Genesis 14

King sang nunga kager

Tom mu te king 4 den nungurman ale bagakasan, kager aratuk mu nuna nunumi sangarmonko. Nunga nunup mu iwita: Babylon wonong nunga king mu ko nup Amraphel, Ellasar wonong nunga king mu Arioch, Goiim wonong nunga king mu Tidal, se Elam wonong nunga king mu Kedorlaomer.

Se betelatala tom mu te king 5 den nungurman ale bagakasan: Sodom wonong nunga king nup Bera, Gomorrah wonong nunga king Birsha, Admah wonong nunga king nup Shinab, Zeboiim wonong nunga king Shemeber, se Bela wonong nunga king, nup Bela tala. (Bela wonong ko nup bo Zoar.) King 5 imitang mu Kedorlaomer ko bowa ningi bagakasan, se nu nunga bitarukaso.

Se yar 12 butata bagakasan nama yar 13 mu te king 5 mu Kedorlaomer ko kuring batagorman. Nuna nunga kager kari arungu mu Gomeng Siddim mu te bolala awuman ale bagakasan. (Aitak Gagi Seselak, “Dead Sea”, mu Gomeng Siddim mu ko kuwim te aniso.)

Se yar 14 mu te Kedorlaomer ko sikisaki, Amraphel, Arioch, se Tidal, mu arungu namaman ale Ashteroth-Karnaim sor mu te Rephaim alo nongorak kagerman ale nunga kia gilingiman. Ale nama sor Ham mu te Zuzim alo nunga kiaman tala, ale nama Kiriathaim sor palunga diram mu te Emim alo nunga kiaman. Ale namaman Hor alo, Seir kariimet nunga duruk te nunga karoman nunga diruwuman arungak nama El Paran, sor garagarayam ko pingi mu te nunga awuman. Asele nuna peleman Kadesh namaman, Kadesh ko nup tom mu te mu En-Mishpat. Ale Amalek alo nunga sor te nongorak kagerman ale suen la nunga kia gilingiman. Ale Amor alo Hazazon-Tamar bagakasan mu arungu kagerman ale nunga kia gilingiman tala.

Kedorlaomer ko kari arungu kager suen biya mu kia sapaman, asele king 5, Sodom, Gomorrah, Admah, Zeboiim, se Bela, arungak kagermonko. King 5 umu nunga kager kari arungu mu Gomeng Siddim umu te bolala awuman, ale nunga kager ko mel nunguru burangi se bagakasan. Se king 4 taiman king 5 mu arungak kagerakasan.

10 Bare Siddim ko sor gomeng mu te kolta ko mutim suen biya anikaso. Se Sodom Gomorrah nunga king nunga kari arungu kager ningi nagumonko nega laga mu, kari sang mu mutim mu ningi dagu gilingiman ale kueman. Se saki la naguman duruk te nama tarigiman. 11 Se king 4 mu Sodom Gomorrah wonong ningi nunga mel suen la, nunga na mel karogo, mu giman ago namaman. 12 Abram ko uria ko kuriang Lot ago Sodom bagaram, se nuna nu karogo iluman, ko melmasak suen la ago giman.

Abram Lot bataguru tam

13 Bare kari bo kager ningi naguram ale Hebrew kari Abram kote namaram ale maonam, “Nuna Lot agotala taman ale ilak namaman,” mam. Tom mu te Abram mu kari Mamre ko tam bibiya wore duap te bagakaso. Mamre mu digo Amor ko kari bo, se ko uria mitak ilagala, Eschol se Aner. Se nuna ilagala suwan Abram ko sikisaki.

14 Se Abram noko kuriang Lot taman ko den ikiam, mu nu ko kari sokel ago, kager ko terong, mu nunga auram se taiman. Kari mu nunga tom 318. Ale Kedorlaomer se ko king ilagala suwan arungu mu nunga karoman arungak nama laga sor ko nup Dan mu te namaman. 15 Ale sor mu te Abram ko kari nunga paogam motam motam nunga awuram se namaman king 4 mu nunga kager kari arungu sor mu te turom kagera gilingiman, ale nunga kia gilingiman. Ale nunga karoman arungak nama Hobah, Damascus koma not mu te namaman, 16 ale nunga mel nuna tere gi gilingiman mu aking nongote giman. Se Abram ko kuriang Lot bataguru tam, ko melmasak ago lilim bataguru tam, ale kariimet ago suen la nunga bataguru giam.

Melchizedek Abram marak tuam

17 Abram Kedorlaomer se ko kari saki ago kager te nunga kiaram ale peleram taikaso. Se Sodom nunga king Abram arigokko Gomeng Shaveh mu te nama aratam ale arigam. Se Gomeng Shaveh mu nuna ago balsan “King nunga Sor Gomeng” masan.

18 Se Melchizedek, Salem wonong ko king, nu Kaem Kualala Biya ko priest tala, mu tairam. Ale nu bread waen giam ago tai Abram tuam, 19 ale marak tui se maonam,

“Kaem Kualala Biya Nunguningkiri duruk ali beteram,
mu ni Abram marak kisokko.
20 Ana noko nup kualala biya ZZZ patowanakko.
Mu nu kager te ka saongam se kager kiarem.”

Se Abram mel suen biya giam mu pagaru 10 awuram, ale suwanta Melchizedek tuam.

21 Asele Sodom nunga king Abram maonam, “Mel suen biya ni kager te giem mu am ilupko. Bare aga kariimet nunga bataguru giem mu nunga awur se pelemon aningate taimonko.”

22 Bare Abram iwita balam, “Kari Biya, Kaem Kualala Biya, duruk ali beteram, mu koma te ani ka manorsam se ikiwoso. 23 Ani nika mel bo ta me taikkowo! Mena. Ni balu ani agata negerem se Abram kari kumik mel ago ko aratam ma balu bore ko. Ani mel bo agata angimik ko me giekko. Mel aninga kari maingkala naman borta la ani giem. Se aga singsang ilagala suwan, Aner, se Eschol se Mamre, mu asele nunga mel saki gimonko.”

24 

Copyright information for `WSK