Genesis 13

Abram Lot nunumi beteman ale kirker namaman

Abram Egypt beteram ale Canaan ko koma south mu te Negev namaram, ko imet se ko melmasak suen la ago namaram. Se Lot arungak namaram. Abram ko mel suen biya, noko sipsip, belelek, bulmakau suen biya, se ko manga silver, se ko gold mu biya tala. Nu sor Negev mu te baga beteram ale barasam ale ani barasu, ani barasu, Bethel namakaso. Ale nu kuwim te motam motam kuwim tam bagakaso ale te manga loangaram, kuwim Bethel se Ai ko kusumuri, mu te peleram namaram. Ale kuwim mu te Kaem nup patowaram.

Lot Abram ilak wete geragakasan, bare nu betela ko sipsip, belelek, bulmakau, ale ko kuriang imet, se ko ura kariimet ago. Buta se kuwim mu nuna ilagala te bagomonko me terong. Se Lot Abram nunga ura kari nunumi karogo singi bitakasan ale kagerman. Tom mu te Canaan sang se Perez sang sor mu te ago bagakasan.

Se Abram Lot maonam, “Ni analak gue suwanta,” mam. “Nika ura kari se aninga ura kari kagersan mu ko ikia memek. Se nainimi betenak ale kirker namanakko. Ni arikko, ali aromemek aniso. Ni sor aguwaya mu gemang tui mu te namarko. Ni sengam ko namarko gemang aniruk, mu namarko, se ani ngas ko namirikko. Ni ngas ko namarko agi mu ani sengam ko namirikko.”

10 Se Lot loagaram gurugam ale yu Jordan ko gomeng ningi loagaram se nama laga Zoar aratam, ale sor nu arigam mu yu suen biya, Kari Biya ko ningam Eden iwita, ale Egypt sor iwitatala. (Tom mu te mu Kari Biya wonong ilagala Sodom Gomorrah mu me maguwuram ko tom te.) 11 Se Lot koma worem bausa mu te namaram ale ali sor suen la yu Jordan norogen te mu nu tam.

Se nuna ilagala wete me bagakasan.
12 Abram mu Canaan bagakaso. Se Lot nama wonong yu norogen te anira mu ningi geragam nama Sodom wonong duap te daigam. 13 Sodom wonong ko kariimet mu kariimet memek. Nuna Kaem koma te kilek memek memek nunguningkiri bitakasan.

Kari Biya Abram den ningo maonam, se udagi Abram Hebron namaram bagakaso

14 Lot namaram, se udagi Kari Biya Abram maonam, “Ni te sanamiwasam mu te motam patawur ale sor koma kasik biya ari gurugu saparko. 15 Sor suen biya ni arigisam mu ani ni, se ka kuriang, ka nimasari, ka taleng girigir nungarikko. Se ali mu eng tom suen biya nenenga. 16 Ani balik se ka taleng girigir suen biya nunguningkiri saun iwita aratomonko, kari bo nunga kaurokko me terong. 17 Se ni bares gerage ale ali mu ari guruguko. Ani ali mu suen la ni kisekko.”

Se Abram barasam kuwim mu beteram ale Hebron namaram, ale ko kuwim kari Mamre ko tam bibiya mu duap te nungam ale te bagakaso. Ale kuwim mu te nu manga loangaram ale Kari Biya nup patowaram.

18 

Copyright information for `WSK