaem taiti se ali beteram.
Gen 1:1 Kaem mel suen biya beteram: John 1:1-3 Heb 11:3.
Bare sor ko ariga me dirmakaso. Sor yam anikaso. Yu mel suen biya iramuram, se tiromorom biya anikaso, se Kaem ko Korang Bur yu awete nama taiwakaso.

Se Kaem balam, “Nikim aratukko,” mam. Se nikim aratam. Se Kaem nikim aratam mu arigam yawarakala. Aking balam se nikim kigilik aratam, se tiromorom kigilik aratam. Se nikim balam mu “woremkalal” mam, ale tiromorom balam mu “turom” mam. Se turom batagam ale ukiram mu tom l.

Se Kaem balam, “Yu paoga ilagala aratukko,” mam, “bo kualala aniruk, se bo aliti.” Se mel balam mu arataman. Se kuwim yu aliti se yu kualala ko kusumuri mu nup beteram “taiti” mam. Se turom batagam ale ukiram mu tom 2.

Se Kaem balam, “Yu taiti bowa ningi aniso imi nama kuwim suwanta bolala awurokko, se sor ali duruk wore aratukko.” Se mel balam mu uwutata aratam. 10 Se sor garagarayam mu Kaem balam “ali” mam, se yu nama kuwim suwanta bolala awuram mu balam “gagi” mam. Ale Kaem mel aratam mu arigam yawarakala.
Gen 1:6-10 Yu: Psa 104:6-9 Psa 148:4 2 Peter 3:5-6.


11 Se Kaem balam, “Ali likilim la te tam, sirsir, se mel duap duap nunguning betemonko mu aratukko,” mam. Se mel balam mu uwutata aratam. 12 Ali awete tam, sirsir, se mel duap duap nunguning betemonko mu arataman. Se Kaem mel aratam mu arigam yawarakala. 13 Se turom batagam ale sor ukiram mu tom 3.

14 Se Kaem balam, “Nikim taiti bowa ko aratomonko,” mam, “se turom kilimik, woremkalal kilimik anirukko, sige, yar, tom duap duap te ikia ko. 15 Ale nononga nikinang ali lilim la tuokko.” Se mel balam mu uwutata aratam. 16 Kaem nikim bibiya ilagala balam se arataman: worem mu arkalal nikim tuokko, se sige mu turom nikim tuokko. Ale balam se baras agotala arataman. 17 Kaem mel imi taiti bowa ko nunga awuram mu ali nikim tumonko. 18 Ale arkalal turom bitarmon, ale tiromorom se nikinang kirker nunga awumonko. Se Kaem mel aratam mu arigam yawarakala.
Gen 1:14-22 Nikim se mel gagi ningi: Psa 104:19-26.
19 Se turom batagam ale ukiram mu tom 4.

20 Se Kaem balam, “Yu gagi ningi mel duap duap marak bagomonko mu aratomon ale yu likilim la terong maukko. Se taiti bowa ko yalek inanganang suen la aratomon ale bengemon geragomonko.” 21 Butata se Kaem gagi ningi wal bibiya nunga beteram, ale yu ningi ko mel duap duap ago nunga beteram, ale ali awete inanganang duap duap ago nunga beteram. Ale nu mel aratam mu arigam yawarakala. 22 Se marak nungaram ale balam, “Gagi ningi ko mel duap duap gue pagomon ale gagi terong maukko. Se ali awete inanganang suen biya tala pagomonko.” 23 Se turom batagam ale ukiram mu tom 5.

24 Se Kaem balam, “Ali te mel duap duap marak sokel ago mu aratomonko, mel bibiya, mel gotektek, mel wonong ko, mel giarum ko.” Se butata aratam. 25 Se Kaem mel suen biya imi nunga beteram mu arigam yawarakala.

26 Se Kaem balam, “Ana kariimet nunga betenak se anananga turantala aratomonko. Nuna wal, inanganang, buruk-kausik, se wonong ko mel, giarum ko mel biya gotek mu nunga bitarmonko.”

27 Se Kaem kariimet nunga beteram,

noko turantala nunga beteram.
Nu kari beteram, imet beteram.
28 Ale marak nungaram ale balam, “Nina kuriang suen biya iluwal, se sor suen biya te dagi namomon ale mel suen biya mu bitarmonko. Nina wal, inanganang, se ali awete mel suen la nunga bitualko.”
Gen 1:26-28 Kariimet: Psa 8:6-8.


29 Nu iwita nunga maonam, “Ani tam se mel duap duap suen biya nunguning karogo mu bita ningarem, mu nenenga na inang. 30 Bare sirsir, se tam gawa maramarak, mu inanganang se mel suen biya ali awete geragawasan mu nunga na inang ani beterem.” Se butata aratam.

Se Kaem mel suen la balam se aratu aratu namaram mu arigam, mu am yawarakala nunguningkiri se karogo amilmilaram. Se turom batagam ale ukiram mu tom 6.

31 

Copyright information for `WSK