Genesis 11

Babylon wonong te kawam kalel biya kaloman

Motam motam ali lilim la ko kariimet nunga den suwanta. Nuna aolak iluman geraga se koma worem bausa mu te kuwim bo ali diram nunguningkiri mu te arataman. Sor mu Shinar
Gen 11:2 Sor Shinar ko nup bo mu Babylonia.
ko koma bo. Ale nuna sor mu te bagakasan.

Udagi nongota nunumi manorman, “Aria, ana ali gege nungurnak kainak se brick ko arukko.” Se nuna brick kawam te kalomonko mu ago. Ale nunga mel brick te palungurmon se numi iluwokko mu karogotala.
Gen 11:3 Sor saki te nuna manga te kawam kawam kalokasan, bare imi te mu mena. Nuna brick se kolta te kawam kaloman.
Asele balman, “Aitak ana nangata nanga wonong biya nungurnak, ale ningi kawam bo kalel aromemek kalonakko. Se kawam mu nama laga taiti bowa karogo terong maukko! Se kariimet anananga ura betenak mu aringimon ale anananga nainip patawomonko. Se ana parasanak ale namanak kirker me baganakko.”

Bare Kari Biya nunga wonong se kawam kalel aromemek kaloman mu arigokko tai kaparam, ale balam, “Aitak kariimet suen biya imi te motam suwanta, se nunga den suwanta. Nuna duap beteman mel imi betesan se udagi munan duap duap mu nunga ikia te betemonko terong mamonko. Buta se ana nama kapanak nunga den ngualuwunak se udagi nunumi ko den me ikimonko.”

Se Kari Biya nunga parasuwuram se ngual ngual namaman ali sor suen biya te bagakasan, ale nuna udagi nunga wonong umutang me kaloman. Umutang ko nuna wonong mu nup Babel maman, mu awuk, Kari Biya wonong mu ko kariimet nunga den maguwuram ale nunga parasuwuram, se ali sor ngual ngual te namaman ale bagakasan.
Gen 11:9 Nup Babel mu ko nunguning mu “ngual nunga maguwuram”.


Shem ko numasari, se taleng girigir

10 Imi Shem ko kuriang alo. Yu lom mu buring ko yar ilagala namaram se Shem ko kuriang kari Arphaxad aratam. Shem ko yar 100 se kuriang mu aratam. 11 Se Shem aking 500 yar ago baga se noko kuriang kari imet sang ago arataman se nu kueram.

12 Arphaxad yar 35 bagaram se noko kuriang laun kari mu aratam, ko nup Shelah. 13 Se Arphaxad aking 403 yar ago baga se noko kuriang kari imet sang ago arataman se nu kueram.

14 Shelah 30 yar bagaram se ko kuriang laun kari mu aratam, ko nup Eber. 15 Se Shelah aking 403 yar ago baga se noko kuriang kari imet sang ago arataman se nu kueram.

16 Eber yar 34 bagaram se noko kuriang laun kari mu aratam, ko nup Peleg. 17 Se Eber aking 430 yar ago baga se noko kuriang kari imet sang ago arataman se nu kueram.

18 Peleg 30 yar bagaram se noko kuriang laun kari mu aratam, ko nup Reu. 19 Se Peleg aking 209 yar ago baga se noko kuriang kari imet sang ago arataman se nu kueram.

20 Reu 32 yar bagaram se noko kuriang laun kari mu aratam, ko nup Serug. 21 Se Reu aking 207 yar ago baga se ko kuriang kari imet sang ago arataman se nu kueram.

22 Serug 30 yar bagaram se noko kuriang laun kari mu aratam, ko nup Nahor. 23 Se Serug aking 200 yar ago baga se noko kuriang kari imet sang ago arataman se nu kueram.

24 Nahor yar 29 bagaram se noko kuriang laun kari mu aratam, ko nup Terah. 25 Se Nahor aking 119 yar ago baga se noko kuriang kari imet sang ago arataman se nu kueram.

26 Terah ko yar 70 bagaram mu nu Abram, Nahor, se Haran nunga nonet aratam.

Terah ko kuriang ko numasari

27 Imi Terah ko kuriang alo: Terah ko kuriang mu Abram, Nahor, se Haran. Haran ko kuriang kari ilagala, Lot se Iscah. Se ko nanawus suwanta, nup Milcah. Haran mu sor biya Babylonia mu ningi noko wonong Ur mu te kueram, tom noko nuet Terah am bagaram se nu giram kueram. Se Abram Sarai auwam, se Nahor mu Haran ko nanawus Milcah auwam. 30 Se Sarai kuriang iluwokko me terong.

31 Udagi te Terah barasam ko kuriang Abram mu se, ko numas Lot se, ko noton Sarai, Abram ko nuwus, buta nunga giam ale nunga wonong Ur beteman ale Canaan namakasan. Nuna nama Haran wonong te arataman ale mu te bagakasan. 32 Se Terah wonong mu te baga kueram. Noko yar tom 205.

Copyright information for `WSK