Genesis 12

Kaem Abraham auram

Kari Biya Abram maonam, “Ka wonong ali sor, ka uria mitak, ka singsang, ale ka niet ko wonong bitar ale sor ani ka kausekko mu te namarko.

“Se ani nimasari, ka taleng girigir suen biya kisek se
motam biya nunguningkiri aratukko.
Ani marak yawara kisek se ka nip biyala aratukko.
Se ni te kariimet marak ningo tamonko.
Se kariimet ni marak ningo toko den balsan,
mu ani marak ningo nungarikko.
Bare kariimet nika bita maguwurokko den balsan,
mu ani nuna memek tamonko den balikko.
Se ni te ali sor suen biya ko kariimet marak ningo tamonko.”
Se Abram Kari Biya kuring karo tuam ale barasam sor mu beteram. Se Lot nu ilak namaram. Abram ko yar 75 se nu wonong Haran beteram. Nu ko imet Sarai tam, ale ko uria ko namar Lot tam, ale arungak namakaso. Ale melmasak se ura dungan kariimet se mel suen la nuna Haran wonong te ago bagaman mu giman ale ago arataman Canaan namakasan.

Ale nuna nama Canaan sor te arataman.
Gen 12:5 Abraham: Acts 7:2-8.
Se Abram ko kariimet ago aolak iluman nama Shechem arataman. Wonong mu te tam Moreh, tam biya ngaul iwita mu te bagaram. Tom mu te Canaan kariimet sor mu te am bagakasan. Se Kari Biya Abram kote aratam ale maonam, “Ali ewerta ani nika nimasari ka taleng girigir nungarikko,” mam. Se Abram kuwim Kari Biya nukote aratam mu te manga loangaram
Gen 12:7 Girakala manga loangara ko munan mu kuwim kako iwita te Kaem nup patawukasan.
ale Kari Biya nup ZZZ patowaram.

Udagi nu ko kariimet arungu sor mu beteman ale aolak iluman nama sor duruk ago, Bethel wonong ko koma worem bausa mu te arataman ale nunga nuguwim nungurman. Se Bethel mu koma worem kapara mu te anikaso, se Ai wonong mu koma worem bausa mu te anikaso. Sor mu te Abram akingtala manga loangaram awuram ale Kari Biya nup patowaram.

Udagi nu aking ko kariimet arungu barasaman ale Canaan ko koma south mu te, sor nup Negev masan, wore te namakasan.

Abram Egypt sor te namaram

10 Udagi te karak biya kaparam se sor mu te na mena. Se Abram Egypt namaram, mu tom katirta te bagurukko. 11 Se tom nu Egypt wonong te nama kasu nagurokko pipingi aram, mu nu ko nuwus Sarai iwita maonam, “Ikiko. Ni imet kema motam yawara nunguningkiri. 12 Se ani ikisam, Egypt kari ni karkomon ale balmon ni aninga aiwus ko ka balmonko. Ale nuna aninga momon ale nika tamonko. 13 Buta se ni iwita nunga manaruko, ni aninga agoras ma baluko. Se nuna ni te ani ninguru aga sinar tamonko, me aga momonko.”

14 Se Abram Egypt kasu naguram, se diram tala Egypt kari noko imet koma balayam aringiman. 15 Se Pharaoh ko kari bibiya Sarai ago aringiman ale Pharaoh manorman, “Imet imi imet yawara pa!” maman. Ale namaman taman ale ilak Pharaoh ko kawam te namaman. 16 Se Pharaoh Sarai ko ninguru kuakaso, ale kilek ningo la Abram kumik te bitakaso. Ale sipsip, belelek, bulmakau, donkey, camel, se ura dungan kariimet suen biya Abram tuam.

17 Bare Pharaoh Sarai tam umutang ko Kari Biya kuera memek duap duap Pharaoh se ko kariimet mu nungarukaso. 18 Se aking Pharaoh Abram ko den beteram se tairam se isuam, “Ni awuk se munan ewere ani angimik te beterem? Nika niwus Sarai wore ni awuk se ani me aga manem? 19 Se ni awuk se balem nu nika koras ma balem se ani nu aga imet ko taem? Ka niwus iwo to ale tagi talko!” ma balam. Ale Pharaoh ko kari sang den nunga maonam se Abram ko nuwus ilak, se nunga ura dungan kariimet, se nunga mel suen la karogo nunga karoman, se Egypt wonong beteman ale nama gilingiman.

20 

Copyright information for `WSK