Genesis 15

Kaem Abram ilak den kaolam

Udagi te Abram ipingiram ale ko ipingira te Kari Biya iwita nu maonam,

“Abram, me nguangerko,” mam.
“Ani nika karem bagasam,
ale nip biya kisekko.”
Bare Abram balam, “O Kari Biya, aninga Kari Biya, ni awuk me se ani kari biya ko aratikko? Ani angimik kuriang mena, se aninga ura kari Eliezer, Damascus kari, mu aninga agiwim taukko. Ni kuriang bo ani me aisem, se aninga ura kari ani agiwim tauk ale aninga melmasak suen la nu giokko.”

Bare Kari Biya Abram maonam, “Ka ura kari Eliezer mu nika kiwim me tauk ale ka melmasak me giokko. Nika kuriang nunguningkiri mu asele ka kiwim taukko.” Ale Kari Biya Abram tam ilak watingi aratam ale maonam, “Baras arikko! Taiti bowa ko loager ale baras arik ale kau arikko. Ni kau kutuwur i?” Ale balam, “Se ka nimas, ka taleng girigir, mu baras iwita suen biya tala aratomonkowo.”

Se Abram Kari Biya ko den balam mu ko gomang ningi nunguning aram. Se Kari Biya nu balam kari diram ko balam.

Kari Biya Abram iwita maonam, “Ani Kari Biya,” mam. “Ani ali imi ni kisek se ko kotam erko agata ka manem se Babylonia ningi wonong Ur mu beterem ale tairem.”

Bare Abram balam, “O Kari Biya, aninga Kari Biya, ani awuk ta ko ikiek ali imi aninga ali arukko?”

Se Kari Biya den koma balam, “Bulmakau itiwik bo, belelek bo, sipsip anumang bo, nunga yar ilagala suwan te lagaman mu se, biton gotektek ilagala nunga gi ale aningate tairko,” mam.

10 Se Kari Biya mel suen la balam mu Abram giam ago kote tairam, ale bulmakau, belelek, sipsip mu kusumuri nunga pakaku koma sing sang nunga awuram.
Gen 15:10 Tom mu te kariimet sor mu te anikasan mu den nungurmon mu uwutata sokel tumonko.
Bare nu inanganang biton ilagala me nunga pagaru kirker nunga awuram.
11 Se taraga saki taiman Abram mel awuram mu namonko kaeyakasan, bare Abram nunga karokaso.

12 Worem nama kaparam sor baingam, se Abram ninguru aniram kueram. Nu aniwaram se tiromorom biya tairam iram, se nu ninguru nguangakaso.

13 Se Kari Biya nu iwita maonam, “Nika kuriang, ka nimasari, nuna sor awar ko kari taira iwita sor bo kelemak te namomon ale yar 400 naung ningi dungan ura ilu se bagomonko. Se sor mu ko kari ninguru nunga bita maguwumonko. 14 Bare ani sor wonong nuna nunga bita maguwumon mu ikup nungarikko. Se nika taleng girigir, tom nuna wonong mu betemonko, mu nuna manga mel suen biya gimon ale pelemon nunga duap ko namomonko. 15 Bare ni keta gemang lila te bager nama kimik garuk nunguningkiri se kuar se ka mutim tugumonko. 16 Ka taleng girigir sor mu te namomon bagomon ale tairate ali imi te me pelemon taimonko. Nunga taleng girigir mu asele pelemon taimonko. Mu awuk, ani Amor kariimet sor imi te Canaan anisan mu me nunga bita maguwurik karik nama tom nuna munan memek ninguru betemon se arigek mu asele. Tom mu te asele nika taleng girigir pelemon taimon ale nunga karomonko.”

17 Worem nama kaparam se sor turom batagam se kani bo, tama bur kuring ko aratuwaram, mu aratam. Se naur sarek kaniwaram mu ago aratam. Ale galep ilagala umu bulmakau belelek sipsip pagaru koma sing sang awuram mu nunga kusumuri namaman.
Gen 15:17 Ko nunguning mu Kaem kusumuri aolak iluwam namaram.
18 Tom mu te Kari Biya Abram ilak den kaolam ale balam, “Ani ali imi nika kuriang, ka nimasari, ka taleng girigir nungarikkowo,” mam. “Se ali ko tom mu Egypt wonong ko koma worem bausa mu te, se nama yu biya Euphrates norogen te aratukko. 19 Se nuna kariimet motam Ken, Keniz, Kadmon, 20 Heth, Perez, Rephaim, Amor, Canaan, Girgash, se Jebus, mu nunga karomon ale ali tamonko.”

21 

Copyright information for `WSK